Analisas da l'aua da baiver è il gener d'emprovas il pli frequent. En l'analitica da rutina pon ins distinguer tranter analisas chemicas ed analisas bacteriologicas.

Las analisas chemicas dattan infurmaziuns davart las qualitads chemicas e fisicalas da l'aua. Tar quellas tutgan p.ex. parameters sco la direzza da l'aua, il pH, il cuntegn da nitrat e d'ammonium, il carbon organic total (COT) e la conductivitad.

En connex cun l'analisa bacteriologica da l'aua da baiver vegnan tschertgs en emprima lingia uschenumnads scherms indicaturs ch'èn avant maun en moda natirala en las fecalias dals umans e dals animals. Sche quests scherms èn cuntegnids en l'aua da baiver, mussa quai che l'aua è smerdada tras fecalias. Tals scherms indicaturs èn la spezia da bacterias escherichia coli (E. coli) e la gruppa da bacterias da las enterokokkas, perquai ch'els èn cuntegnids fitg concentradamain en il passacorp. Sche talas bacterias èn cuntegnidas en l'aua da baiver, è quai inquietant, er sche p. ex. e.coli sez n'è betg infectus. Lur existenza mussa ch'igl è avant maun ina impestaziun microbiala e serva sco indicaziun che l'aua possia cuntegnair scherms infectus.

Ultra da questas analisas da rutina realisain nus er numerusas analisas spezialas. La determinaziun da metals grevs, il diever dad aua per far beton, l'existenza dad erbicids sco atracin èn mo trais exempels.