Implants d'energia dal vent han conjunctura auta. Predestinadas per implants d'energia dal vent en Svizra èn ils crests da las muntognas dal Giura. L'utilisaziun da la forza dal vent ha sias mancanzas. Ella furnescha bain energia netta, ma quai cun in retgav relativamain pitschen. Vitiers vegn che las vischinas ed ils vischins pateschan massivamain d'immissiuns. Sin basa da las experientschas cun implants d'energia dal vent ha la Partida verda dal chantun Giura deliberà ils 17 da matg 2011 ina resoluziun cunter implants d'energia dal vent en il chantun Giura d'ina clerezza che n'è enfin ussa anc betg vegnida cuntanschida. "Ina giada mess en funcziun èn quest implants sa mussads sco bler pli canerus e mulestus che empermess. Praticamain naginas da las grondiusas empermischuns n'han pudì vegnir ademplidas. Ni ina contribuziun gronda avunda al provediment d'electricitad ni ina vischinanza acceptabla n'han pudì vegnir cumprovadas. Sch'ins ponderescha conscienziusamain il pro ed il contra da la construcziun da questas maschinas gigantescas, ston ins admetter che quai n'è betg ina buna idea." Sin basa da ponderaziuns sumegliantas e da ponderaziuns turisticas ha er il Tirol dal sid decidì ultimamain da betg construir implants d'energia dal vent. Ils dus implants d'energia dal vent sin il pass dal Raisch ston vegnir ruts giu entaifer 5 onns.
La branscha da la forza dal vent svizra, caracterisada da la "Suisse Eole" semistatala e confinanziada da la Confederaziun, designescha – per mancanza da lieus fitg buns en Svizra – ina sveltezza dal vent da 4,5 m/s sco suffizienta, entant che la lescha davart las energias regenerablas (LER) da la Germania prescriva liantamain ina sveltezza minimala da 6,4 m/s. Sche las directivas da la LER valessan en Svizra, n'ademplissan schizunt ils implants d'energia dal vent dal Giura betg las pretensiuns minimalas. La motivaziun da questas pretensiuns minimalas da la LER èn simplas e cleras: "Impedir implants ineffizients en la rait d'electricitad".
La prestaziun obligatorica e da reserva ch'i dovra per utilisar implants d'energia dal vent dependa directamain da la qualitad da la prognosa da la prestaziun dal vent. Sch'in orcan u sch'ina calma pudessan vegnir preditgs exactamain, na basegnassi nagina prestaziun obligatorica e da reserva. Perquai ch'ins na po betg partir d'ina prognosa dal vent perfetga, ston, en dependenza da la prestaziun installada, autras ovras electricas che pon vegnir regladas en moda flexibla, sco p.ex. ovras electricas da gas u idraulicas, gea schizunt ovras electricas atomaras, metter a disposiziun reservas. Expertas ed experts vesan en quai la basa per il fatg che l'electricitad che vegn producida cun agid dal vent en indrizs ineffizients vegn "magliada", perquai che l'energia obligatorica neutralisescha almain l'electricitad che vegn producida cun agid dal vent u la surpassa schizunt. En il meglier cas na datti pia nagina electricitad che vegn producida cun agid dal vent, en il mender cas ston las ovras electricas grondas fidadas anc metter a disposiziun energia supplementara, per ch'i na dettia nagins disturbis en la rait.
- È la regenza er da l'avis che – sin basa da las experientschas cun implants d'energia dal vent gronds en il chantun Giura ed en il Tirol dal sid – la distanza dals implants d'energia dal vent als territoris abitads na dastga betg sutpassar en il Grischun ils 1500 m che vegnan pretendids internaziunalmain?
- È la regenza er da l'avis che implants d'energia dal vent ineffizients na dastgassan betg survegnir ina permissiun en il Grischun? Tenor las indicaziuns da l'uffizi federal d'energia (UFE) vegn la "effizienza svizra" definida cun sveltezzas dal vent da >4.5m/s sco er cun 2000 fin 2400 uras per onn che l'implant lavura cun plaina prestaziun.
- È la regenza er da l'avis che implants d'energia dal vent da pilot che na pon betg cumprovar l'effizienza ston suenter 5 onns puspè vegnir stratgs giu senza indemnisaziun?
- È la regenza er da l'avis che la promoziun da la forza idraulica (er ovras electricas en il Rain) sco er eventualmain da l'energia solara haja l'emprima prioritad e betg la promoziun d'implants d'energia dal vent?
