Navigation

Inhaltsbereich

Incumbensa Kappeler concernent l'acceleraziun da la segunda etappa dal AGD

Sessiun: 07.12.2022

En sia resposta a la dumonda da la fracziun da la PVL concernent la realisaziun da la segunda etappa dal AGD motivescha la Regenza ils retards cun l'argument, ch'ils scleriments necessaris dovrian dapli temp e ch'igl existia in grond basegn da coordinaziun sin plaun interdepartamental. La Regenza empermetta che la debatta davart la missiva tar la realisaziun da la segunda etappa dal AGD vegnia probablamain ad avair lieu durant l'emprima mesadad da l'onn 2025.

En il fratemp fetschia il parlament permanentamain novas pretensiuns al AGD. E ch'i saja da partir dal fatg, che talas stentas vegnian tendenzialmain a s'augmentar. Da l'autra vart audian ins pli e pli pretensiuns che chaschunan ina reducziun da las entradas (p.ex. incumbensa Hohl per distgargiar fiscalmain famiglias e persunas spezialisadas), e plinavant vegnian messas en dumonda las distribuziuns da la Banca naziunala als chantuns. Tut quests svilups na simplifitgeschian betg la realisaziun planisada da la segunda etappa dal AGD (mesiras sco er finanziaziun).

Per far avanzar almain en etappas la protecziun dal clima ch'è urgentamain necessaria, sco er la decarbonisaziun colliada cun quella, incumbenseschan las sutsegnadras ed ils sutsegnaders la Regenza

  • d'accelerar cun prioritad las lavurs ch'èn necessarias per realisar svelt las mesiras cardinalas che han in'auta relaziun tranter ils custs ed il niz (p.ex. identifitgar ils projects innovativs per cuntanscher la finamira netto nulla, promover la producziun d'electricitad regenerabla (d'enviern), sviluppar chalur e fradur a distanza regenerabla, promover staziuns per chargiar vehichels electrics e regiuns turisticas ch'èn climaticamain neutralas)
  • da metter a disposiziun – a partir da l'onn 2025 fin a la cumposiziun definitiva da l'alimentaziun dal Fond per il clima – supplementarmain mintga onn 40 milliuns francs ord ils meds finanzials actuals da las taglias chantunalas e federalas a favur da mesiras per la protecziun dal clima (e da stgaffir las basas legalas ch'èn necessarias per quai)
  • da far las adattaziuns legalas necessarias per che las mesiras cardinalas priorisadas possian vegnir finanziadas gia a partir da l'onn 2025

Cuira, ils 7 da december 2022

Kappeler, Maissen, Baselgia, Atanes, Bachmann, Bardill, Biert, Bleuler-Jenny, Butzerin, Cahenzli-Philipp (Vaz Sut), Danuser (Cuira), Degiacomi, Della Cà, Dietrich, Gredig, Kreiliger, Mazzetta, Müller, Nicolay, Oesch, Pajic, Perl, Preisig, Rageth, Rettich, Rusch Nigg, Saratz Cazin, Schneider, von Ballmoos, Walser, Walther, Wilhelm, Zindel

