L’uffanza e la giuventetgna porschan grondas schanzas per la sanadad – lain prender quellas! Quai è la maxima en il Manifest per la sanadad dad uffants e giuvenils. Ina gronda part dal mintgadi passentan uffants e giuvenils en scola. Els emprendan materia da scola, els emprendan oravant tut per la vita. Il temp da scola è marcant, en nagina perioda da la vita n’è la promoziun da la sanadad uschè effizienta e persistenta ed economicamain uschè raschunaivla sco durant l’uffanza e la giuventetgna. La scola ha in posiziun-clav tar la promoziun da la sanadad. In bun clima da scola contribuescha essenzialmain a la promoziun da la sanadad. 

Il chantun Grischun s’engascha per l’accessibilitad da la promoziun da sanadad e da la prevenziun per tut ils uffants, las persunas d’instrucziun, las direcziuns da scola ed ulteriuras persunas spezialisadas activas en scola. Il potenzial per la promoziun da la sanadad en il plan d’instrucziun 21 duai vegnir realisà. Enconuschientschas scientificas ed experientschas da la pratica en las scolas durant ils davos 10 fin 15 onns mussan correlaziuns impurtantas tranter furmaziun e sanadad. La qualitad da l’instrucziun e cun quai la motivaziun d’emprender da las scolaras e dals scolars stat en stretga relaziun cun la sanadad e la vitalitad sco era cun l’entusiassem da las persunas d’instrucziun e cun la qualitad da la relaziun scolast-scolar.

La qualitad da l’instrucziun è centrala per il success da furmaziun. Direcziuns da scola saunas e motivadas contribueschan essenzialmain al clima da scola. La participaziun da scolas a la rait da scolas21 vegn perquai promovida da maniera activa.