Ils papillomavirus umans (HPV) vegnan transmess tras l'act sexual e chaschunan variclas en las genitalias. Ins stima che pli che 70 % da las persunas ch'èn activas sexualmain s'infecteschian cun quests virus en il decurs da lur vita. En intgins cas pon las pels mucosas infectadas degenerar cun il temp e chaschunar emprimas fasas da cancer u cancer. Quai pertutga particularmain il culiez da l'uterus, dentant er l'anus, il penis, il sectur dal culiez e da la gula ed autras pels mucosas ch'èn vegnidas en contact cun il virus HPV.
Vaccinaziun cunter ils papillomavirus umans
La vaccinaziun cunter HPV protegia cunter ina infecziun cun HPV, e pia er cunter ina malsogna da cancer posteriura pervia da HPV. Il niz è il pli grond, sche la vaccinaziun vegn dada avant l'emprim act sexual, pia avant ch'i possia dar ina infecziun. Il vaccin Gardasil 9® ch'è actualmain disponibel protegia cunter 9 tips da virus da HP. La vaccinaziun protegia er, sch'ins sa lascha vaccinar suenter ch'ins ha gia gì acts sexuals e sch'ins è eventualmain gia infectà cun HPV. Ella na protegia dentant betg pli cunter quel tip da HPV, cun il qual ins è infectà, dentant cunter tut ils auters tips.
Differents studis a cundiziuns da mintgadi han mussà, che Gardasil-9® è ina vaccinaziun fitg segira. Eventuals effects secundars èn per il pli miaivels e da curta durada. La WHO classifitgescha la vaccinaziun cunter HPV sco fitg segira, quai suenter la consultaziun da las datas che stattan a disposiziun davart 270 milliuns dosas dal vaccin dadas sin l'entir mund e suenter la realisaziun da differentas analisas internaziunalas concernent las ristgas potenzialas (rapport dal Global Advisory Committee da la WHO, 2017, Safety (who.int)).
La vaccinaziun cunter HPV vegn recumandada a tut ils giuvenils en la vegliadetgna dad 11 fin 15 onns. Tgi che l'ha manchentada, la po prender suenter fin a la vegliadetgna da 26 onns. Ina vaccinaziun en il rom dals programs chantunals da vaccinaziun cunter HPV è gratuita en il chantun da domicil.
La vaccinaziun è facultativa. Vossa media u Voss medi respunda gugent Vossas dumondas.
Nua poss jau ma laschar vaccinar gratuitamain?
Per la vaccinaziun consultai ina media u in medi dal program da vaccinaziunqua u fixai online in termin sut https://www.onedoc.ch/de/humane-papillomaviren-impfung-hpv-gebarmutterhalskrebsimpfung/kanton-graubunden
La vaccinaziun è gratuita
• per persunas en la vegliadetgna dad 11 fin 26 onns (q.v.d. dal 11avel anniversari fin avant il 27avel anniversari) che
• abitan en il chantun Grischun, e che
• sa laschan vaccinar tar ina media u in medi dal program da vaccinaziun (link guarda sura).
Il program da vaccinaziun chantunal
Per far la vaccinaziun cunter ils papillomavirus umans HPV cuntinuescha il chantun Grischun cun il program da vaccinaziun existent en il senn da l'art. 12a OPM. Vaccinads duain vegnir mattas e mats en la vegliadetgna dad 11 fin 15 onns e dunnas ed umens giuvens fin 26 onns tenor il Plan da vaccinaziun svizzer da l'Uffizi federal da sanadad publica (UFSP) e da la Cumissiun federala per vaccinaziuns (CFV).
Program qua
Brev d'infurmaziun qua
Infurmaziuns per medias e medis
Per la participaziun al program da vaccinaziun cunter HPV ston las medias ed ils medis sa registrar ordavant tar l'Uffizi da sanadad, guardar decleraziun da participaziun qua
Dumandar il formular d'empustaziun per Gardasil® 9: sut info@san.gr.ch
Modalitads da rendaquint: guardar decleraziun da participaziun
Model d'ina decleraziun da consentiment per pazientas e pazients qua
Ulteriuras infurmaziuns davart HPV e davart la vaccinaziun
• Cancer e variclas genitalas: Ta protegia avant che ti has l'emprima giada sex! Vaccinaziun cunter HPV per giuvenils. Broschura d'infurmaziun dal UFSP per giuvenils
• Videos davart la vaccinaziun HPV (chantun Son Gagl): https://www.sg-impft.ch/hpv-impfung
• Papillomavirus umans (HPV) (admin.ch)
• Malsognas da cancer e variclas genitalas chaschunadas da HPV, Factsheet dal UFSP
• hpv_info.ch (Instagram), https://www.hpv-info.ch/ (dal producent dal vaccin cunter HPV)
• Vaccinaziuns per giuvenils (admin.ch)
• INFOVAC - La plattafurma d'infurmaziun davart vaccinaziuns en Svizra
• Plan da vaccinaziun svizzer (admin.ch)
• Infecziuns transmissiblas sexualmain (admin.ch)