Resposta da la regenza

Cun concluder in credit d'impegn ed ina reserva da passa 67 milliuns francs ha il Cussegl grond garantì la finanziaziun da las mesiras da l'emprima etappa dal Plan d'acziun Green Deal (AGD) che dura da 2021 fin 2024. Quests daners han permess da rinforzar las mesiras da promoziun existentas, per las qualas las basas legalas existan gia ‒ numnadamain sanaziuns energeticas d'edifizis, il remplazzament da stgaudaments, contribuziuns per il traffic public e mesiras en l'agricultura. Cun l'etappa II dal AGD, che vegn elavurada actualmain, ha la Regenza la finamira da stgaffir las basas legalas per ulteriuras mesiras (da promoziun), che n'èn betg numnadas definitivamain en la missiva da la Regenza dals 14 da zercladur 2021. En connex cun l'etappa II vegn messa a disposiziun ina survista generala cumplessiva che furma la basa per il Cussegl grond per discutar il project da lescha ‒ suenter la consultaziun ed en enconuschientscha da tut ils fatgs ‒ e per prender las decisiuns correspundentas. Per la finanziaziun speziala dal Fond per il clima e per l'alimentaziun da quest fond ston dentant vegnir elavuradas ordavant las basas legalas necessarias. Questas basas permettan plinavant da promover ulteriuras mesiras per proteger il clima e per adattar al clima. Ultra da quai èn questas basas legalas essenzialas per promover pli fitg ils projects prioritars destinads a proteger il clima, ed ellas pon probablamain vegnir messas a disposiziun a temp util. I n'è betg inditgà da graduar quest project legislativ, perquai ch'el po obtegnair in effect adequat mo en sia totalitad. Areguard l'enumeraziun en la parantesa dal punct 1 da l'incumbensa stoi vegnir constatà, ch'i n'è betg l'incumbensa da la Regenza u da l'administraziun chantunala d'identifitgar mesiras innovativas per cuntanscher la finamira netto nulla u d'accelerar cun prioritad mesiras cardinalas che han in'auta relaziun tranter l'effect ed ils custs, nun ch'ellas pertutgian cumpetenzas dal chantun gia existentas. Plitost vali da preparar adattaziuns da leschas, per che las mesiras correspundentas dals petents da l'economia, dal provediment d'energia u da l'agricultura possian vegnir valitadas e promovidas. Il AGD na duess betg avair per consequenza, ch'il chantun survegn novas incumbensas e ch'i vegnan uschia reducidas las cumpetenzas da l'economia, dals provediders d'electricitad e.u.v. Percunter èsi in giavisch, ch'ils eventuals purtaders da las mesiras cardinalas suttamettian tals projects a l'administraziun, per ch'i possian vegnir integradas las disposiziuns adequatas en il project legislativ, quai per promover tals projects. Actualmain vegnan las resursas da l'administraziun duvradas cumplettamain per il project legislativ. Perquai propona la Regenza al Cussegl grond da refusar il punct 1. Perquai ch'il credit d'impegn existent pudess esser exaust la fin da l'onn 2024, sto vegnir examinada ina finanziaziun consecutiva, quai per ch'ins na stoppia betg fermar las mesiras da promoziun pervia da la basa legala existenta. I na fiss er betg cunvegnent da planisar finanziaziuns per mesiras da l'etappa II senza l'existenza da las basas legalas per promover questas mesiras. Da metter a disposiziun mintga onn 40 milliuns francs per mesiras a favur dal clima ord meds publics generals senza las basas legalas correspundentas, na fiss betg raschunaivel e s'opponiss al scumond da la destinaziun fixa da las taglias principalas. Sin basa da quests fatgs propona la Regenza al Cussegl grond da midar il punct 2 en quel senn, ch'in credit supplementar al credit d'impegn existent sto vegnir examinà ed en cas da basegn suttamess al Cussegl grond l'onn 2024. L'urari che la Regenza aveva concludì il matg 2022 prevesa, che la consultaziun duaja vegnir dada libra l'ultim quartal da l'onn 2023. Ils ulteriurs pass vegnan a depender dals resultats da la consultaziun e da la debatta en il Cussegl grond. En quest connex vegn la prontezza da metter a disposiziun ils meds finanzials necessaris per il Fond per il clima ad avair ina impurtanza decisiva. Perquai che la Regenza na po betg ademplir suletta il punct 3 e perquai ch'ella ha gia in urari ambizius per il project legislativ, vegni proponì al Cussegl grond da refusar il punct 3.

Sin basa da questas explicaziuns propona la Regenza al Cussegl grond da refusar l'incumbensa qua avant maun concernent ils puncts 1 e 3 e da la midar sco suonda concernent il punct 2: In credit supplementar al credit d'impegn existent sto vegnir examinà ed en cas da basegn suttamess al Cussegl grond l'onn 2024.

 22 da favrer 2023