Dumengia, ils 12 da matg, e dumengia, ils 2 da zercladur 2013, è il traffic sa stagnà sin la A13 en il Mesauc dal suentermezdi baud fin tard en per la saira en ina dimensiun che n'è fin ussa anc mai vegnida constatada. Per part è il traffic sa stagnà sin ina lunghezza da 20 km e dapli! Sin ordinaziun da la polizia è l'utilisaziun da la via chantunala stada reservada al traffic local resp. per eventualas acziuns d'urgenza da la polizia, dals pumpiers e da l'ambulanza. Betg mo blers automobilists domiciliads en la regiun u manischunzs sin via en il Mesauc èn stads bloccads uras a la lunga en la stagnaziun dal traffic, er las consequenzas per l'ambient èn facilmain imaginablas, oravant tut per ina regiun, en la quala la qualitad da l'aria è oramai gia preoccupanta.
Da differentas infurmaziuns ed avis è resultà ch'igl è vegnì rendì attent cun ina tavla avant il spartavias A2-A13 – u pli exact: tranter Bellinzona sid e Bellinzona nord – ad ina stagnaziun dal traffic da 10 km en direcziun dal Gottard, entant ch'i n'è vegnì infurmà en chaussa nagliur sin la A13 sur il San Bernardin, schebain che la stagnaziun dal traffic en il Mesauc è stada bler pli gronda. Ultra da quai è la ruta dal San Bernardin vegnida recumandada en il radio pliras giadas sco alternativa a la ruta dal Gottard.
Perquai sa tschenta la dumonda, sche questas infurmaziuns (faussas) èn vegnidas chaschunadas d'ina negligientscha u sch'ellas han vulì manar intenziunadamain en errur.
Dumondas a la regenza:
1. Ha la regenza enconuschientschas da quai ch'è capità dumengia, ils 12 da matg, e dumengia, ils 2 da zercladur 2013, sin la A13 en il Mesauc?
2. È la regenza grischuna er da l'avis che la dumonda avess da vegnir sclerida – ensemen cun ils posts pertutgads (UVIAS, chantun Tessin, ViaSuisse e sur quels er cun las medias) – pertge ch'ils automobilists n'èn betg vegnids infurmads davart la situaziun dal traffic sin la A13 e pertge ch'il traject dal San Bernardin è vegnì recumandà pliras giadas dal radio sco pussaivladad da guntgir la stagnaziun al Gottard, schebain ch'il traffic en il Mesauc è sa stagnà sin ina lunghezza da passa 20 km?
3. È la regenza pronta, d'elavurar e da realisar eventualas mesiras, per evitar che situaziuns sumegliantas sa repetian?
Cuira, ils 10 da zercladur 2013
Rosa, Fasani, Pedrini, Albertin, Bondolfi, Bucher-Brini, Campell, Casty, Clalüna, Claus, Della Vedova, Engler, Frigg-Walt, Gartmann-Albin, Gunzinger, Hartmann (Champfèr), Heiz, Holzinger-Loretz, Jenny, Koch (Tumein), Kunz (Cuira), Michael (Castasegna), Noi-Togni, Papa, Parolini, Peyer, Pfenninger, Pult, Righetti, Tenchio, Trepp, Troncana-Sauer, Wieland, Zanetti, Buchli (Favugn), Hauser, Monigatti, Motti, Nicolay
Resposta da la regenza
Il chantun Grischun sto cumbatter dapi onns cun l'augment dal traffic sin la via naziunala A13. La grevezza da canera e la qualitad da l'aria èn temas permanents tar la populaziun indigena. A fin d'emnas cun in volumen da traffic spezialmain grond e cunzunt cur che la ruta dal San Bernardin vegn recumandada en il radio per guntgir las stagnaziuns davant ils portals dal tunnel dal Gottard, n'è il traffic sin la A13 quasi betg pli da dumagnar. La stagnaziun al Gottard sposta correspundentamain il traffic sin la A13. Sfurzadamain sa furman là alura er colonnas da plirs kilometers.
Per tegnair liber almain in'axa da salvament vegn il traffic laschà sin la A13. L'axa da salvament è la via chantunala. A Roveredo ed a Mesauc è staziunada mintgamai in'ambulanza. Quellas vegnan er duvradas per il territori en direcziun dal San Bernardin. Ils pumpiers a San Bernardin tgiran il territori fin tar il chastè da Mesauc. Sch'ils pumpiers entran en acziun, vegn serrà il tunnel dal San Bernardin, perquai ch'ils pumpiers fissan atgnamain mo responsabels per la segirezza en il tunnel e quella na fiss betg pli garantida en in tal cas. In ulteriur motiv dapli che l'axa da salvament sin la via chantunala sto restar libra è ch'ils pumpiers possian reagir svelt. Mo sch'ils pumpiers pon returnar svelt a San Bernardin, po il tunnel puspè vegnir avert per la libra circulaziun dal traffic per impedir uschia ina stagnaziun anc pli gronda.
La regenza respunda las dumondas sco suonda:
1. La regenza è vegnida infurmada dal schef dal departament da giustia, segirezza e sanadad, cusseglier guvernativ Christian Rathgeb, davart la situaziun sin la via naziunala A13 en il Mesauc.
2. La polizia chantunala ha gia contactà l'uffizi federal da vias (UVIAS) en questa chaussa. En quai che concerna las pussaivladads da prender influenza en chaussa stoi vegnir renvià al fatg ch'il parlament federal n'ha cun la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) betg mo surdà la proprietad da las vias naziunalas dals chantuns a la confederaziun, mabain er il manaschament dal traffic. Dapi il 1. da schaner 2008 n'èn betg pli ils chantuns responsabels per il manaschament dal traffic sin las autostradas, mabain la confederaziun. Sut la noziun dal manaschament dal traffic vegnan subsummadas tut las mesiras che laschan circular il traffic uschè regular, quiet, liber da disturbis e segir sco pussaivel e cun uschè paucas emissiuns sco pussaivel, q.v.d. tut las cumponentas da la direcziun dal traffic e l'infurmaziun da traffic. Latiers tutgan er recumandaziuns da duvrar vias da guntgida.
A chaschun da sia proxima scuntrada cun la scheffa dal DATEC u cun il directur dal UVIAS vegn il schef dal departament da giustia, segirezza e sanadad a render attent a l'impurtanza dal manaschament dal traffic per nossas regiuns.
3. La regenza sa declera pronta da persvader ulteriurs posts involvids, sche quai è necessari or dal puntg da vista da la polizia chantunala, per pudair evitar sche pussaivel talas situaziuns en il futur.
4 da settember 2013