Dumonda Thöny concernent la banca chantunala grischuna e las participaziuns strategicas en connex cun la strategia da daners alvs envers ils Stadis Unids
Sessiun: 19.03.2012
Il cumenzament da l'onn 2012 ha la banca Wegelin vendì ina gronda part da sia fatschenta a la gruppa Raiffeisen. Quai pervia da plants smanatschants da las autoritads americanas causa cumplicitad presumtiva a delicts da taglia. Or da la fatschenta che na pertutgava betg ils Stadis Unids è vegnida fundada la banca Notenstein. Tenor atgnas indicaziuns ha la Raiffeisen pers – 1 mais suenter la surpigliada – 2 fin 3 pertschient da la clientella privata da la banca. Dapi lura ha la giustia dals Stadis Unids prendì en mira ulteriuras bancas svizras pervia da cumplicitad a delicts da taglia. Tranter quellas er intginas bancas chantunalas, pia instituts en mauns statals.
En il fratemp ha il cussegl federal suttascrit cun la Germania e cun la Gronda Britannia mintgamai ina cunvegna davart ina taglia d'indemnisaziun. La cunvegna cun la Germania para dentant dad esser dispitaivla. Plinavant vuless il cussegl federal impedir l'afflussiun da facultads che n'èn betg stadas suttamessas a la taglia. Per quest intent vul el extender las obligaziuns da las bancas d'agir cun quità.
La banca chantunala grischuna (BCG) dispona tenor atgnas indicaziuns da participaziuns strategicas da 50% (indirectamain da 62,7%) vi da la banca privata Bellerive SA a Turitg e da 50% vi da la Private Client Bank SA a Turitg.
Las sutsegnadras ed ils sutsegnaders tschentan en quest connex las suandantas dumondas a la regenza:
1. Exista per la BCG u per sias societads da participaziun ina ristga pli gronda en connex cun daners nairs or dals Stadis Unids? Sche gea, co sto vegnir valitada questa ristga?
2. Èn la BCG u sias societads da participaziun vegnidas attatgadas da la giustia dals Stadis Unids areguard cumplicitad a delicts da taglia? Sche gea, cun tge consequenzas?
3. Tge ristgas existan tar la BCG u tar sias societads da participaziun en connex cun l'administraziun da facultads estras?
4. Han er la banca chantunala grischuna u sias societads da participaziun pers clientella privata en il rom da l'affera «banca Wegelin»? Sche gea, quanta clientella?
5. Co reageschan la BCG u sias societads da participaziun sin eventuala clientella problematica?
Cuira, ils 19 da mars 2012
Thöny, Baselgia-Brunner, Bucher-Brini, Frigg-Walt, Jaag, Locher Benguerel, Müller (Tavau Plaz), Noi-Togni, Peyer, Pult, Trepp, Deplazes, Hensel, Monigatti
Resposta da la regenza
1. La banca chantunala grischuna (BCG) è ina banca universala cun orientaziun regiunala. Ella ha en emprima lingia clientella dal chantun Grischun resp. da la Svizra. A l'exteriur n'è la BCG betg preschenta. Clientella da l'exteriur vegn dentant servida, sch'ella sa drizza ord atgna iniziativa a la BCG sin territori svizzer. Tut tenor la provegnientscha valan en quest connex differentas pretensiuns d'admissiun, ed ils servetschs bancars usitads che vegnan furnids n'han betg l'intent d'evitar taglias resp. da gidar ad ometter taglias.
La fatschenta bancara da la BCG en ils Stadis Unids è marginala tant areguard il dumber da clientas e da clients sco er areguard l'autezza da las valurs da facultad tgiradas. Dapi l'onn 2008 è la fatschenta bancara cun la clientella dals Stadis Unids vegnida restrenschida cuntinuadamain, fin ch'ins ha decidì da desdir las relaziuns da fatschenta cun la clientella existenta domiciliada en ils Stadis Unids. Quai pervia dals custs sproporziunads e perquai ch'i smanatschavan ulteriuras regulaziuns (lescha americana FATCA). Areguard la fatschenta bancara transcunfinala cun la clientella dals Stadis Unids n'èn actualmain visiblas naginas ristgas augmentadas per la BCG. Questa constataziun vala er per las societads da participaziun.
2. Na.
3. Sco banca universala tgira la BCG er clientella da l'exteriur. En quest connex è la ristga principala quella ch'ils servetschs finanzials che vegnan furnids correctamain tenor il dretg svizzer pon vegnir qualifitgads autramain da las autoritads da l'exteriur tenor lur dretg naziunal. Ultra da quai stoi vegnir resguardà che chaussas, ch'eran anc usitadas fin avant curt, pon vegnir consideradas oz differentamain da vart da las autoritads da l'exteriur, per motivs d'opportunitad. Sbagls da singulas collavuraturas e da singuls collavuraturs na pon plinavant mai vegnir exclus dal tuttafatg. En il rom da sias pussaivladads fa la BCG dentant tut il supportabel e necessari per percepir svelt eventuals abus ed – en il meglier cas – per impedir tals. Questa constataziun vala er per las societads da participaziun.
4. Na, la BCG n'ha pers nagina clientella privata en consequenza da la "affera Wegelin".
5. En cas da clientella "problematica" existan differentas obligaziuns tenor la legislaziun svizra. Sch'ils indizis constatads na sa laschan betg refutar sin basa da tscherts scleriments, existan obligaziuns legalas d'annunzia, da bloccada e d'infurmaziun. En cas che la relaziun da confidenza cun ina clienta u cun in client è ruinada, sa resalva la BCG er il dretg da terminar ina relaziun da fatschenta. Il medem è pussaivel, sche la relaziun tranter il niz, ils custs e las ristgas na constat betg. Questa constataziun vala er per las societads da participaziun.
11 da matg 2012