Pertge anc ina giada ina incumbensa cun quasi il medem text sco quella ch'è vegnida refusada dal cussegl grond en la sessiun d'october 2011?
● L'emprima incumbensa hai jau inoltrà cun 21 suttascripziuns en la sessiun da zercladur 2011. La sessiun d'october ha la regenza recumandà da la refusar.
● Cun la decisiun da tagl dal president dal cussegl grond ha il cussegl grond refusà ils 19 d'october 2011 dad acceptar questa incumbensa cun 44 cunter 43 vuschs.
● Ils arguments refusants da la regenza èn vegnids refutads en il fratemp dal svilup sin plaun federal ed arguments novs èn vegnids vitiers (vesair ils puncts qua sutvart). Enstagl che la colonna da spetga per la ICF federala (indemnisaziun per cuvrir ils custs da la furniziun d'electricitad) è sa reducida fin l'onn 2013 – sco spetgà da la regenza – è ella daventada anc pli lunga: Il zercladur 2011 han ca. 8'000 implants, l'october ca. 11'000 ed il mars 2012 ca. 12'700 implants spetgà da vegnir realisads. Il project dad ICF fa ina pausa en il process dal parlament federal e cun ina reducziun da la colonna da spetga pon ins far quint en il cas optimistic en 3 fin 4 onns.
● Tut ils studis da potenzial inclusiv quels dal chantun Grischun mussan che la fotovoltaica ha in grond potenzial per l'avegnir.
● L'approvaziun da l'iniziativa cunter las abitaziuns secundaras duai vegnir chapida sco schanza da cuntinuar a promover pli fitg la vieuta energetica cun investiziuns en l'effizienza energetica ed en energias regenerablas.
Mintgina e mintgin che vul construir, independentamain sche quai è in hotel, ina interpresa da mastergnanza , ina societad d'immobiglias, in manaschi industrial u ina persuna privata, na duess betg vegnir impedì en sia intenziun d'integrar en il tetg ed en la fatschada parts che produceschan electricitad (moduls da fotovoltaica) sco cumplettaziun da las parts externas planisadas en ina moda che spargnan energia. Questa moda d'adattar l'effectiv d'edifizis u da realisar construcziuns novas ch'è beneventabla dal puntg da vista da la politica d'energia sco er da la protecziun da la patria e da la cuntrada dependa da la segirezza da las entradas futuras planisablas che duain da princip cuvrir ils custs da la producziun d'electricitad. La lescha davart la planisaziun dal territori e la lescha per promover la protecziun da la natira e da la patria impedeschan la "cuvrida" da monuments culturals ed architectonics. La decisiun a favur dal cumenzament da las lavurs per talas construcziuns (Minergie-P, edifizis plusenergetics u standards architectonics cumparegliabels) na laschan betg sa suspender fin che la glista da spetga da la ICF è liquidada u fin che la summa maximala da la ICF federala vegn eventualmain augmentada. Il champ sin plaun federal na vegn betg ad esser rumì avant l'onn 2013 sco ch'il cusseglier guvernativ Mario Cavigelli ha ditg ils 19 d'october 2011. L'energia solara ha er en il chantun Grischun in enorm potenzial nunutilisà ed è ina funtauna d'energia a 100 % indigena. La construcziun e la gestiun da tals implants è gist en vista als problems actuals ed als problems, che la branscha turistica e la branscha da construcziun vegn ad avair en l'avegnir sco consequenza da l'acceptanza da l'iniziativa cunter las abitaziuns secundaras, ina contribuziun a la valurisaziun regiunala er en regiuns periferas che na dastga betg vegnir sutstimada. Ultra da quai sa porschan al turissem pussaivladads da communicaziun ch'èn occupadas en moda positiva sco che l'exempel da l'hotel plusenergetic Muottas Muragl ch'è vegnì undrà cun il premi solar svizzer da grond prestige e cun il premi "Watt d'Or" mussa en moda impressiunanta.
En quest senn vegn la regenza incumbensada d'elavurar la basa legala per introducir en moda svelta ina indemnisaziun chantunala per cuvrir ils custs da la furniziun d'electricitad (ICCF) per electricitad solara e da la suttametter al cussegl grond per la decisiun. En quest connex duain vegnir examinads e resguardads ils suandants parameters:
- Il chantun conceda a tut las constructuras ed a tut ils constructurs d'implants d'electricitad solara sin surfatschas surbajegiadas e sin infrastructuras ina ICCF sco finanziaziun intermediara tar la ICF federala.
- La premissa per survegnir ina ICCF è quella ch'ina conferma legalmain valaivla da Swissgrid è avant maun, tenor la quala l'implant è vegnì annunzià per la ICF tenor dretg federal ed ha survegnì ina plazza sin la glista da spetga.
- La ICCF vegn fixada da bel principi per 20 fin 25 pertschient pli bassa per kWh che la ICF federala. Il mument che la ICF federala vegn pajada, daventa la ICCF obsoleta.
- Il chantun procura per ina procedura simpla e nunbirocratica. En quest connex sto vegnir examinada ina soluziun, tenor la quala in unic uffizi (in uschenumnà one-stop-shop) duai esser cumpetent sco post da contact per tut las dumondas en connex cun l'electricitad solara.
- Per implants pitschens sut 10 kWp pon er vegnir pajadas – empè da la ICCF – contribuziuns d'investiziun da p.ex. fr. 1'000.–/kWp (model BS) che na retiran alura nagina ICF resp. che na dastgan p.ex. betg vender la plivalur ecologica durant 10 onns.
