En il film documentar davart chauns da professiun da la Televisiun Rumantscha (RTR) han Anouk e ses possessur Patrick Maridor giugà ina rolla impurtanta. Il film ha preschentà la lavur cun chauns da terapia, cun chauns da salvament, cun chauns da lavina e cun chauns da polizia. Mez favrer a chaschun d'ina matinée è stada la premiera dal film a Cuira.
Patrick Maridor, il manader da chauns rumantsch, è sa mess a disposiziun per il project da film ensemen cun Anouk, ses chaun-nurser beltg da la razza Malinois, che ha 10 onns. Ensemen han els fatg la scolaziun da chaun da protecziun sco er da chaun detectur da materias explosivas. En la contribuziun tschertga Anouk materias explosivas, armas e muniziun. Per quai dovra il chaun in bun nas.
Il team da film dad RTR ha accumpagnà Patrick Maridor e ses chaun al curs da repetiziun dal consorzi da trenament per chauns detecturs da materias explosivas en il chantun Son Gagl ed ha dastgà passentar là dis intensivs da filmar. Resultadas èn registraziuns grondiusas.
L'incumbensa da Hansjörg Sax, il schef dals manaders da chauns da la Polizia chantunala dal Grischun, è quella «da cliccar», cura ch'il chaun ha chattà l'object zuppà. «Quai è la conferma per il chaun, ch'el ha lavurà correctamain», declera el en il film, «il chaun na sa numnadamain betg, nua ch'il material explosiv è zuppà.»
Anouk ha chattà la corda da siglientar ch'era zuppada en l'auto e survegn per la paja ses giugaret, ina liongia da morder da stoffa. «Il chaun da polizia dovra ina tscherta fermezza da caracter», declera Maridor en il film, «el sto pudair prestar chaussas extraordinarias.»
Suenter la collavuraziun prosperaivla e fidada survegn Anouk la charsinada ch'ella ha merità.
Il manader da chauns Patrick Maridor e la producenta dal film Menga Huonder-Jenny a chaschun da la premiera dal film en il kino Apollo a Cuira.
Link al film