Dapi onns s'occupan la regenza ed il parlament da la dumonda, co che l'effizienza energetica po vegnir augmentada en il chantun. Sco exempels per il sectur da construcziun pon vegnir menziunadas la proposta da prender in conclus direct per ina iniziativa dal chantun concernent la promoziun da sanaziuns energeticas dals 29 d'avust 2008, l'incumbensa da la cumissiun per ambient, traffic ed energia concernent l'effizienza da l'energia en ils edifizis dal Grischun dals 12 da favrer 2008 sco er las lavurs parlamentaras en connex cun il relasch da la lescha d'energia dals 20 d'avrigl 2010 (LEG; DG 820.200). In studi da potenzial, ch'è vegnì elavurà per incumbensa da l'uffizi chantunal d'energia e da traffic e ch'è vegnì preschentà ils 15 da december 2011, localisescha en il Grischun in «grond potenzial d'energias regenerablas», cunzunt per producir electricitad tras fotovoltaica.
Sch'in patrun da construcziun vul realisar las strategias chantunalas per trair a niz il potenzial d'energias regenerablas, per exempel cun utilisar la surfatscha dal tetg per installar in indriz da fotovoltaica, vegn el confruntà cun ils suandants fatgs en connex cun questa mesira per la protecziun da l'ambient:
- el na survegn naginas contribuziuns da promoziun per sia investiziun;
- cuntrari a la confederaziun na po el betg deducir sia investiziun da la taglia;
- el sto eventualmain schizunt pajar taglia sin las entradas per ils retgavs da la producziun d'electricitad.
En quest connex vegnan tschentadas las suandantas dumondas a la regenza:
1. Co giuditgescha la regenza questa pratica, che n'è strusch cumpatibla cun las explicaziuns areguard la voluntad da promover las energias regenerablas?
2. Suenter che la conferenza svizra da taglia (CST) ha previs ils 15 da favrer 2011 – en sia analisa da la qualificaziun fiscala d'investiziuns en tecnologias che schanegian l'ambient – da liberar da la taglia ils retgavs d'indrizs da fotovoltaica: pertge na vegn quai – cuntrari ad auters chantuns – betg realisà en il Grischun?
3. Tge duess eventualmain vegnir reglà autramain sin il stgalim da las leschas (ed en tge relaschs), per che las annunzias areguard la promoziun da las strategias per trair a niz il potenzial d'energias regenerablas possian vegnir observadas resp. – sco tar la confederaziun – promovidas en quest sectur er en la pratica dal chantun Grischun?
4. En cas ch'i dovra ina regulaziun sin il stgalim da las leschas per cuntanscher las finamiras: Quant svelt po ina tala vegnir realisada, e tge mesiras pon vegnir prendidas, per che las investiziuns che vegnan fatgas en il fratemp possian vegnir deducidas retroactivamain da la taglia?
Cuira, ils 21 da mars 2012
Giacomelli, Sax, Lorez-Meuli, Bezzola (Samedan), Blumenthal, Bucher-Brini, Burkhardt, Caluori, Campell, Casty, Fasani, Furrer-Cabalzar, Gartmann-Albin, Heiz, Jeker, Jenny, Kappeler, Kleis-Kümin, Koch (Tumein), Meyer-Grass, Michael (Donat), Michel, Montalta, Nick, Niederer, Niggli-Mathis (Grüsch), Noi-Togni, Papa, Pedrini, Peyer, Pult, Righetti, Stiffler (Tavau Plaz), Thöny, Trepp, Valär, Waidacher, Wieland, Zweifel-Disch, Degonda, Müller (Susch), Patt
Resposta da la regenza
Cun la dumonda Giacomelli vegn la regenza envidada da respunder differentas dumondas che tractan la promoziun d'energias regenerablas en il dretg fiscal. En la dumonda vegni er menziunà ch'ils retgavs da la producziun d'electricitad stuessan eventualmain schizunt vegnir suttamess a la taglia sco entradas. Questa menziun è correcta ed ella è la consequenza directa dal dretg fiscal federal armonisà ch'è obligatoric per ils chantuns. Ils retgavs da la vendita da l'energia producida tras implants fotovoltaics valan sco entradas. Suttamessas a la taglia èn questas entradas dentant pir, cur ch'ils retgavs surpassan ils custs da l'implant fotovoltaic. Il dretg fiscal grischun permetta en quest senn gia oz ina deducziun dals custs dals implants fotovoltaics. Correctamain tenor la dogmatica fiscala n'ha la deducziun dentant betg lieu il mument da l'investiziun, mabain il mument ch'i vegn er cuntanschì in retgav correspundent.
