En il chantun Grischun èn la Lescha da polizia e l'Ordinaziun da polizia en vigur dapi il 1. da fanadur 2005. Ellas èn vegnidas revedidas parzialmain l'ultima giada per il 1. da schaner 2019. Ensemen cun in team da redacziun ha il vicecumandant da la Polizia chantunala, Gianfranco Albertini, commentà la lescha e l'ordinaziun. La 2. ediziun da l'ovra è cumparida l'onn 2022 tar la chasa editura Schulthess (sco cudesch inclusiv e-book). L'ovra sa drizza tant a persunas che tschertgan dretg sco er a polizistas sezzas ed a polizists sezs.

Agir sco polizista u polizist vul dir: far valair il dretg. L'orientaziun da la polizia al dretg è indispensabla per ina chapientscha da la polizia sut l'aspect dal stadi da dretg. L'ovra da standard declera ils princips da las cumpetenzas sco er dal dretg organisatoric da la polizia a maun dal dretg da polizia grischun. La preschentaziun è cumplessiva ed actuala e cuntegna exempels pratics. L'accent è mess sin l'agir da polizia e resguarda ils puncts cuminaivels dal dretg da polizia e dal dretg da procedura penala.

Il manual è vegnì recensà en circuls spezialisads (Sven Zimmerlin, Jürg Marcel Tiefenthal, en «Sicherheit & Recht», 2/2022, pagina 132 ss.). Sin nivel naziunal vala el sco ovra da standard per il dretg da polizia.