Raits socialas localas, sco lieus d'inscunter, suentermezdis da dar gieus, agid da buna vischinanza u curs, porschan a persunas attempadas occasiuns da sa participar a la vita en il vitg ed en il quartier. Cun il project «Vegliadetgna e contacts locals» sustegna il Post spezialisà per la promoziun da la sanadad las vischnancas da crear talas structuras ensemen cun la populaziun, quai per garantir in engaschament a lunga vista.

En la vischnanca dad Ilanz/Glion vivan actualmain var 1400 persunas sur 65 onns. Cun la finamira da rinforzar la cuminanza, da promover raits tranter las senioras ed ils seniors che vivan en las differentas fracziuns sco er da reducir l'isolaziun, ha la vischnanca lantschà il schaner 2023 in process da cooperaziun. Ensemen cun la populaziun da 65+ e cun las organisaziuns che lavuran cun persunas attempadas, èn vegnids elavurads il basegn d'agir ed in plan da mesiras. Realisadas vegnan las ideas da project da gruppas da lavur che consistan da senioras e seniors. Per exempel èn resultads da questas ideas in chor regiunal sco er suentermezdis da dar gieus ed inscunters a maisas radundas, che han lieu regularmain.

Cun la terminaziun dal project il schaner 2025 cumenza la fasa da francar duraivlamain las purschidas. D'ina vart duain las purschidas ch'èn vegnidas iniziadas en il rom dal project «Vegliadetgna e contacts locals» vegnir cuntinuadas, da l'autra vart èn planisadas mesiras supplementaras. Uschia vul ins organisar in forum annual «Alter/Vegliadetgna», introducir gruppas da project davart temas relevants en la vegliadetgna e montar placats e tavlas d'infurmaziun en las fracziuns.

Las vischnancas che vulan crear u extender raits socialas per las abitantas ed ils abitants attempads, vegnan accumpagnadas e sustegnidas dal Post spezialisà per la promoziun da la sanadad.

Link

• Project «Vegliadetgna e contacts locals»