Dacurt ha gì lieu a Silvaplauna in barat d'infurmaziuns concernent divers projects per lung da la via dal Malögia tranter Silvaplauna e Castasegna. Da l'occurrenza betg publica han fatg part var 35 partidas interessadas sco er il president da la regenza dr. Mario Cavigelli, schef dal departament da construcziun, traffic e selvicultura, e represchentants da l'uffizi da construcziun bassa dal Grischun.

En il focus da la discussiun è stà il traject da circa 3,5 kilometers da la via dal Malögia H3b tranter Segl Föglias e Plaun da Lej. Sin quest traject existan privels da la natira sco il privel da lavinas durant l'enviern e da crudadas da crappa durant la stad. Pervia da quai ha la via adina puspè stuì vegnir serrada durant ils trais decennis passads. Il matg 2016 ha il departament da construcziun, traffic e selvicultura (DCTS) dà en consultaziun in project general per mesiras stradalas cun l'intent d'augmentar la segirezza durant l'enviern. La consultaziun che ha gì lieu l'onn 2016, ha mussà che quest project na po betg vegnir approvà, cunzunt ord vista da la protecziun da la natira e da la cuntrada.

Projects focussads

Tenor la pratica dal chantun vegn fatga – per motivs da priorisaziun – ina categorisaziun tranter las differentas incumbensas da construcziun bassa che concernan la via. L'emprima prioritad ha en quest connex il mantegniment funcziunal sco il servetsch d'enviern. En segunda prioritad suonda il mantegniment da la substanza stradala existenta. La terza prioritad ha la renovaziun dals trajects che na satisfan betg anc a las pretensiuns d'ozendi. E la quarta prioritad han la finala la planisaziun e la realisaziun da projects gronds, sco per exempel sviaments. Sin basa da questa pratica èn las persunas preschentas sa cunvegnidas a la suandanta priorisaziun:

1. Funcziunament da la via dal Malögia: Il funcziunament vegn garantì. Quai pertutga en spezial il servetsch d'enviern. Ultra da quai vegni sclerì, sch'igl è pussaivel da reducir il temp che la via è serrada. Quai cun utilisar novas tecnologias, per exempel cun applitgar pitgas per siglientar lavinas.
2. Renovaziun dal traject existent tranter Silvaplauna e Segl (inclusiv dus vials da velo) sco er da las stortas existentas da la via dal Malögia (Kulm fin Val da Pila): La renovaziun vegn realisada.
3. Project per la protecziun cunter privels da la natira sin il traject Segl Föglias fin Plaun da Lej: Il project vegn elavurà vinavant. Per quest intent vegn nominada ina gruppa da lavur paritetica che sa cumpona da represchentantas e represchentants da la regiun pertutgada, da las organisaziuns da l'ambient e dals posts chantunals spezialisads. Manada vegn la gruppa da lavur da l'uffizi da construcziun bassa dal Grischun. La finamira è quella da chattar per quest traject valurs directivas per ina soluziun che cuntenta e che po vegnir sustegnida da tut las gruppas d'interess. L'elavuraziun d'in project che chatta in consens dovra però intgin temp.

Independentamain da quai vegn elavurà il project per la via chantunala en il rom da la reconstrucziun e da la protecziun da Bondo.