A Puschlav ha l'uffizi da construcziun bassa dal Grischun district 3 inaugurà oz uffizialmain la nova basa per il mantegniment da las vias e l'uffizi per il traffic sin via la halla da controlla

Il district 3 da l'uffizi da construcziun bassa dal Grischun è responsabel per il mantegniment da la rait da las vias chantunalas en la Val Puschlav. Da la basa per il mantegniment da las vias a Puschlav anora vegn garantì – cun totalmain 8 collavuraturs – il mantegniment manaschial ed architectonic da la via dal Bernina da circa 20 kilometers lunghezza e da la via da colliaziun tranter San Carlo e Campocologno da tut en tut er circa 20 kilometers lunghezza. Questa ultima via collia numerusas fracziuns cun l'axa principala. Medemamain vegn sustegnì il mantegniment da la via da colliaziun fin al cunfin da la Svizra (Forcola di Livigno).

Correspunder a las pretensiuns actualas
La basa existenta per il mantegniment da las vias en la zona d'abitar Prada na correspunda betg a las pretensiuns actualas, e quai areguard la grondezza, la realisaziun architectonica e l'equipament tecnic. Ultra da quai è sia utilisaziun restrenschida gia oz fermamain pervia da la pussaivladad d'access limitada (pais total max. 18 tonnas). I n'è betg pussaivel d'engrondir la basa en il territori d'abitadi. L'uffizi per il traffic sin via da sia vart controlla annualmain fin 1500 vehichels a Puschlav. Per quest intent ha el prendì a tschains ina garascha a San Carlo. Ma la pitschna halla correspunda mo parzialmain a las pretensiuns actualas, ed andaments da lavur effizients n'èn strusch pussaivels.

Tut sut in tetg
En il territori da Li Curt, sper la via chantunala, ha pudì vegnir acquistà in bain immobigliar adequat per construir ina nova basa. Sa basond sin il concept da gestiun e sin il program da spazi da l'uffizi da construcziun bassa sco er da l'uffizi per il traffic sin via è vegnì planisà in edifizi simpel ed adequat en lain. La realisaziun da l'ovra da construcziun ha durà in onn e mez. La halla da controlla, la halla da parcar per ils vehichels, las localitads da deposit sco er ils locals da segiurn e la gardaroba per ils collavuraturs èn unids sut in tetg. In deposit al liber ed in implant da silo per 250 meters cubic sal e per 125 meters cubic crappella sco er in implant da silo cun in volumen da 20 000 liters aua da sal cumpletteschan la purschida.

Nova basa moderna
Il stabiliment sa distingua tras ina moda da construcziun funcziunala e persistenta e tras furmas cleras. L'edifizi integral en lain ademplescha autas pretensiuns envers l'energia tenor il standard da Minergie e vegn stgaudà cun ina pumpa a chalur sin basa da l'aria. Ils 180 meters cubic lain ch'èn vegnids duvrads per construir il stabiliment derivan da la regiun. L'edifizi nov a Li Curt correspunda a las pretensiuns actualas envers ina basa moderna per il mantegniment da las vias e facilitescha als collavuraturs da l'uffizi da construcziun bassa la lavur quotidiana sin via. A medem temp pussibilitescha el andaments da lavur pli effizients er a l'uffizi per il traffic sin via. Grazia a l'engaschament ed a la collavuraziun excellenta tranter il patrun da construcziun, ils planisaders, las interpresas e las vischnancas han las finamiras dal project pudì vegnir cuntanschidas tant en quai che reguarda la qualitad, ils custs sco er ils termins.