L'onn passà ha la Polizia chantunala dal Grischun concepì ina nova campagna da reclama per la professiun da polizista u da polizist. Ina gruppa da project interna per marketing e recrutaziun da persunal ha rimnà ils basegns da las collavuraturas e dals collavuraturs e sviluppà silsuenter ina strategia innovativa per far reclama per la professiun da polizista u da polizist. La finamira èsi da preschentar cun in design nov e modern la Polizia chantunala dal Grischun sco patruna attractiva e da mussar uschia las differentas professiuns entaifer la polizia e las pussaivladads multifaras da far carriera.

Dapi il zercladur 2024 è la nova pagina d'internet jobs.kapo.gr.ch online. Ella preschenta ils champs professiunals da la Polizia chantunala dal Grischun ed infurmescha davart la via per daventar polizista u polizist. Sut il slogan «Perquai che questa professiun va a prà cun mia vita» vegnan lantschadas campagnas da reclama en las medias socialas sco er en maschinas da retschertga.