Il chantun Grischun è dividì oz en sis districts da stimaziun regiunals. In da quels è il district da stimaziun 3 Casti/Tavau cun sedia a Casti e cun ina filiala a Tavau.
La sedia dal district da stimaziun 3 a Casti è vegnida stgaffida ils onns 1985–1987. Il perimeter da quest district da stimaziun cumpigliava da quel temp il district da l'Alvra. Avant l'onn 1985 appartegneva il Surses al district da stimaziun Samedan, ils circuls da Bravuogn e da Belfort a Tusaun ed il circul d'Alvaschagn a Cuira.
Da quel temp avevan ins l'intenziun da rinforzar las regiuns che avevan paucas plazzas da lavur chantunalas, e quai tras la domiciliaziun da novas plazzas chantunalas. Tras l'installaziun dal district da stimaziun 3 a Casti ha il chantun stgaffì 6–8 plazzas da lavur qualifitgadas ch'èn impurtantas per la regiun dal Grischun central. Pli tard, cur che Tavau è vegnì attribuì al district da stimaziun 3, è il volumen da lavur s'augmentà fermamain, uschia ch'igl è la finala vegnida averta ina filiala a Tavau. Tuttina èn ins vegnì dapi lura – pervia dal volumen da lavur pli grond – en grond retard cun las stimaziuns ordinarias periodicas. Per part han quellas lieu oz cun in retard da fin a 7 onns.
L'onn 2010 è la vischnanca da Vaz vegnida attribuida al district da stimaziun 2 Tusaun e las actas da la vischnanca da Lantsch sa chattan oz er gia a Tusaun. En consequenza da quai èn pliras plazzas da lavur vegnidas transferidas u vegnan eventualmain anc transferidas da Casti a Tavau u a Tusaun.
Las sutsegnadras ed ils sutsegnaders tschentan perquai las suandantas dumondas a la regenza:
1. Tge strategia persequitescha la regenza tar la divisiun dals districts da stimaziun?
2. Ston ins partir dal fatg che la regenza haja l'intenziun da reducir il dumber da districts da stimaziun en il chantun Grischun?
3. Cun tge consequenzas persunalas ston ins far quint per ils districts da stimaziun actuals e per las singulas sedias e filialas dals districts da stimaziun?
4. Fa l'indebliment dal lieu da Casti part d'ina strategia generala da la regenza en il rom da la refurma da las structuras?
Cuira, ils 16 da zercladur 2011
Albertin, Caluori, Augustin, Barandun, Blumenthal, Caduff, Candinas, Casanova-Maron, Casutt, Casutt-Derungs, Cavegn, Darms-Landolt, Dermont, Dosch, Fallet, Florin-Caluori, Fontana, Gasser, Hitz-Rusch, Joos, Kleis-Kümin, Kollegger (Malix), Märchy-Caduff, Michael (Donat), Niederer, Niggli-Mathis (Grüsch), Sax, Stiffler (Tavau Plaz), Tenchio, Thöny, Tomaschett (Breil), Tomaschett-Berther (Trun), Zanetti, Degonda, Paterlini
Resposta da la regenza
L'uffizi da stimaziun (USt) sto per regla stimar mintga 10 onns en mintga vischnanca ils bains immobigliars surbajegiads. Las lavurs da la quarta stimaziun cumplessiva, ch'èn vegnidas cumenzadas l'onn 2003, èn en in retard considerabel. Quest retard sa lascha declerar tras quai che l'effectiv d'edifizis crescha d'in cuntin, tras quai ch'il dumber da stimaziuns sin dumonda s'augmenta considerablamain en consequenza da la buna conjunctura da construcziun dals ultims onns, ma er tras quai ch'il volumen da lavur è vegnì sutvalità per l'emprima registraziun dals objects en il sistem d'informatica ch'è vegnì introducì da nov l'onn 2004 e tras quai ch'il persunal è vegnì reducì a medem temp en il rom da la sanaziun da las finanzas da l'onn 2003.