- La ICCF vegn finanziada sur in supplement sin la taxa per utilisar las raits da maximalmain 0,3 rp./kWh.
- En il senn d'ina finanziaziun intermediara e d'ina finanziaziun da partenza vegn la ICCF limitada a 5 onns e po vegnir prolungada en cas da basegn.
Cuira, ils 21 da mars 2012
Gasser, Kappeler, Kollegger (Cuira), Albertin, Baselgia-Brunner, Blumenthal, Bucher-Brini, Buchli-Mannhart, Burkhardt, Casutt, Darms-Landolt, Della Vedova, Dermont, Dosch, Engler, Felix (Haldenstein), Foffa, Fontana, Gartmann-Albin, Heinz, Hitz-Rusch, Jaag, Jenny, Koch (Tumein), Koch (Igis), Komminoth-Elmer, Locher Benguerel, Märchy-Caduff, Meyer-Grass, Michael (Donat), Michael (Castasegna), Montalta, Müller (Tavau Plaz), Niederer, Noi-Togni, Parolini, Pedrini, Peyer, Pult, Righetti, Rosa, Thöny, Tomaschett (Breil), Tomaschett-Berther (Trun), Trepp, Vetsch (Claustra Vitg), Waidacher, Zweifel-Disch, Degonda, Deplazes, Felix (Scuol), Monigatti, Patt
Resposta da la regenza
Il cuntegn da l'incumbensa Gasser dals 22 da mars 2012 è praticamain identic cun il cuntegn da l'incumbensa dals 17 da zercladur 2011 ch'il cussegl grond ha refusà en la sessiun d'october 2011. Mo areguard l'autezza da la contribuziun pretendida sco er areguard il supplement da la tariffa per utilisar las raits divergescha la nova incumbensa minimalmain da l'incumbensa oriunda. La repetiziun da l'incumbensa vegn motivada oravant tut cun quai che la glista da spetga per l'indemnisaziun per cuvrir ils custs da la furniziun d'electricitad (ICF) è creschida vinavant en il fratemp sin nivel naziunal.
Sco gia menziunà en la resposta dals 7 da settember 2011 ha il parlament naziunal decidì cun la midada da la lescha d'energia, ch'il cussegl federal possia augmentar il supplement dad ICF, che importa actualmain 0,45 raps/kWh, a partir da l'onn 2013 a maximalmain 0,9 raps/kWh. Uschia stattan a disposiziun per onn maximalmain 500 milliuns francs empè da circa 265 milliuns francs sco enfin ussa. Da l'autra vart sa reduceschan cuntinuadamain ils pretschs per moduls da fotovoltaica. Mo en la perioda da l'onn 2010 fin oz èn els crudads per circa 30 fin 40 pertschient. Quest svilup ha gì per consequenza che er las tariffas da la ICF che sa basan sin pretschs dal martgà èn vegnids adattads in pèr giadas vers engiu.
Sin plaun federal vegnan examinadas actualmain differentas mesiras per reducir la glista da spetga da la ICF. En spezial vegn examinada da nov ina contribuziun unica als custs d'investiziun per implants pitschens empè da tariffas da furniziun d'electricitad. En il chantun Grischun datti alura da vart da differents gestiunaris da raits en il fratemp stentas ed intenziuns da meglierar considerablamain las cundiziuns d'access e da furniziun d'electricitad or d'implants fotovoltaics.
Perquai parta la regenza anc adina dal fatg, sco gia explitgà en sia resposta da l'emprima incumbensa, che la glista da spetga da la ICF possia vegnir reducida essenzialmain l'onn 2013 cun las mesiras e cun ils svilups menziunads qua survart e ch'i na stoppian vegnir creads nagins novs instruments chantunals per quai.
In punct central da l'incumbensa è la procuraziun dals meds finanzials cun introducir ina tariffa per utilisar las raits da maximalmain 0,3 raps/kWh. L'incassament da questa taxa generass per onn circa 6 milliuns francs. La regenza ha gia renvià en sia resposta dal settember 2011 al fatg ch'i manchia ina basa legala per ina tala taxa e che quella stoppia anc vegnir creada. En cas da la taxa previksa per kWh d'electricitad retratga na sa tractassi dal rest betg d'ina taxa causala, mabain d'ina taglia, perquai ch'ella na represchenta betg ina remuneraziun per ina prestaziun statala specifica. Perquai ch'ella na chaschunass nagin effect directiv pervia da sia concepziun, na poi er betg vegnir discurrì d'ina taxa directiva. Anzi, i sa tractass plitgunsch d'ina taglia cun intent determinà, ma tenor la legislaziun federala en il sectur d'energia n'han ils chantuns nagina cumpetenza d'introducir ina taxa supplementara che ha la medema finamira sco la ICF.
Abstrahà da quai duvrass ina cumplettaziun da la lescha chantunala d'energia – perfin sche las premissas fissan optimalas – almain in onn fin ch'ella pudess vegnir messa en vigur. Sco gia menziunà poi perquai vegnir fatg quint che fin alura vegnan tuttavia a star a disposiziun avunda meds finanzials federals or da la ICF federala.
La fin finala duain er vegnir spetgadas la preschentaziun e la debatta respectiva dal rapport davart la politica d'electricitad dal Grischun per pudair decider alura, sch'i dovra eventualmain anc ulteriuras mesiras per promover supplementarmain la fotovoltaica en il Grischun.
Per ils motivs menziunads propona la regenza puspè da refusar questa incumbensa.
28 da zercladur 2012