La tgira adequata e professiunala da tut las documentaziuns multifaras d'exchavaziuns (fotografias, plans, dissegns, diaris, glistas e.u.v.) en furma analoga ed adina pli savens en furma digitala è ina incumbensa essenziala dal servetsch archeologic che daventa adina pli cumplexa dapi sia fundaziun l'onn 1967. Per conservar er en il futur tut las infurmaziuns da l'ierta archeologica dal chantun Grischun èn vegnidas fatgas l'atun 2013 grondas lavurs da migraziun e d'implementaziun da novas applicaziuns da banca da datas (banca da datas per documents e per maletgs) Imdas Pro und Imagic Ims. Il chantun Grischun maina quest project da banca da datas, che chaschuna gronds custs, ensemen cun ils posts spezialisads per l'archeologica dals chantuns Turitg e Turgovia sco er dal principadi da Liechtenstein.

Archiv communal
En l'archiv communal èn deponids sin palpiri per mintga vischnanca dal Grischun tut las annunzias da chats, tut las actas, tut las disposiziuns, tut ils protocols e tut ils documents d'ina exchavaziun. 

Archiv dals plans
Ultra dals plans da survista e dals plans da detagl che derivan d'ina activitad d'exchavaziun da prest 100 onns en il chantun Grischun, cuntegna l'archiv dals plans numerusas vistas istoricas e numerusas chartas. 

Archiv da fotografias
Ultra da las fotografias dals resultats e dals chats vegnan inventarisadas fotografias istoricas da plazzas d'exchavaziun, fotografias or da l'aria e diapositivs en colur u copias en alv e nair da chats cumparegliabels or d'autras regiuns. 

Archiv dals chats
Ils emprims chats archeologics ch'èn enconuschents èn vegnids fatgs en il Grischun il 19. tschientaner. Oz cumpiglia l'inventari passa 100 000 objects, dals quals la gronda part è deponida en il local da protecziun per bains culturals a Haldenstein. Numerus chats èn elements da l'exposiziun permanenta al museum retic a Cuira (Rätisches Museum, Dauerausstellung Funde und Befunde).

Archiv digital dals lieus da chat
Dapi passa 10 onns dispona il servetsch archeologic dal Grischun dad applicaziuns da banca da datas digitala – a partir da l'atun 2013 dal Imdas-Pro sco product successur da SPATZ – cun las qualas vegnan administrads tut las exchavaziuns novas, tut ils lieus da chat e chats novs sco er tut las datas specificas en moda professiunala e centrala. La finamira dals proxims onns vegn ad esser quella d'implementar successivamain en questas bancas da datas er l'archiv communal analog existent inclusiv tut las exchavaziuns veglias, per segirar duraivlamain tut las infurmaziuns dal patrimoni archeologic dal Grischun.