Actualitads

Scola media d'informatica cun AFQ informaticra u informaticher e maturitad professiunala

A partir da l'onn da scola 2025/26 vegn introducida da nov en il chantun Grischun la scola media d'informatica sco scolaziun dal stgalim secundar II. La nova scolaziun vegn purschida da la Scola chantunala grischuna a Cuira sco er dal Center da furmaziun Surselva a Glion.

La scola media d'informatica cumbinescha ina scolaziun en il sectur dal svilup d'applicaziuns ch'è orientada a la professiun, cun ina vasta savida generala. Ella suonda sin la terza classa dal stgalim secundar I e maina suenter 4 onns a l'attestat federal da qualificaziun informaticra u informaticher AFQ en la direcziun specifica svilup d'applicaziuns sco er a la maturitad professiunala da la direcziun economia e servetschs, tip economia.

La scolaziun sa drizza a scolaras e scolaras cun bunas prestaziuns che han in grond interess per informatica ed economia e per ils roms da furmaziun generala. Ella è dividida en ina furmaziun scolastica da 3 onns ed en in praticum professiunal dad 1 onn.

Durant ils emprims 3 onns da la scolaziun frequentan las scolaras ed ils scolars l'instrucziun a temp cumplain en la scola media d'informatica. Sco cumplettaziun da la scolaziun pli profunda en informatica ed en ils roms d'economia (finanzas e contabilitad, economia e dretg) porscha la scola media d'informatica a las scolaras ed als scolars ina paletta da roms da furmaziun generala, particularmain en ils secturs linguas, matematica e scienzas natiralas sco er scienzas umanas e socialas. L'instrucziun professiunala en informatica duai vegnir fatga en collavuraziun cun la Scola professiunala artisanala Cuira sco er cun l'Uniun per promover las professiuns d'electronica e d'informatica a Landquart (curs intermanaschials). Ils detagls da questa cooperaziun ston dentant anc vegnir reglads da las novas scolas medias d'informatica en il rom da las preparativas per il cumenzament da la scolaziun a partir da l'onn da scola 2025/26.

Attestat da qualificaziun informaticra u informaticher AFQ e maturitad professiunala

Suenter 3 onns, a la fin da l'instrucziun en scola, fan las scolaras ed ils scolars ils examens finals da la maturitad professiunala. Durant il quart onn survegnan las scolaras ed ils scolars l'occasiun d'applitgar en moda pratica en in manaschi, quai ch'ellas ed els han emprendì, e d'approfundar lur enconuschientschas. A la fin dal quart onn da scolaziun sto vegnir fatga – cun sustegn dal manaschi da praticum entaifer circa duas emnas – ina lavur pratica individuala (LPI) che sto suenter vegnir preschentada. La LPI vala sco examen pratic per obtegnair il AFQ informaticra u informaticher.

Las absolventas ed ils absolvents da la scola media d'informatica han bleras pussaivladads. La maturitad professiunala pussibilitescha l'admissiun senza examen ad ina scola auta spezialisada u, sur in examen da passarella, ad ina scola auta universitara u a la Scola politecnica federala (SPF). Cun il AFQ exista plinavant la pussaivladad d'entrar en moda productiva directamain en il mund da lavur ed en cas da basegn da far in ulteriur perfecziunament cun in examen professiunal federal u cun in diplom d'ina scola professiunala superiura.

Cundiziuns d'admissiun sco per la scola media spezialisada e commerziala

Per entrar en ina scola media d'informatica èsi da percurrer ina procedura d'admissiun tenor las disposiziuns da l'Ordinaziun davart la procedura d'admissiun a las scolas medias (Ordinaziun d'admissiun a las scolas medias; DG 425.060). Per scolaras e scolaras dal Grischun cumpiglia questa procedura d'admissiun in examen d'admissiun chantunal (examen unifitgà). Per scolaras e scolars da la segunda classa da la scola secundara vegnan resguardadas er las notas d'attestat da l'emprim semester per la decisiun d'examen.