1. La regenza è adina stada da l'avis ch'il dretg fiscal na saja per differents motivs betg adattà per cuntanscher finamiras directivas extrafiscalas. Pervia da las tariffas da taglia progressivas han las mesiras fiscalas – tut tenor la grevezza fiscala marginala – effects fitg differents. Ils custs da mesiras directivas en il dretg fiscal na vegnan ni budgetads ni eruids ni controllads, quai che dastgass er esser il motiv per lur popularitad. Las mesiras da promoziun na vegnan perquai er betg messas en dumonda periodicamain e vegnan negligidas regularmain en il rom da mesiras da spargn. Plinavant manca ina controlla dals effects da las mesiras directivas fiscalas, perquai che nagin na crai dad esser cumpetent en chaussa. E la finala reduceschan questas mesiras directivas las entradas suttamessas a la taglia, a las qualas sa refereschan oz las prestaziuns las pli differentas (reducziun individuala da las premias, stipendis, pajaments directs, diaria en canorta d'uffants e.u.v.).
2. Il dretg fiscal federal armonisà lascha decider ils chantuns, sch'els vulan introducir ina deducziun per mesiras per spargnar energia (art. 9 al. 3 da la lescha federala davart l'armonisaziun da la taglia directa dals chantuns e da las vischnancas, CS 642.14). Sch'il chantun vul introducir ina tala deducziun, sto quella esser concepida da medema maniera sco en il dretg da la taglia federala directa, ed ella dastga vegnir applitgada mo per edifizis existents. Tras questa deducziun vegnan custs, che han in caracter che augmenta la valur e che ston vegnir qualifitgads sco investiziuns, tractads da medema maniera sco ils custs che mantegnan la valur, ed els pon vegnir deducids da la taglia. L'analisa da la conferenza svizra da taglia s'occupa da l'interpretaziun da las normas legalas correspundentas. En il Grischun na vegn ella betg applitgada, perquai che la lescha da taglia grischuna na cuntegna naginas disposiziuns che correspundan a las disposiziuns da la confederaziun.
3. Ina promoziun fiscala nuncontrollada d'implants fotovoltaics vegn considerada da la regenza sco betg raschunaivla. Per quest intent datti pussaivladads pli cunvegnentas e meglras ordaifer il dretg fiscal. Er stoi vegnir evità ch'i vegnan pratitgadas promoziuns sur ina indemnisaziun per cuvrir ils custs da la furniziun d'electricitad (ICF) ubain sur autras mesiras nuntransparentas. Sch'ina promoziun fiscala duess tuttina vegnir prendida en mira, stuess vegnir integrada en il dretg fiscal ina disposiziun che correspunda a l'art. 5 da l'ordinaziun federala davart ils custs d'immobiglias (CS 642.116).
4. In subvenziunament fiscal d'implants fotovoltaics, ch'è vegnì refusà da la regenza, pudess vegnir cuntanschì mo tras ina revisiun parziala da la lescha da taglia. La midada correspundenta s'effectuass dentant pir a partir dal mument che la nova disposiziun entrass en vigur. Per ina midada en il fratemp manca ina basa legala, ed ina retroactivitad n'è giuridicamain betg pussaivla ed er betg pratitgabla.
20 da zercladur 2012