Il USt ha l'incumbensa da diminuir ils proxims onns il retard. Quai cun augmentar marcantamain il dumber da stimaziuns e cun furnir las prestaziuns en moda uschè effizienta sco pussaivel areguard ils custs. Per augmentar l'effizienza èsi indispensabel da prender mesiras da manaschi e mesiras organisatoricas. Latiers appartegnan er ina reducziun dals districts da stimaziun ed in'optimaziun da l'organisaziun.
L'onn 2010 è il dumber da districts da stimaziun vegnì reducì da set a sis, ed il district da Landquart è vegnì abolì. A medem temp ha il USt avert in biro supplementar a Tavau pervia da la gronda activitad da construcziun. Tras questas e tras ulteriuras mesiras ha il dumber d'edifizis stimads pudì vegnir augmentà ils ultims 12 mais per passa 10 pertschient.
1. Tge strategia persequitescha la regenza tar la divisiun dals districts da stimaziun?
Per concepir ils districts da stimaziun guarda la regenza en emprima lingia che la lavur vegnia liquidada en moda effizienta. L'organisaziun dal USt duai sa drizzar en spezial tenor il dumber d'objects ch'èn da stimar, tenor il volumen da lavur che resulta per district, tenor il svilup da l'activitad da construcziun, tenor in'optimaziun dals viadis da stimaziun, e betg sco ultim duai la tscherna dals lieus s'orientar tenor la strategia d'immobiglias dal chantun.
2. Ston ins partir dal fatg che la regenza haja l'intenziun da reducir il dumber da districts da stimaziun en il chantun Grischun?
In'ulteriura reducziun dal dumber da districts da stimaziun n'è betg previsa a curta vista. A vista mesauna èsi imaginabel d'examinar en general las divisiuns dals di-stricts ch'èn creschids istoricamain, e quai en quest reguard, ma er areguard las sfi-das menziunadas al cumenzament. Tras ina tala organisaziun pudessan las lavurs vegnir repartidas sin ils biros externs autonoms dal USt, senza stuair observar ina divisiun fixa dals districts. La repartiziun da la lavur pudess alura suandar ils criteris da manaschi. Tenor in model sumegliant lavura gia oz la polizia da fieu cun success.
3. Cun tge consequenzas persunalas ston ins far quint per ils districts da stimaziun actuals e per las singulas sedias e filialas dals districts da stimaziun?
Ina reducziun dal persunal n'è betg previsa tar il USt; ils lieus da lavur pon dentant sa midar per las singulas collavuraturas e per ils singuls collavuraturs. Ils biros ston vegnir manads là, nua ch'i vegnan construids blers edifizis novs u nua ch'igl ha in grond effectiv d'edifizis. Novas collavuraturas e novs collavuraturs vegnan engaschads en emprima lingia là, nua ch'igl ha ina gronda chargia da lavur u nua ch'ins constatescha ina sutdotaziun da persunal en cumparegliaziun cun auters districts. In ulteriur criteri impurtant è la finamira da terminar pli u main a medem temp la quarta stimaziun cumplessiva en tut ils districts da stimaziun. Per quests motivs duai il biro da Landquart vegnir fusiunà per il 1. da schaner 2012 cun il biro da Cuira. Quai er per pudair reducir las ierarchias e pervia da la pitschna distanza davent da Cuira. A vista mesauna è plinavant mess en dumonda il lieu da Casti pervia dal svilup dals ultims onns. Perquai ch'i vegnan construids blers edifizis novs e perquai ch'i resultan lavurs supplementaras, èsi evident ord vista dal manaschi d'examinar ina dischlocaziun a Tavau.
4. Fa l'indebliment dal lieu da Casti part d'ina strategia generala da la regenza en il rom da la refurma da las structuras?
Na. La regenza vul furnir ina incumbensa chantunala en moda effizienta e favuraivla, resguardond ils basegns da las burgaisas e dals burgais. Er envers las pajataglias ed ils pajataglias è ella obligada da far quai. La refurma da las structuras n'ha nagina influenza sin l'organisaziun dals fatgs da stimaziun, ch'è ina incumbensa chantunala. La regenza vegn percunter a sa drizzar tenor ils princips da la strategia chantunala d'immobiglias che prevesa centers regiunals per l'administraziun chantunala.
02 da settember 2011