La Viafier retica dispona da set deposits per il persunal da locomotivas en il chantun Grischun. Il deposit per il persunal da locomotivas è il lieu, nua ch'in locomotivist cumenza normalmain la damaun cun ses servetsch. Actualmain sa chattan ils deposits per il persunal da locomotivas a Landquart (88 persunas), Cuira (34 persunas), Tavau (16 persunas), Scuol (12 persunas), Samedan (48 persunas), Puntraschigna (7 persunas) e Puschlav (15 persunas). Ord vista geografica èn quests deposits pia repartids en tut il chantun Grischun, danor en la regiun Surselva. Ultra da quai ha la Surselva fitg paucas plazzas da lavur tar la Viafier retica en cumparegliaziun cun las autras regiuns, cunzunt tar il dumber (creschent) da locomotivists.
Tar la situaziun actuala: Ils ultims trais trens ed ils emprims trais trens dal di vegnan adina manads d'in locomotivist si da Cuira u da Landquart en Surselva ed enavos. Uschia ston quests locomotivists pernottar a Mustér, quai che chaschuna da sia vart custs considerabels per la Viafier retica. Plinavant èn questas pernottaziuns plitgunsch malvesidas tar ils locomotivists, perquai ch'els ston uschia pernottar duas fin trais giadas per mais ordaifer. Betg fitg agreabel per babs resp. mammas da famiglia. Sche Mustér avess ses agen deposit, pudess ins eliminar questas malempernaivladads per ils locomotivists, spargnar custs tar la Viafier retica e rinforzar economicamain il subcenter regiunal Mustér cun in ulteriur deposit per il persunal da locomotivas. Per satisfar als basegns dal manaschi da viafier (trais servetschs la damaun, trais servetschs la saira, in servetsch intermediar per resguardar il temp da paus e dus fin trais servetschs per pudair cuvrir ils dis libers) dovra in deposit per il persunal da locomotivas a Mustér tranter 9 ed 11 unitads da persunal.
Las sutsegnadras ed ils sutsegnaders incumbenseschan la regenza:
1. d'examinar l'installaziun d'in deposit per il persunal da locomotivas a Mustér per eliminar las pernottaziuns charas ordaifer, ch'èn malvesidas tar il persunal, e per crear ulteriuras plazzas da lavur attractivas tar la Viafier retica en la regiun Surselva;
2. d'examinar in deposit per il persunal da locomotivas cuminaivel cun la Viafier Matterhorn-Gottard. Uschia avessan ils lavurants la pussaivladad da surpigliar servetschs da transport per la Viafier Matterhorn-Gottard e per la Viafier retica. Per il persunal da locomotivas a Mustér fiss quai in augment attractiv da la valur da lur plazza da lavur.
Cuira, ils 11 da favrer 2015
Epp, Alig, Deplazes, Albertin, Berther, Caduff, Caluori, Casanova (Glion), Casutt-Derungs, Cavegn, Crameri, Darms-Landolt, Della Vedova, Dosch, Felix (Scuol), Kunfermann, Märchy-Caduff, Noi-Togni, Paterlini, Rosa, Sax, Schneider, Tenchio, Thomann-Frank, Tomaschett (Breil), Tomaschett-Berther (Trun), Waidacher, Andri, Derungs, Lombardi, Tuor
Resposta da la regenza
La Viafier Matterhorn-Gottard ha in pitschen deposit per locomotivists a Mustér, betg dentant la Viafier retica. La Viafier retica ha actualmain set deposits per locomotivists en tut las regiuns dal Grischun, cun excepziun da la Surselva. Ils lieus da quests deposits èn vegnids tschernids sin fundament da ponderaziuns economicas e tenor ils basegns dal manaschi. A las staziuns finalas da la Viafier retica che n'han betg in deposit per il persunal da locomotivas èn previsas pernottaziuns en chombras da servetsch per pudair servir ils emprims resp. ils ultims trens. Quai è tranter auter il cas a Mustér ed ad Arosa.
Tar la pretensiun 1: En cas d'adattaziuns da la purschida vegn mintgamai er examinà resp. analisà il basegn da locomotivists e d'ulteriurs lieus da deposit. Ord purs motivs dal manaschi fiss imaginabel in deposit per locomotivists a Mustér. Quai spargnass pernottaziuns ordaifer; a medem temp giessan dentant er a perder effects da sinergia. La Viafier retica stima ch'ils custs ed ils respargns sa guliveschian pli u main. Ils servetschs dals locomotivists d'in deposit da la Viafier retica a Mustér daventassan qua tras main variants ed uschia main attractivs. Quai pudess chaschunar problems da recrutaziun, en cas ch'ina soluziun cuminaivla cun la Viafier Matterhorn-Gottard na fiss betg pussaivla.
Tar la pretensiun 2: Ord ponderaziuns da la politica regiunala vali la paina d'examinar l'idea d'in deposit cuminaivel per locomotivists da la Viafier Matterhorn-Gottard e da la Viafier retica a Mustér. L'idea cuntegna dentant intginas sfidas per las duas interpresas da transport. En il center stattan las differentas cundiziuns d'engaschament da la Viafier Matterhorn-Gottard e da la Viafier retica sco er il svilup futur dals servetschs da tren da questas duas viafiers tranter Andermatt e Cuira. Plinavant duvrassi scolaziuns supplementaras per las differentas locomotivas da la Viafier Matterhorn-Gottard e da la Viafier retica.
L'examinaziun e la tscherna dals lieus per ils deposits per il persunal da locomotivas sco er in'eventuala realisaziun d'in deposit cuminaivel per locomotivists da la Viafier retica e da la Viafier Matterhorn-Gottard a Mustér è ina incumbensa operativa da las duas interpresas da transport pertutgadas. Ella na tutga betg al champ da cumpetenza dal chantun, uschia che l'incumbensa parlamentara na po betg vegnir acceptada. Tuttina poi dentant vegnir empermess ch'ils posts chantunals cumpetents vegnan a suttametter a la Viafier Matterhorn-Gottard ed a la Viafier retica il giavisch d'in deposit cuminaivel a Mustér en il rom dal barat che ha lieu regularmain.
En il senn da las explicaziuns qua survart propona la regenza da refusar l'incumbensa.
30 d'avrigl 2015