Cuira, ils 17 da zercladur 2011
Davaz, Kunz (Cuira), Giacomelli, Barandun, Brandenburger, Buchli-Mannhart (Stussavgia Plaz), Burkhardt, Casutt, Conrad, Engler, Fontana, Hardegger, Hartmann (Champfèr), Heiz, Holzinger-Loretz, Jeker, Jenny, Kasper, Koch (Igis), Komminoth-Elmer, Kunz (Fläsch), Marti, Michael (Donat), Nigg, Niggli-Mathis (Grüsch), Righetti, Troncana-Sauer, Waidacher, Wieland, Zanetti, Zweifel-Disch, Pfister
Resposta da la regenza
Cun la revisiun da la lescha federala d'energia prescriva la confederaziun che la media da la producziun annuala d'electricitad che deriva da purtaders d'energia regenerabels stoppia vegnir augmentada fin l'onn 2030 per almain 5'400 GWh envers la situaziun da l'onn 2000. En quest connex duai er l'energia dal vent gidar a cuntanscher questa finamira.
Per giuditgar en il Grischun implants d'energia dal vent (IEV) serva il "Mussavia per implants d'energia dal vent" da l'october 2008 ch'è vegnì elavurà da l'uffizi per il svilup dal territori, da l'uffizi per la natira e l'ambient e da l'uffizi d'energia e da traffic. Per giuditgar IEVs vegn consultada ultra da quai sco basa la "Recumandaziun per la planisaziun dad implants d'energia dal vent" da la confederaziun dal mars 2010. La finala ston vegnir resguardadas las disposiziuns legalas sin plaun communal, chantunal e federal sco er las directivas da procedura correspundentas per la dumonda da construcziun respectiva.
Tar las dumondas:
1. Pervia da las relaziuns dal spazi ston las distanzas dad IEVs envers territoris abitads vegnir examinadas da cas a cas e na pon betg vegnir cumparegliadas pauschalmain cun auters territoris u cun auters pajais. Il mussavia chantunal prescriva ch'i stoppia vegnir resguardada ina distanza d'almain 300 fin 400 m envers edifizis abitads u envers zonas da construcziun d'abitadi. Ultra da quai ston vegnir observadas stringentamain las prescripziuns da l'ordinaziun davart la protecziun cunter canera (OPC). Per tut las zonas d'utilisaziun valan ultra da quai grads da sensibilitad da canera che ston er vegnir resguardads cun giuditgar las immissiuns da canera. La prescripziun internaziunala da distanzas menziunada dad almain 1'500 m per IEVs n'è per il Grischun pia ni applitgabla ni necessaria.
2. L'indemnisaziun per cuvrir ils custs da la furniziun d'electricitad (ICF) duai pussibilitar ina indemnisaziun economica da la producziun d'energia tras IEVs. I n'è però betg l'incumbensa da las autoritads da permissiun da controllar en il cas singul la rentabilitad e l'effizienza da tals implants. Ils scleriments e las calculaziuns ch'èn necessarias per quai èn chaussa dals investiders resp. dals gestiunaris. Sche las prescripziuns citadas (sveltezza dal vent sco er uras per onn che l'implant lavura cun plaina prestaziun e.u.v.) stuessan vegnir observadas en mintga cas, resultass da quai in scumond general dad IEVs en tut la Svizra. Il svilup tecnic e las experientschas cun il manaschi dad IEVs, er en zonas alpinas (Gütsch, Andermatt), sco er datas da mesiraziun actualas (Haldenstein, Lumbrein e.u.v.) mussan però ch'i dat er en il Grischun in pèr paucs lieus, nua che IEVs pon vegnir manads en moda economica ed effizienta.
3. Sco implants da pilot vegnan designads implants che vegnan construids e manads avant l'introducziun generala d'ina tscherta tecnologia, sch'il svilup da quests implants suttastat a tscherts ristgs socials, economics e tecnics. Quai per sclerir dumondas da l'acceptanza, da la rentabilitad, dal potenzial dal martgà e da l'optimaziun tecnica. En cas dad IEVs na po ozendi betg pli vegnir discurrì dad implants da pilot. La tecnologia è gia bain madira, etablida en il martgà ed examinada. L'utilisaziun da la forza dal vent vegn dal rest sviluppada vinavant e meglierada permanentamain. Ina prescripziun da rumper giu IEVs ineffizients cuntrafaschess al tractament egual da las tecnologias. Uschia na ston er implants da fotovoltaica u implants idraulics betg vegnir disfatgs, e quai er alura betg, sche lur tecnologia è antiquada. Ina disfatga dad IEVs p.ex. sch'els na vegnan betg pli manads vinavant, sto però esser pussaivla da tut temp. Dentant na datti nagin motiv da prescriver la disfatga d'implants ineffizients suenter 5 onns.
4. En connex cun la forza idraulica posseda il chantun Grischun incontestadamain il potenzial il pli grond d'engrondir la producziun d'electricitad. Sco cumplettaziun pon però er autras tecnologias sco la fotovoltaica e l'utilisaziun da la forza dal vent gidar ad augmentar la producziun d'electricitad cun purtaders d'energia regenerabels. Sa servir d'ina metoda da producir electricitad cunter in'autra metoda da producir electricitad resguarda la regenza sco pauc raschunaivel perquai che nagin na po savair oz, tge resultats e tge enconuschientschas che la perscrutaziun ed il svilup en il sectur da l'energia ans vegnan anc a preschentar en il futur.
7 da settember 2011