DLa visiun è noss mussavia. Vi dad ellla s'orientescha il Plantahof, sch'i vegnan planisads e realisads pass da svilup.
La visiun includa la filosofia da basa. Il Plantahof vul, sco center renconuschì per scolaziun e perfecziunament progressiv,
agir sco lieu d'inscunter interessant e profitaivel tranter la populaziun purila e betg purila.

Il Plantahof è il center da cumpetenza e patria emoziunala per umans en il territori rural

Sin questa visiun sa basa il model directiv. Il model directiv sa restrenscha ad ina frasa essenziala expressiva per mintga sectur da fatschenta.
Quellas frasas centralas laschan spazi per interpretaziuns, cuntegnan ina certa ambiguitad e stgaffeschan qua tras ina tensiun che intimescha da reflectar.

Experientscha d'emprender Plantahof

Emprender al Plantahof na vul betg mo dir da sa metter sin via per daventar spezialist, mabain er da lavurar vi dal svilup da l'atgna persunalitad.
Tgi che tscherna la scolaziun agricula, sa decida per ina scolaziun vasta e pratica.
Parallelamain a la scolaziun pratica sin il manaschi d'emprendissadi ha lieu la furmaziun teoretica ed orientada a l'acziun.
La scolaziun ha lieu al Plantahof. Questa scolaziun promova la chapientscha da connexs tranter ils secturs economics, ecologics, politics e culturals.
La movibladad mentala e la creativitad duain vegnir promovidas gist uschè sco l'autonomia e l'abilitad da lavurar en in'equipa.
Solidaritad tranter las famiglias purilas e la cooperaziun cun l'ulteriura populaziun d'ina vallada èn cleras finamiras da la scolaziun.
La furmaziun da basa da dus onns maina al Certificat professiunal federal (CPF), l'emprendissadi da trais onns a l'Attestat federal da qualificaziun (AFQ).
Suenter la furmaziun fundamentala porscha il Plantahof differentas pussaivladads da furmaziun supplementara.
Tgi che vul sa preparar per manar l'agen manaschi agricul frequenta la scola da manadra/manader da manaschi.
Tgi che vesa ses avegnir en ils secturs da servetsch precedents e posteriurs a l'agricultura po metter il fundament per il success professiunal cun la scola spezialisada superiura per agrotecnica.
En il curs avert per puras pon las persunas interessadas acquistar enconuschientschas professiunalas cumplessivas e terminar la scolaziun cun l'examen professiunal superiur.

Viver meglier grazia a la furmaziun supplementara

Ultra a la preparaziun per l'examen da professiun e da maister porscha il Plantahof mintg'onn var 70 curs da perfecziunament d'in u plirs dis, sco p.ex. d'economia d'alp u tratga da chauras.
Ils curs da furmaziun supplementara intermedieschan infurmaziuns actualas ed enconuschientschas las pli novas. Il barat d'ideas cun collegas da professiun sco er l'extensiun da l'orizont stimulanta rinforzan il sentiment da cuminanza e la cunscienzia da l'atgna valur. L'experientscha da percepir il preschent sapientivamain a moda positiva e da pudair giudair la vita emplaina mintgin cun ina nova energia da viver.

Tar nus ha il progress tradiziun

La cussegliaziun agricula Plantahof rinforza la situaziun economica e sociala da las famiglias purilas.
Grazia a la francaziun tradiziunala en las regiuns ed a la squadra dal Plantahof purschain nus cussegliaziuns cumplessivas en tut ils secturs da l'agricultura e da l'economia da chasa purila.
Ultra da tractar dumondas da l'economia da manaschi e da la tecnica da producziun sa deditgeschan ils spezialists dal Plantahof a projects innovativs per purtar vinavant las regiuns e l'agricultura en lur svilup economic. 

Tar nus na manchentais Vus betg la connexiun

DIl center da dietas sa chatta en in ambient idillic e rural. La Val dal Rain grischuna cun siu excellent clima (530 m s.m.) è in punct da partenza ideal per far excursiuns en tut las regiuns dal Grischun e la Svizra orientala.
Cuira, la citad la pli veglia da la Svizra, è cuntanschibla en curt temp cun ils meds da transport publics.
Las localitads e las stanzas da seminari dal Plantahof porschan in'atmosfera empernaivla e varianta per habitar ed emprender.
Il team da gastronomia pupragna ils osps cun products ch'èn per gronda part d'atgna producziun, preparads frestgs e da stagiun.
Cun las tratgas variantas vegnan servids most dultsch convenziunal or da l'agen curtin da puma u vins d'aut nivel da la vigna dal Plantahof.

Vitrina da nossa professiun

Il manaschi da scolaziun, d'emprovas e da demonstraziuns è multifar e resguarda tut ils tips da producziun.
El serva als basegns da la furmaziun e da la cussegliaziun e vul maximar il niz per la pratica agricula.
L'allevament da la razza Brina fa part da la tradiziun e serva sco vitrina per l'allevament svizzer da muvel da latg.
Differentas strategias e direcziuns da producziun vegnan scuvridas e las experientschas cun il muvel da prà e da
prestaziun portan enconuschientschas interessantas per l'instrucziun e la cussegliaziun da las puras e dals purs.
Las innovaziuns en la tratga da biestga manidla sveglian l'interess da bleras allevaturas ed allevaturs d'animals manidels.
La buna qualitad da la cultivaziun da pavel e dad ers furma la basa per prestaziuns effizientas.
Al Plantahof vegnan tegnidas vatgas da latg, vatgas-mamma Limousin, chauras stralas, nursas Lacaune, nursas alvas da las Alps, giaglinom ed avieuls.
Er la tratga d'avieuls succeda tenor las directivas da l'agricultura biologica. Ils lieus da manaschi "Plantahof Ganda" e "Plantahof Waldhaus" èn manaschis da bio.
Sin il bain da muntogna "Plantahof Parpan" stattan l'economia d'alp e la chascharia d'alp, manada da la cooperativa "Alpkäserei Parpan", en il center.
Durant tut l'onn èn las portas da la stalla avertas. Ina visita vala la paina per pitschen e grond.
La pumicultura, la cultura da pumaraida e la viticultura cumpletteschan nossa gronda paletta da secturs da menaschi ed enritgeschan la purschida da las butias dals dus bains purils a Landquart ed a Cuira.

Or dal corn da l'abundanza da la natira

La raffinaziun dals products e la commerzialisaziun directa daventan adina pli impurtantas.
Chaschiel d'alp, tschigrun, paintg d'alp, jogurt, chaschiel-chaura, latg-nursa, mel d'avieuls,
andutgel, liongias da chasa, pulpa bletscha (mostbröckli) e charnpiertg, ovs, pumaraida, nuschs e fritga,
verdura e tartuffels sco er vin e spirituosas èn delicatessas per nas fins.
Tut ils products pon ins cumprar en ils negozis da vin a Landquart e Cuira u en il tschaler da vin.