Il cumenzament d'october 2023 ha gì lieu a Clavenna (I) il segund bloc d'instrucziun da las patruglias maschadadas. Per l'emprima giada era questa instrucziun vegnida realisada l'onn 2019 a Poschiavo.
La basa da l'activitad transcunfinala da las patruglias furma la Cunvegna davart la cooperaziun tranter las autoritads da polizia e da duana tranter l'Italia e la Svizra, ch'è vegnida suttascritta ils 14 d'october 2013 a Roma. La finamira da l'instrucziun a Clavenna èn stadas la scolaziun e la furmaziun supplementara da passa 70 carabinieri, d'appartegnents da l'Uffizi federal da la duana e da la segirezza dals cunfins (UDSC) sco er da las Polizias chantunalas dal Tessin e dal Grischun. Ensemen opereschan questas instituziuns en constellaziuns alternantas en il territori da cunfin Italia – Svizra e stgaffeschan uschia in spazi da segirezza cuminaivel.
La Polizia chantunala dal Grischun fa part dals corps da polizia al cunfin sid, che fan en diversas constellaziuns controllas ensemen cun collegas talians da la Polizia di Stato, cun ils carabinieri, cun la Polizia austriaca e cun il UDSC. Ina chapientscha cuminaivla ed ina instrucziun communabla furman la basa da questa collavuraziun.
«La populaziun appreziescha nossa preschientscha e nossa lavur dad omaduas varts dal cunfin e senta che ses sentiment da segirezza daventa pli ferm» uschia ina da las persunas responsablas da la Polizia chantunala dal Grischun, che mantegna la colliaziun cun las instituziuns partenarias menziunadas. «Suenter l'emprim bloc d'instrucziun l'onn 2019 a Poschiavo (Link a la communicaziun da medias) ed a Schlanders (I) pon ussa vegnir integrads cun quest nov bloc ulteriurs collavuraturs en questa collavuraziun legraivla», terminescha el sias explicaziuns.