Ils giuvens liberals han inoltrà l'iniziativa per abolir la taglia da cultus da las persunas giuridicas. Cun dretg crititgeschan els ch'ina interpresa na possia vairamain betg avair ina religiun e na possia uschia er betg vegnir obligada da pajar ina taglia da cultus. En connex cun l'iniziativa dals giuvens liberals che ha la finamira da liberar las persunas giuridicas da la taglia da cultus, ha la regenza argumentà che las baselgias chantunalas na possian betg dumagnar perditas da taglia. In argument ch'è vegnì tratg a strada savens è sta quel ch'il mantegniment e che la renovaziun dals edifizis ecclesiastics ch'èn per il pli istoricamain e culturalmain fitg prezius, daventia pli e pli ina incumbensa finanziala pretensiusa da las baselgias. Er numerusas incumbensas socialas vegnian finanziadas tras las taglias da cultus.
La PLD na dementescha betg quests arguments e renconuscha la situaziun finanziala da las baselgias chantunalas che han l'obligaziun da mantegnair ils bains culturals prezius. Percunter para quest argument che serva a cumbatter l'iniziativa dals giuvens liberals quasi in signal d'alarm, ch'i valess la paina d'examinar pli detagliadamain. La finanziaziun dal mantegniment dals bains culturals prezius da las baselgias chantunalas dastgass vegnir smanatschada en il futur er sche las taglias da cultus restan. Ultra da quai vegnan liads meds finanzials considerabels en quest sectur. Quests meds finanzials liads – ensemen cun auters facturs – difficulteschan puspè d'ademplir vastas incumbensas socialas. La PLD pensa qua al chal dals commembers da las baselgias chantunalas pervia dal grond dumber da religiuns, pervia da l'immigraziun d'autras cuminanzas religiusas, pervia da la diminuziun da las naschientschas e.u.v. Dentant er la prontezza pli e pli pitschna d'appartegnair ad ina baselgia dastga vegnir menziunada; quai sa manifestescha tras l'augment da las sortidas da las baselgias. Ultra da quai daventa la taglia da cultus ch'è da princip fallida per las interpresas er adina pli problematica, sch'ins pensa a las interpresas internaziunalas ch'èn activas en Svizra.
La PLD è pia da l'avis che gia il proxim avegnir vegnia a sa tschentar la dumonda, co che las baselgias chantunalas vegnian a pudair finanziar lur incumbensas. En quest connex ston ins er sa dumandar, quant enavant ch'i dat duplicitads sin quest champ tranter la baselgia ed il stadi; duplicitads ch'i fiss d'evitar.
Las deputadas ed ils deputads sutsegnaders incumbenseschan la regenza da stimar il svilup finanzial a vista mesauna ed a lunga vista per las baselgias chantunalas, d'inditgar las consequenzas pussaivlas e da deducir la ristga finanziala per il stadi e per las baselgias sco er da preschentar las mesiras che resultan da quai e che servan a schliar la problematica a pli lunga vista.
Cuira, ils 21 d'october 2013
Kunz (Cuira), Barandun, Bezzola (Zernez), Burkhardt, Casanova-Maron, Claus, Clavadetscher, Engler, Fontana, Furrer-Cabalzar, Giacomelli, Hartmann (Cuira), Heiz, Hitz-Rusch, Holzinger-Loretz, Jenny (Arosa), Kasper, Krättli-Lori, Kunz (Fläsch), Marti, Michael (Castasegna), Niggli (Samedan), Pfäffli, Rosa, Steck-Rauch, Stiffler (Cuira), Troncana-Sauer, Valär, Vetsch (Pragg-Jenaz), Waidacher, Wieland, Zweifel-Disch, Candrian, Felix (Scuol), Jenny (Claustra), Patt, Schucan
Resposta da la regenza
Dapi l'introducziun da l'uschenumnada taglia da cultus (taglia da baselgia per persunas giuridicas) il 1. da schaner 1959 sa finanzieschan las baselgias chantunalas per gronda part tras questa funtauna. Questa taglia è daventada necessaria, perquai che las duas baselgias chantunalas dal Grischun e blers cumins-baselgia sa chattavan quella giada en ina situaziun finanziala precara, malgrà che las persunas natiralas eran gia suttamessas ad ina ferma grevezza tras la taglia da baselgia. La creaziun da la taglia da cultus ha quella giada meglierà entaifer pauc temp cleramain la situaziun.
Las taglias da cultus che vegnan incassadas vegnan assegnadas a las duas baselgias chantunalas en la proporziun dals commembers tenor il register da taglia da las persunas natiralas. La fin da l'onn 2012 correspundeva questa proporziun a 54,34 % commembers catolics ed a 45,66 % commembers refurmads (cf. missiva da la regenza al cussegl grond, carnet nr. 6/2013–2014, p. 183). Tar la baselgia catolica dal Grischun importa la part da las taglias da cultus actualmain circa 90 % da tut las entradas, perquai che – cuntrari a la baselgia evangelica refurmada dal Grischun – i na vegnan betg incassadas taglias da baselgia da las persunas natiralas.
La regenza è conscienta da las consequenzas finanzialas rigurusas ch'ina eventuala perdita da questas entradas ha per omaduas baselgias chantunalas, e quai tant sin il champ social sco er en ils secturs culturals. Ella renconuscha er il basegn d'agir, sche l'iniziativa dals giuvens liberals per abolir la taglia da baselgia da las persunas giuridicas (taglia da cultus) vegniss refusada ils 9 da favrer 2014.
La regenza è perquai pronta d'acceptar l'incumbensa da fracziun e d'elavurar – en collavuraziun cun las baselgias chantunalas – in rapport ch'inditgescha pussaivladads per finanziar en il futur las incumbensas da nossas baselgias chantunalas.
23 da december 2013