Il chantun Grischun è commember da l'organisaziun per il marketing da l'economia locala «Greater Zurich Area» (GZA). Questa organisaziun regiunala è ina fundaziun cun ina instituziun responsabla cuminaivla che sa cumpona da corporaziuns publicas e privatas (public private partnership).
L'onn 2011 ha la GZA survegnì nov persunal, e cun sia nova strategia è ella evidentamain sa posiziunada da nov cun success. L'organisaziun focussescha ussa dus segments da clientella: interpresas da la branscha «tecnologia da precisiun» ed interpresas che tschertgan ina sedia principala internaziunala u europeica. Er la collavuraziun da la GZA cun las organisaziuns chantunalas per la promoziun da l'economia locala ha – sco ch'ins auda – survegnì ina nova basa ed è vegnida meglierada fermamain (pooling da resursas).
Questa collavuraziun regiunala dal chantun è da princip da beneventar. Per precisar la tenuta da la regenza envers la GZA supplitgeschan las sutsegnadras ed ils sutsegnaders la regenza da respunder las suandantas dumondas:
1. È la regenza cuntenta cun la nova orientaziun strategica da la GZA?
2. Tge «trumfs» efficazis vesa la regenza per il chantun Grischun en cumparegliaziun cun ils auters chantuns en la GZA, per che interpresas internaziunalas hajan lur sedia principala en il chantun?
3. Co giuditgescha la regenza ils effects secundars da domiciliaziuns en auters chantuns da la GZA (cunzunt er sedias principalas) per il chantun Grischun?
4. Tge avantatgs da concurrenza vesa la regenza areguard interpresas da la tecnologia da precisiun en il chantun?
5. Per fundar ina sedia principala ha tranter auter la situaziun fiscala al lieu futur ina gronda relevanza. Po la regenza s'imaginar en quest connex da far, p.ex. cun l'autoritad da taglia da Turitg u da Zug, activamain in pachet a la «lex Bonny» tenor l'exempel da Genevra e da Friburg?
Samignun, ils 12 da zercladur 2012
Kunz (Cuira), Felix, Geisseler, Barandun, Berther (Camischolas), Bezzola (Samedan), Bezzola (Zernez), Brandenburger, Buchli-Mannhart, Burkhardt, Caluori, Campell, Casanova-Maron, Casty, Casutt, Casutt-Derungs, Clavadetscher, Conrad, Dudli, Engler, Fontana, Furrer-Cabalzar, Gartmann-Albin, Giacomelli, Grass, Gunzinger, Hardegger, Hartmann (Champfèr), Hartmann (Cuira), Heiz, Hitz-Rusch, Holzinger-Loretz, Jaag, Jeker, Jenny, Kappeler, Kasper, Koch (Tumein), Koch (Igis), Kollegger (Cuira), Komminoth-Elmer, Krättli-Lori, Kunz (Fläsch), Mani-Heldstab, Marti, Meyer-Grass, Michael (Castasegna), Michel (Tavau Monstein), Montalta, Nick, Niederer, Nigg, Niggli (Samedan), Papa, Parolini, Parpan, Pedrini, Perl, Peyer, Pfenninger, Righetti, Rosa, Sax, Steck-Rauch, Stiffler (Tavau Plaz), Tomaschett (Breil), Troncana-Sauer, Tscholl, Valär, Vetsch (Claustra Vitg), Vetsch (Pragg-Jenaz), Waidacher, Wieland, Zweifel-Disch, Berther (Segnas), Degonda, Kuoni
Resposta da la regenza
Cun sia strategia ch'ella ha fixà la fin da l'onn 2011 persequitescha la «Greater Zurich Area» (GZA) primarmain l'elavuraziun dals martgads «Stadis Unids da l'America» e «China». Areguard las branschas stat la domiciliaziun d'interpresas da precisiun, cunzunt da l'industria da maschinas, da cleantech e da tecnica medicinala, en il center. Ils martgads principals dal chantun Grischun èn la Germania e l'Italia. Là na vegn la GZA previsiblamain a far naginas atgnas activitads. Quests martgads duain vegnir elavurads en il rom d'ina strategia selectiva, cumpigliond las resursas chantunalas. La realisaziun da questa strategia selectiva cun agid da mesiras en l'Europa, cunzunt en Germania, vegn actualmain discutada cun ils chantuns da la GZA.
Tar la dumonda 1:
En vista a sia quota da finanziaziun da la GZA ha il chantun Grischun correspundentamain ina pitschna impurtanza tar la fixaziun da la strategia a lunga vista. La regenza beneventa ch'il focus vegn mess sin la domiciliaziun d'interpresas dal sectur da la tecnologia da precisiun, ch'è da grond interess per il Grischun. Ils martgads principals dal Grischun pon vegnir elavurads en il rom da la strategia selectiva. L'influenza da la nova strategia generala da la GZA sin domiciliaziuns en il chantun Grischun na po betg anc vegnir giuditgada definitivamain.
Tar la dumonda 2:
La domiciliaziun da sedias principalas è ina sfida speziala. Per il solit sa domicilieschan questas interpresas en l'aglomeraziun, en la vischinanza d'in eroport internaziunal. Il Grischun po sa posiziunar sco lieu economic attractiv cun pretschs d'immobiglias bass e cun pitschens custs da salari, cun ina grevezza fiscala cumpetitiva sco er cun in'auta qualitad da viver en ina natira intacta.
Tar la dumonda 3:
Davart eventuals effects secundars da domiciliaziuns en auters chantuns da la GZA n'èn betg avant maun indicaziuns cumprovadas. Ins po far quint ch'i dettia tals effects. Per exempel en furma d'activitads da temp liber e da vacanzas che vegnan exequidas en il Grischun da las collavuraturas e dals collavuraturs, da la clientella u da giasts da questas interpresas, u tras quai che interpresas grischunas profiteschan sco furnituras.
Tar la dumonda 4:
En il Grischun, en la Val dal Rain songagliaisa vischina, en il Vorarlberg ed en il principadi da Liechtenstein èn insaquantas interpresas activas en il sectur da la tecnologia da precisiun. Quest spazi economic cuntegna potenzial en il sectur dal knowhow da la branscha sco er da la disponibladad da forzas da lavur qualifitgadas. Tras quai ch'ils custs da salari e d'immobiglias èn pli pitschens en il Grischun, s'augmenta la productivitad da las firmas producentas en cumparegliaziun cun las aglomeraziuns svizras. Per las lavurantas e per ils lavurants è la regiun attractiva, perquai che la qualitad da viver è auta ed ils custs da viver relativamain pitschens.
Tar la dumonda 5:
Il model menziunà pudess eventualmain esser interessant per il Partenz davant e per la Mesolcina sco er en singuls cas per il Puschlav, per la Bregaglia e per la Val Müstair. La regiun economicamain la pli ferma, la Val dal Rain grischuna, na sa chatta betg en il perimeter per facilitaziuns fiscalas da la taglia federala directa. La schanza da realisar projects da success vegn valitada tut en tut sco pitschna.
23 d'avust 2012