A Tavau è oz vegnì avert uffizialmain il nov center administrativ regiunal dal chantun Grischun. Patruna da construcziun è la societad simpla Mainstation. Ella ha planisà e construì l'edifizi nov entaifer dus onns. Diesch posts da servetsch chantunals cun circa 60 plazzas da lavur èn da nov concentrads en in lieu.

La strategia chantunala d'immobiglias prevesa en tut il Grischun tut en tut nov centers regiunals en lieus che furman gia ussa centers administrativs. Ils emprims centers a Glion, Roveredo e Tusaun èn gia en funcziun ed èn sa cumprovads en la pratica. A Scuol è previsa l'avertura il november 2014 ed a Landquart l'onn 2015. Alura suondan ils centers a Puschlav, a Samedan ed a Cuira.
A Tavau èn ils diesch posts da servetsch chantunals, ch'eran sparpagliads en set differents lieus, vegnids concentrads en in nov edifizi d'administraziun cun var 60 plazzas da lavur. I sa tracta dal center regiunal per intermediaziun da lavur CIL, dal servetsch psicologic da scola, da l'autoritad per la protecziun d'uffants e da creschids APUC, da l'uffizi da stimaziun, da l'uffizi per la segirezza da victualias e per la sanadad d'animals, da l'inspecturat da scola e da scolina district Val dal Rain-Partenz-Tavau, da la cussegliaziun da professiun, da studi e da carriera cun il center d'infurmaziun professiunala CIP, da l'uffizi da la AI, da la procura publica sco er da la polizia chantunala. Grazia a la reuniun pon vegnir tratgas a niz sinergias impurtantas e spargnads custs.
Edifizi d'administraziun nov e modern
Il nov edifizi sa chatta directamain sper la staziun da Tavau Plaz a la Talstrasse 2A / 2B / 2C. La Viafier retica SA ha mess a disposiziun in bain immobigliar en il dretg da construcziun. La construcziun e la finanziaziun è succedida tras la societad simpla Mainstation che sa cumpona da las duas firmas Zindel SA, Cuira e Sprecher Schneider Architektur SA, Tavau. Il chantun ha retratg sias localitads sin l'emprim e sin il segund plaunterren il cumenzament da mars. Sin il plaun sura sa chatta ina fatschenta da vendita e sin ils ulteriurs plauns sura abitaziuns.
Il stabiliment sa distingua tras ina moda da construcziun funcziunala e persistenta e tras ina furma cumpacta. La purschida da localitads da lavur che correspunda als basegns, l'avertura optimala sco er l'observaziun da grondas pretensiuns a la qualitad da la construcziun d'edifizis cun mirs exteriurs ch'èn isolads bain e cun la moda ecologica da construir (standard da Minergie-P®) furman la basa per in edifizi administrativ effizient e progressiv. Grazia a l'engaschament ed a la collavuraziun excellenta tranter la patruna da construcziun, ils utilisaders, ils planisaders, las interpresas e la Viafier retica SA han pudì vegnir cuntanschidas las finamiras dal project tant en quai che reguarda la qualitad, ils custs sco er ils termins.
Di da las portas avertas: venderdi, ils 12 d'avrigl 2013, vegn il center ad esser accessibel a la publicitad interessada, e quai da las 15.00 fin las 19.30. A las 17.00 suna la musica da polizia dal Grischun sin la plazza davant l'edifizi.