Tras la surdada da las clavs dal departament da construcziun, traffic e selvicultura al departament da giustia, segirezza e sanadad vegn terminada oz – cun success ed entaifer il termin previs – la fasa da construcziun da var 3 onns

En preschientscha da la cussegliera federala Karin Keller-Sutter, da la cussegliera guvernativa turitgaisa Jacqueline Fehr, presidenta dal concordat dals chantuns da la Svizra orientala davart l'execuziun da chastis e da mesiras, da la regenza grischuna e dals giasts envidads ha lieu oz la surdada da las clavs per il nov stabiliment giudizial serrà Cazas Tignez en il rom d'in act festiv.
Gnanc 3 onns suenter las lavurs da stgavament per l'areal da construcziun d'ina grondezza da 50 000 meters quadrat po il gestiunari surpigliar il nov stabiliment. Il nov edifizi ha custà tut en tut 119 milliuns francs, als quals la confederaziun è sa participada cun ina contribuziun da construcziun da 33 milliuns francs. Suenter ina fasa da test che dura fin la fin da l'onn 2019, vegnan ils emprims praschuniers dischlocads en il nov stabiliment giudizial il cumenzament da l'onn proxim.

Execuziun moderna da chastis
Cun l'avertura dal nov stabiliment giudizial Cazas Tignez tutgan ils deficits da segirezza cumprovads dal stabiliment giudizial Sennhof tar il passà. La protecziun da la generalitad e las cundiziuns da lavur per il persunal d'execuziun correspundan – en il stabiliment nov – als standards necessaris d'ina execuziun moderna da chastis. Il stabiliment giudizial Cazas Tignez sa chatta en la proxima vischinanza dal stabiliment giudizial avert existent Realta e da la clinica psichiatrica Beverin. Il nov stabiliment ha 10 plazzas en la partiziun d'entrada, 100 plazzas en l'execuziun normala, 20 plazzas en l'execuziun speziala, 10 plazzas per praschuniers pli vegls e 12 plazzas per l'execuziun da l'arrest d'inquisiziun sco er per dunnas e per giuvenils. La capacitad d'occupaziun da 152 praschuniers gida a serrar largias da provediment en la purschida d'execuziun da la Svizra, en spezial dal concordat dals chantuns da la Svizra orientala davart l'execuziun da chastis e da mesiras.

Concept architectonic cun autas pretensiuns
Il nov stabiliment dals architects Dieter Jüngling ed Andreas Hagmann da Cuira è caracterisà d'ina zona exteriura marcanta cun in mir da betun da 7 meters autezza e dad 1 kilometer lunghezza sco er cun pliras saivs da metal. L'entir areal è ordinà en trais edifizis principals. Quels èn certifitgads tenor Minergie ed ils materials correspundan a las pretensiuns da persistenza d'ozendi. Il concept architectonic e logistic ademplescha per l'ina las prescripziuns legalas da l'execuziun giudiziala e las pretensiuns cumplexas d'in standard da segirezza uschè aut sco pussaivel. Per l'autra sustegna el dentant er ils praschuniers durant il process da resocialisaziun aspirà, porscha bunas cundiziuns da lavur als collavuraturs da l'instituziun e pussibilitescha andaments da manaschi effizients e favuraivels.

Impurtanza per l'economia publica
Il nov stabiliment giudizial Cazas Tignez è impurtant per l'economia publica. El porscha lavur a circa 110 persunas. Var 80 plazzas vegnan occupadas dal tuttafatg da nov e circa 30 plazzas existentas vegnan transferidas nà dal stabiliment giudizial Sennhof. Il mastergn dals conturns vegn a pudair profitar da la domiciliaziun da quest stabiliment dal concordat da la Svizra orientala, saja quai tras incaricas u tras partenadis en process da producziun.