Ils products da latg e da charn èn las pitgas principalas da l'agricultura e da l'economia alimentara dal Grischun. En vista a las sfidas dals proxims onns ha la regenza dà il december 2008 l'incumbensa da far in studi per evaluar ils potenzials dal martgà e per demussar, co ch'il chantun pudess orientar sia politica da promoziun futura.

Ils rapports elavurads mussan d'ina vart cleramain ils connexs principals en l'agricultura ed en l'economia alimentara dal Grischun e preschentan da l'autra vart ina basa essenziala per las decisiuns futuras en la politica agrara chantunala. Il resultat principal è ch'il chantun na po betg midar l'agricultura e l'economia alimentara dal Grischun mo cun in pèr paucas mesiras. La via al success premetta ina branscha dinamica ed innovativa sin blers champs che resguarda il process da marketing e che tschertga cuntinuadamain ed occupa consequentamain nischas dal martgà. Sco basa da decisiun per ina politica da promoziun chantunala vegn recumandà in program d'impuls per sustegnair l'agricultura e l'economia alimentara dal Grischun cun il num "Spezialitads dal Grischun". La finamira da quest program d'impuls duai esser da dinamisar l'agricultura sin blers champs per che la dependenza d'entradas statalas possia vegnir reducida. Il program d'impuls prevesa da sustegnair – sin iniziativa dals acturs – projects singuls sco er stentas cuminaivlas ch'èn orientads vers il martgà, e quai tant cun meds finanzials sco er cun savida e persunal. En quest senn è vegnida formulada en il program da la regenza 2013-2016 il punct central da svilup PS 22/9 che cuntegna tranter auter strategias e meds finanzials per realisar mesiras che han l'intent da promover ils potenzials en l'agricultura ed en l'economia alimentara. Correspundentamain èn er vegnids augmentads ils meds finanzials sin il conto da las mesiras autonomas.

Davart las intenziuns ed ils resultats dal studi sco er davart las mesiras planisadas èsi vegnì infurmà detagliadamain a chaschun da duas occurrenzas publicas che han gì lieu il mars 2010 ed il mars 2012 en il Plantahof. Sa basond sin questas infurmaziuns ha la mazlaria Mark inoltrà l'avrigl 2012 a l'uffizi d'agricultura e da geoinfurmaziun l'idea per il project power beef per la laschar examinar. Fin la primavaira 2013 ha ella alura elavurà il project da realisaziun respectiv.

Dumonda 1: La contribuziun totala da 25 % dals custs da commerzialisaziun, la quala è limitada a 450 000 francs per ils onns 2013-2017, è vegnida empermessa da la regenza sin dumonda da l'uffizi d'agricultura e da geoinfurmaziun e dals departaments. Per l'onn 2013 è vegnida garantida in'emprima part da 90 000 francs.

Dumonda 2: Las contribuziuns vegnan pajadas, sch'igl è avant maun ina cumpilaziun detagliada da las activitads da commerzialisaziun sco er in plan da fatschenta per mintga etappa da contribuziun. Ils documents vegnan examinads da l'uffizi d'agricultura e da geoinfurmaziun. En cas d'in giudicament positiv vegn garantida a maun d'ina disposiziun dal departament mintgamai per etappa ina proxima part da la contribuziun. Il chantun resalva il dretg da sistir u da revocar las contribuziuns, sche las mesiras da commerzialisaziun prendidas na mainan betg a la finamira. Sin ils products da power beef e tar lur commerzialisaziun sto vegnir duvrada la marca graubünden. La preschentaziun da la marca sto vegnir approvada dal departament.
Sco premissa principala per la promoziun vala l'integraziun regiunala dal project. Uschia vegnan creadas tut las valurs en il Grischun, en spezial l'acquisiziun da la materia prima, la meztga, l'elavuraziun e la commerzialisaziun.

Dumonda 3: L'introducziun sin il martgà e las activitads da commerzialisaziun vegnan accumpagnadas d'ina firma da cussegliaziun externa. Per pudair duvrar la marca graubünden è il product vegnì certifitgà dad alpinavera tenor las directivas. L'uffizi d'agricultura e da geoinfurmaziun sco er il departament d'economia publica e fatgs socials han examinà, sch'il project è degn da vegnir promovì.

22 da november 2013