En il rom dal PSR ha la Regenza concedì il favrer 2021 (cf. communicaziun da la Regenza dals 4 da favrer 2021) ed il
favrer 2023 (cf. communicaziun da la Regenza dals 23 da favrer 2023) contribuziuns chantunalas per la senda da viandar a lunga distanza «Parc Ela Trek». Questa senda duai ussa vegnir engrondida cun dus ulteriurs projects parzials, numnadamain il «Agroturissem Aclas Dafora» ed il «Bed & Breakfast (B&B) Chesa sut Baselgia Stugl». La planisaziun oriunda dal Parc Ela Trek cumpigliava 18 etappas cun in lieu d'etappa previs sin l'Alp Sanaspans. Cunquai che quest lieu d'etappa na porscha naginas pernottaziuns pli, ha la ruta stuì vegnir scursanida. Empè da viandar da l'Alp Sanaspans al vitg dal Parc Ela Lantsch, finescha il trek cun la 17. etappa en la destinaziun da vacanzas Lai. Cun la chamona Aclas Dafora ad Alvagni po ussa puspè vegnir realisà il traject da la ruta cun 18 etappas sco ch'igl era planisà oriundamain. La chamona existenta sto vegnir sanada cun in engrondiment minimal en la part da la stalla. Planisadas èn 16 plazzas da durmir, divididas en duas chombras da durmir. L'agroturissem vegn manà en l'avegnir sco chamona d'autoprovediment. Per l'alimentaziun vegnan vendids products da l'atgna butia dal bain puril, chaschiel d'alp da las alps vischinas sco er products mezfinids da trekking che vegnan sviluppads e producids en il rom dal PSR Parc Ela Trek ed en collavuraziun cun il PSR Genusswelt.