La Svizra ha ina lescha detagliada davart la lavada da daners suspectus (LLDS). Tgi che vuless pajar summas pli grondas sin contos svizzers, sto far indicaziuns detagliadas davart la derivanza dals daners. Uschia ha la plazza da finanzas svizra pudì vegnir liberada per gronda part da daners illegals. Però ha la lescha davart la lavada da daners suspectus laschà avert differentas largias. Tar la cumpra e tar la gestiun d'immobiglias sco er en il commerzi cun art e cun cliniez na vegn ella betg applitgada.

Sco territoris periclitads u sco lieus en il sectur dal commerzi cun immobiglias vegnan numnads lieus turistics cun ina structura da giasts esters e cun in commerzi d'immobiglias activ. La stgarsezza da la purschida colliada cun il giavisch d'objects da prestige exprimì da giasts esters ritgs stgaffescha in svilup ferm dals pretschs. La consequenza da quest svilup è ch'ils pretschs d'immobiglias perdan en talas regiuns savens la relaziun cun ina valur da martgà suandabla. Il pajament dad uschenumnads pretschs da fantasia è usità en las regiuns turisticas grondas sco p.ex. San Murezzan u Tavau. Uschia po il pretsch vegnir chatschà si senza chaschunar in suspect e l'object da cumpra po vegnir duvrà sco vehichel per lavar daners suspectus. Ch'il commerzi cun immobiglias lavura cun imports fitg gronds renda questa branscha interessanta per lavar daners suspectus.

Sco consequenza dal nov artitgel constituziunal davart la construcziun d'abitaziuns secundaras che fixescha il stadi actual da la purschida d'abitaziuns secundaras en blers territoris grischuns, daventi difficil da prevesair il cumportament dal martgà en quest sectur. Da princip stoi vegnir fatg quint cun in svilup dal pretsch fitg ferm en il sectur da las abitaziuns secundaras, quai che dastgass accentuar la problematica da la lavada da daners suspectus.

Exceptà da la LLDS è er il commerzi d'art. Er en quest sectur po il pretsch cuntanschì d'ina ovra divergiar fermamain da las aspectativas da l'economia da martgà. Grondas destinaziuns turisticas cun ina clientella finanzialmain ferma sco p.ex. l'Engiadina porschan savens la plattafurma, nua che cumpraders e vendiders sa scuntran.

Dapertut, nua ch'ils fluss da daners n'èn betg regulads, nua che bler daner blut gioga ina rolla e nua ch'igl exista in martgà liquid, penetreschan daners betg nets. Investurs esters chattan en il Grischun relaziuns che favuriseschan u faciliteschan la lavada da daners suspectus. Il chantun Grischun sto perquai surpigliar sia responsabladad visavi la Svizra e s'engaschar cleramain cunter la lavada da daners suspectus.

Las sutsegnadras ed ils sutsegnaders supplitgeschan perquai il cussegl grond da prender in conclus direct e da deliberar – sin fundament da l'art. 59 CC – la suandanta iniziativa dal chantun per mauns da l'assamblea federala:

Iniziativa dal chantun: Art. 2 LLDS

Formulaziun da l'iniziativa

Sa basond sin l'artitgel 160 alinea 1 da la constituziun federala inoltrescha il chantun Grischun la suandanta iniziativa dal chantun:

Sa basond sin ils art. 95, 103 e 123 da la constituziun federala supplitgescha il chantun Grischun l'assamblea federala da cumplettar la lescha davart la lavada da daners suspectus cun las suandantas disposiziuns:

Art. 2 LLDS

Al. 1 Questa lescha vala per: (nov)
a. intermediaturs da finanzas;
b. persunas ch'èn activas en il commerzi cun art figurativ, cun metals prezius, cun pedras preziusas u cun immobiglias, sch'ellas pratitgeschan quest commerzi professiunalmain sin agen quint u sin quint ester e sch'ellas prendan encunter en quest connex daner blut d'ina valur considerabla.

Art. 2a Persunas activas en il commerzi cun art figurativ, cun metals prezius, cun pedras preziusas u cun immobiglias
Las persunas tenor l'artitgel 2 alinea 1 litera b ston ademplir las suandantas obligaziuns: (nov)
a. obligaziun d'identificaziun (art. 3);
b. obligaziun per constatar las persunas che han il dretg economic correspundent (art. 4);
c. obligaziun da documentaziun (art. 7);
d. obligaziun d'annunzia (art. 9).

Samignun, ils 13 da zercladur 2012

Müller, Kappeler, Bucher-Brini, Frigg-Walt, Gartmann-Albin, Jaag, Meyer-Grass, Noi-Togni, Peyer, Pfenninger, Pult, Thöny, Trepp, Deplazes, Hensel, Michel (Igis), Monigatti