La scola media commerziala (SMC) è ina scolaziun a temp cumplain pretensiusa dal stgalim secundar II. Il studi vegn terminà cun l’attestat federal da qualificaziun da commerziant e la maturitad professiunala reconuschida da la Confederaziun cun il tip economia. Questa scolaziun vegn reconuschida dal secretariat dal stadi per furmaziun e perscrutaziun (SFP).

Noss absolvents e nossas aboslventas han cun quai la pussaivladad

• d’entrar en ina scola auta spezialisada federala senza examen.
• d’entrar directamain en la vita professiunala.
• da visitar la scolaziun da passarella per maturand(a)s professional(a)s per las scolas autas spezialisadas ed universitads.

La scola media commerziala cun la maturitad professiunala s’adressa a giuvenils, che vulan cuntinuar d’ir a scola suenter la scola secundara, che vulan colliar la teoria e la pratica e che san s’imaginar da cuntinuar lur furmaziun sin il nivel da scolas autas.

Nus purschain temas centrals sin in nivel da scola media, sco p.ex. economia e dretg, finanzas e contabilitad. Ultra da quai offra la SMC ina vasta furmaziun generalcun in focus sin linguatgs, istorgia, politica sco era tecnica ed ambient sco basa per la furmaziun professiunala.

La part principiala da la scola professiunala commerziala consista da l’instrucziun fundada sin la pratica, in practicum professional da pliras emnas e dad in practicum d’in onn.

Cun quai purschain nus la pussaivladad da passentar gia durant la scolaziun vairas experientschas professiunalas a noss scolars ed a nossas scolaras. Ils attestats da lavur e las qualificaziuns professiunalas faciliteschan uschia era d’entrar en il mund da lavur.

En ulteriurs chantuns è la SCM era enconuschenta sco scola media d’economia (SME).