Tras fanestras da pops han mammas en situaziuns difficilas la pussaivladad da dar lur uffants novnaschids en mauns segirs. En Svizra existan trais fanestras da pops, ina a Tavau, ina a Nossadunnaun ed ina – ch'è vegnida averta pir dacurt – ad Olten. A Nossadunnaun èn otg uffants vegnids mess dapi l'onn 2001 en la fanestra da pops. A Tavau ed ad Olten èn quellas stadas vidas fin ussa. Fanestras da pops pon salvar la vita als novnaschids, ma dus dischavantatgs èn evidents: Dunnas che mettan lur uffant en la fanestra da pops exponan sasezzas e l'uffant ad ina gronda ristga, perquai ch'ellas na survegnan nagin sustegn medicinal durant il part. Plinavant n'ha l'uffant pli tard nagina pussaivladad da survegnir infurmaziuns davart sia atgna derivanza.
Per dunnas en situaziuns da crisa excepziunalas po la naschientscha confidenziala esser in'alternativa tar la naschientscha regulara ch'è suttamessa a l'obligaziun d'annunzia. Durant la dimora en ina clinica u en ina chasa da parturir è la mamma protegida tras in pseudonim. Ses num è dentant enconuschent a la clinica. La mamma e l'uffant survegnan tgira medicinala, e persunas spezialisadas sustegnan las dunnas tar lur ulteriuras decisiuns. Sche l'uffant vegn dà liber per l'adopziun, ha el pli tard la pussaivladad da survegnir infurmaziuns davart sia derivanza. Enconuscher l'atgna derivanza è ina part da l'identitad da mintga uman.
En Germania vegn la naschientscha confidenziala francada proximamain en ina lescha. Cun ina interpellaziun ha la cussegliera naziunala Lucrezia Meier-Schatz incumbensà il cussegl federal d'examinar ed eventualmain da reglar la naschientscha confidenziala. Tenor rapports da medias vegn la naschientscha confidenziala dentant gia pratitgada en diversas clinicas en Svizra. La clinica da dunnas Fontana n'ha – tenor las explicaziuns da las persunas responsablas – anc gì naginas naschientschas confidenzialas.
Per dunnas che vulan u ston tegnair dascus lur gravidanza e lur maternitad è la naschientscha confidenziala in vair agid ed ina vaira alternativa tar la fanestra da pops u tar in abort. Ella duess vegnir pussibilitada en uschè blers ospitals sco pussaivel.
Las deputadas ed ils deputads sutsegnads tschentan perquai las suandantas dumondas a la regenza:
1. È er la regenza da l'avis da las sutsegnadras e dals sutsegnaders che la naschientscha confidenziala è ina buna alternativa tar la fanestra da pops e ch'ella duess vegnir pussibilitada er en il Grischun?
2. Vesa la regenza ina pussaivladad da permetter la naschientscha confidenziala en ils ospitals grischuns?
3. Sche gea, tge mesiras stuessan vegnir prendidas, per che la naschientscha confidenziala possia vegnir purschida e per ch'ella daventia enconuschenta en la publicitad?
Cuira, ils 29 d'avust 2013
Märchy-Caduff, Hardegger, Tomaschett-Berther (Trun), Albertin, Baselgia-Brunner, Berther (Mustér), Bezzola (Samedan), Blumenthal, Brandenburger, Bucher-Brini, Caluori, Casutt-Derungs Silvia, Clalüna, Claus, Darms-Landolt, Davaz, Della Vedova, Dermont, Dosch, Florin-Caluori, Frigg-Walt, Furrer-Cabalzar, Gartmann-Albin, Gunzinger, Holzinger-Loretz, Jaag, Joos, Kleis-Kümin, Kollegger (Cuira), Kollegger (Malix), Krättli-Lori, Kunz (Cuira), Locher Benguerel, Lorez-Meuli, Meyer-Grass, Müller (Tavau Plaz), Niggli-Mathis (Grüsch), Noi-Togni, Papa, Pedrini, Perl, Peyer, Pult, Steck-Rauch, Stiffler (Cuira), Tenchio, Thöny, Tomaschett (Breil), Trepp, Troncana-Sauer, Vetsch (Pragg-Jenaz), Zweifel-Disch, Bürgi-Büchel, Decurtins-Jermann, Degonda, Deplazes, Gugelmann, Monigatti
Resposta da la regenza
La regenza respunda las dumondas tschentadas sco suonda:
1. A dunnas en difficultads pussibilitescha la naschientscha confidenziala da parturir lur uffant cun accumpagnament medical e da survegnir – suenter la pagliola – sustegn psichic e social tras persunas spezialisadas scoladas. La naschientscha confidenziala è pia ina cumplettaziun raschunaivla da las fanestras da pops e vul sustegnair dunnas ch'èn en speranza ed en difficultads.
2. En sia resposta a l'interpellaziun da la cussegliera naziunala Meier-Schatz cun il titel "Naschientscha confidenziala sco sustegn per dunnas ch'èn en speranza ed en difficultads e sco alternativa a fanestras da pops" è il cussegl federal stà da l'avis ch'i na saja betg necessari d'adattar la legislaziun per porscher naschientschas confidenzialas respectivamain discretas en Svizra (Curia Vista 13.3418).
Er la regenza è da l'avis dal cussegl federal. Naschientschas confidenzialas èn pussaivlas gia oz en ils ospitals en il Grischun.
3. Sco gia explitgà en la resposta a la dumonda 2 è la regenza da l'opiniun che naschientschas confidenzialas possian vegnir purschidas gia oz. Mintga ospital cun ina partiziun da naschientschas è liber da render enconuschent a la publicitad ina purschida correspundenta.
Cunquai che la fanestra da pops ch'è avant maun en il Grischun en l'ospital da Tavau n'è anc mai vegnida duvrada e damai ch'i n'èn er enconuschents nagins cas da pops mess a l'abandun, parta la regenza dentant dal fatg che las raits socialas actualas sajan da princip suffizientas.
In basegn d'agir per render enconuschent la pussaivladad da la naschientscha confidenziala n'è pia betg dà ord vista da la regenza.
17 d’october 2013