Il chantun Grischun promova purschidas davart l'integraziun sociala e professiunala da persunas cun impediments. Nossas finamiras:

• Ina purschida suffizienta per assister persunas cun impediments.
• Ils basegns da las persunas cun impediments stattan en il center da las purschidas.
• Il chantun impunda ils meds finanzials che stattan a disposiziun en moda effizienta.

Analisa dals basegns e planisaziun da la purschida

Il chantun fa in'analisa dals basegns ed ina planisaziun da la purschida. L'analisa dals basegns respunda tranter auter las suandantas dumondas: Quantas persunas cun impediments dovran ina purschida d'assistenza? Tge tip d'impediment han ellas? Tge purschida dovran ellas?

Cun agid da questas indicaziuns planisain nus la purschida generala chantunala. En la planisaziun chantunala da la purschida fixain nus tge purschidas e quantas plazzas che vegnan messas a disposiziun e finanziadas.

Qualitad

Il chantun definescha pretensiuns da qualitad per l'assistenza da persunas cun impediments. Tut las instituziuns ed organisaziuns che assistan persunas cun impediments ston ademplir quellas. Tras las pretensiuns qualitativas duain vegnir garantidas la protecziun, l'integritad e l'observaziun dals dretgs da persunas creschidas cun impediments. Lur qualitad da viver e lur cuntentientscha vegnan promovidas.

Permissiun e surveglianza

Persunas cun impediments dovran savens accumpagnament ed assistenza. Ellas han ina relaziun da dependenza cun las purschidras ed ils purschiders d'assistenza. Perquai datti prescripziuns qualitativas e finanzialas per las purschidras ed ils purschiders. Il chantun conceda ad ellas ed els ina permissiun, sch'ellas ed els adempleschan las pretensiuns. En il rom da la surveglianza controlla il chantun regularmain l'adempliment da las pretensiuns.

Finanziaziun

Il chantun finanziescha las purschidas en moda transparenta, cumparegliabla ed orientada a las prestaziuns. Per quest intent fa el incaricas da prestaziun cun las purschidras ed ils purschiders.

Cussegliaziun

Il chantun cusseglia las furnituras ed ils furniturs da prestaziuns ad installar ed a manar purschidas d'assistenza per persunas cun impediments.