Il cumenzament da l'onn ha la Polizia chantunala dal Grischun instruì var 140 persunas creschidas cun impediments che abitan e lavuran en il Plankis u che vegnan d'ordaifer. Temas èn ils privels en l'internet e co ch'ins sa protegia da quels.

Cura che Beat Marugg dal post spezialisà Prevenziun arriva en il Plankis, spetgan las participantas ed ils participants dal curs gia plain plaschair sin el. A la classa per l'instrucziun «Segir en l'internet» participeschan quest avantmezdi nov persunas. Beat Marugg chapescha da communitgar cun las participantas ed ils participants sin il medem nivel e da stgaffir in'atmosfera d'emprender plain confidenza. El dovra blers maletgs. Cun in sistem d'amplas bain chapaivel renda el attent a privels pussaivels en l'internet.

Las participantas ed ils participants dovran las apps che Beat Marugg menziunescha. Ellas ed els emprendan, tge fotografias che pon senz'auter vegnir tramessas ad autras persunas, tar tgeninas ch'ins sto far attenziun e tgeninas che la lescha scumonda da derasar.

En las discussiuns davart reglas en il mintgadi e pleds-clav per il telefonin discurran las persunas preschentas er gugent davart lur furmas d'abitar, lur famiglias e lur lavur en la floristica, en la pasternaria, en la cuschina u en il lavuratori, nua ch'i vegn lavurà cun lain. Lur persunas d'assistenza giogan ina rolla impurtanta per ellas.

«Jau blochesch tut ils messadis da WhatsApp englais» u «Jau fatsch attenziun, tge fotografias che jau tramet vinavant» èn intgins parairis davart quai ch'è vegnì emprendì durant l'instrucziun. «Guardai er bain in da l'auter e discurrì in cun l'auter», di Beat Marugg a la fin davart il tema mobing, perquai che «gidar fa plaschair e po stgaffir amicizias».