Dumonda Cavegn concernent la pratica da l'uffizi per l'execuziun giudiziala en cas da mesiras staziunaras ed il transferiment dals custs a las vischnancas
Sessiun: 08.12.2011
L'onn 2009 ha ina persuna estra incendià intenziunadamain sia abitaziun, situada en ina vischnanca da la Val dal Rain grischuna. La delinquenta n'era betg annunziada en la vischnanca respectiva. Il chasti che privescha da la libertad ch'era vegnì pronunzià era vegnì suspendì a favur d'ina mesira staziunara. L'uffizi per l'execuziun giudiziala ha alura exequì la mesira staziunara che chaschuna custs da circa 20'000.– francs per mais. Ils custs ha l'uffizi per l'execuziun giudiziala transferì a la vischnanca.
La persuna sentenziada vegn cun gronda probabladad a stuair bandunar la Svizra. Malgrà in'uschenumnada situaziun da tractament "mit einem extern zu verantwortenden Stillstand", che na vul dir nagut auter che la mesira staziunara n'ha betg success, cuntinuescha l'uffizi da giustia simplamain cun la mesira staziunara er suenter 2 onns. I para ch'i vegnia spetgada ina decisiun giudiziala concernent la permissiun da dimora resp. concernent l'expulsiun.
Las intervenziuns da la vischnanca areguard quest stadi insupportabel restan senza success. En il fratemp èn resultads custs da circa 500'000.– francs. Per vischnancas è questa situaziun fitg problematica. I na dastga betg esser che mesiras staziunaras senza speranza d'in success vegnian realisadas cun tals imports sin donn e cust da finanzas communalas resp. ch'ina vischnanca stoppia observar in tal agir senza pudair intervegnir.
I resultan las suandantas dumondas a la regenza:
1. Correspundi a la pratica da l'uffizi per l'execuziun giudiziala da cuntinuar cun mesiras staziunaras sin donn e cust da las vischnancas er, sch'i manca la speranza d'in success dal tractament, per spetgar p.ex. decisiuns davart meds legals?
2. Tge pussaivladads han las vischnancas per intervegnir cunter mesiras staziunaras nungiustifitgadas resp. cunter lur cuntinuaziun, sch'i las manca la speranza d'in success?
3. Tgi surpiglia ils custs per ina mesira staziunara, sche la persuna sentenziada n'è betg annunziada en ina vischnanca e na posseda er betg ina permissiun da dimora da la polizia da persunas estras?
4. Èn las vischnancas obligadas da surpigliar ils custs da las mesiras staziunaras senza speranza d'in success?
Cuira, ils 8 da december 2011
Cavegn, Aebli, Furrer-Cabalzar, Albertin, Burkhardt, Dosch, Grass, Kasper, Kleis-Kümin, Kollegger (Malix), Märchy-Caduff, Michael (Donat), Stiffler (Cuira), Tomaschett (Breil), Zanetti
Resposta da la regenza
En sia sentenzia dals 13 d'october 2009 ha la dretgira districtuala dal Plaun suspendì il chasti che privescha da la libertad ch'era vegnì pronunzià, e quai pervia dal grev disturbi psichic da l'incendiaria. La dretgira districtuala ha previs a ses lieu ina mesira staziunara tenor ils art. 59 ss. dal cudesch penal svizzer (CP, CS 311.0). A medem temp ha ella transferì ils custs per l'execuziun da la mesira a la vischnanca nua che la persuna sentenziada aveva ses ultim domicil (art. 7 al. 2 da la lescha davart l'execuziun giudiziala en il chantun Grischun, LExeG; DG 350.500).
L'uffizi per l'execuziun giudiziala dal Grischun è cumpetent per l'execuziun da questa mesira staziunara che sto avair lieu en ina instituziun psichiatrica u en ina instituziun per l'execuziun da mesiras (art. 59 al. 2 CP). Almain ina giada per onn vegni examinà, sch'i duai vegnir cuntinuà cun la collocaziun tenor dretg penal, ubain sch'i sto avair lieu ina relaschada cundiziunada u in'aboliziun da la mesira (art. 62d CP). Ordavant sto l'autoritad d'execuziun tadlar la persuna collocada e dumandar in rapport psichiatric-forensic. La decisiun vegn relaschada en furma d'ina disposiziun da l'uffizi contestabla. En il cas concret ha l'uffizi disponì ils 3 da schaner 2012 la relaschada cundiziunada da la mesira staziunara en spezial perquai che la terapia ha gì success dentant er perquai che la situaziun en il pajais d'origin da la persuna sentenziada è sa meglierada. En il fratemp è ella returnada en quest pajais. Là vivan er ses uffants da las lètgs anteriuras sco er ses geniturs.
1. I na correspunda betg a la pratica da l'uffizi per l'execuziun giudiziala da cuntinuar cun mesiras staziunaras senza speranza. La cuntinuaziun da la mesira, la relaschada cundiziunada u l'aboliziun d'ina mesira senza speranza, vegnan disponidas tenor las prescripziuns e directivas legalas previsas per quai en il concordat da la Svizra orientala davart l'execuziun da chastis e da mesiras.
2. La durada da la mesira staziunara dependa dal success dal tractament che vegn controllà permanentamain. Ina cogestiun tras autras autoritads n'è ni previsa en la lescha ni pratitgabla. La vischnanca n'ha pia naginas pussaivladads d'intervegnir.
3. Tenor l'art. 7 al. 2 LExeG sto la vischnanca surpigliar ils custs da la mesira staziunara, en la quala la persuna che ha commess il malfatg sa chatta. I n'è pia betg necessari d'avair in domicil da dretg civil ed er betg ina permissiun da dimora da la polizia d'esters per cumprovar l'obligaziun da surpigliar ils custs da la vischnanca. Ils custs da l'execuziun da mesiras staziunaras per motivs dal dretg penal pertutgan l'obligaziun da sustegn e pon vegnir scuntrads da la vischnanca sut la gulivaziun da las grevezzas.
4. Sch'ina dretgira ordinescha ina mesira staziunara, ston las vischnancas surpigliar ils custs en moda subsidiara tenor la lescha davart l'execuziun giudiziala. Sch'ina mesira staziunara vegn abolida perquai ch'ella è senza speranza, na resultan nagins custs pli per las vischnancas.
26 da schaner 2012