En la sessiun da december 2010 ha il cussegl grond acceptà l'incumbensa Rathgeb concernent il relasch d'in concept chantunal da sport ed incumbensà la regenza d'elavurar in concept chantunal per promover il sport.
Las sutsegnadras ed ils sutsegnaders tschentan las suandantas dumondas a la regenza:
1. En tge stadi sa chattan las lavurs per il concept per promover il sport?
2. Cura pon ins quintar cun il relasch e cun la realisaziun dal concept per promover il sport?
Cuira, ils 31 d'avust 2012
Zanetti, Koch (Igis), Albertin, Blumenthal, Brandenburger, Bucher-Brini, Casty, Casutt, Cavegn, Davaz, Dermont, Dosch, Fallet, Frigg-Walt, Gartmann-Albin, Geisseler, Grass, Jeker, Joos, Kappeler, Kleis-Kümin, Koch (Tumein), Kollegger (Cuira), Kollegger (Malix), Mani-Heldstab, Märchy-Caduff, Parpan, Sax, Stiffler (Tavau Plaz), Stiffler (Cuira), Thöny, Tomaschett (Breil), Waidacher, Degonda
Resposta da la regenza
L'october 2010 è la regenza sa declerada pronta d'acceptar l'incumbensa Rathgeb concernent il relasch d'in concept chantunal da sport. L'elavuraziun dal concept per promover il sport è cuntegnida en il program da la regenza 2013–2016 sco punct central da svilup 7/18. Correspundentamain èn er vegnidas fatgas differentas lavurs preliminaras. Uschia ha la cumissiun chantunala per promover il sport examinà – ensemen cun instituziuns naziunalas dal sport – pli exactamain ils instruments da promoziun existents sin tut ils stgalims. L'uffizi per la scola populara ed il sport, ch'è cumpetent en chaussa, ha plinavant definì ils champs d'acziun pussaivels ed analisà las disposiziuns legalas existentas.
En connex cun l'elavuraziun da questas basas per il concept chantunal per promover il sport èsi sa mussà ch'il basegn da revisiun è fitg grond, cunzunt tar las ordinaziuns existentas. Perquai è la regenza da l'opiniun ch'i stoppian l'emprim vegnir stgaffidas las cundiziuns generalas necessarias en ina lescha chantunala da sport. Il mument per quai è ideal, cunquai che la confederaziun ha mess en vigur ina nova lescha federala davart la promoziun dal sport e da l'activitad fisica (lescha per promover il sport, LPSpo; CS 415.0) per il 1. d'october 2012. Ina lescha da sport grischuna futura po pia vegnir coordinada en moda optimala ed actuala cun la legislaziun naziunala. En accordanza cun la nova lescha vegn alura elavurà il concept chantunal per promover il sport.
Sut quest aspect respunda la regenza las dumondas tschentadas sco suonda:
1. L'ordinaziun davart la promoziun da gimnastica e sport dals 21 da november 1974 (DG 470.100), l'ordinaziun executiva appartegnenta davart la promoziun da gimnastica e sport (DG 470.150) e l'ordinaziun per las contribuziuns a las organisaziuns chantunalas da sport per "giuventetgna + sport" dals 21 da november 1995 (DG 470.300) èn vegnidas controlladas, sch'ellas èn anc adina adattadas en la pratica. Emprims sbozs per ina lescha grischuna da sport èn avant maun.
2. La regenza ha l'intenziun da dar la pussaivladad als circuls interessads da prender posiziun davart il sboz da la lescha en il decurs da l'onn 2013 e da suttametter la lescha durant l'emprima mesadad da l'onn 2014 al cussegl grond. Sin basa da las novas cundiziuns generalas legalas duai alura vegnir elavurà il concept chantunal per promover il sport.
22 d'october 2012