Il provediment medicinal da basa da la populaziun è vegnì tematisà differentas giadas ils ultims onns. Pervia dal svilup demografic èsi previsibel ch'il basegn d'in provediment medicinal da basa vegn a crescher. Perquai che dapli persunas pateschan da malsognas cronicas e multiplas, vegn la populaziun che daventa pli veglia a duvrar prestaziuns medicinalas supplementaras.
La finamira da differentas adattaziuns da la basa legala dals ultims onns (cuntraproposta directa a l'iniziativa dal pievel "Gea a la medischina da famiglia", midada da la lescha davart ils products terapeutics e da la lescha davart las professiuns medicalas) è quella d'integrar meglier las resursas da tut las persunas medicinalas universitaras en l'adempliment dal provediment medicinal da basa. Sin basa da questas ponderaziuns èn las cumpetenzas da las apotecras e dals apotechers vegnidas resguardadas pli fitg per ademplir l'incumbensa dal provediment da basa.
Differents chantuns èn vidlonder d'adattar lur prescripziuns legalas u las han gia adattadas, seguind a questas ponderaziuns da princip. En quest connex sa mussi che vaccinaziuns pon senz'auter vegnir fatgas d'apotecras e d'apotechers. Actualmain è quai però mo pussaivel, sche questas persunas pon preschentar in recept d'ina media u d'in medi. Quai è ina duplicitad nunnecessaria, perquai che apotecras ed apotechers che han frequentà ina furmaziun supplementara respectiva pon en mintga cas furnir questas prestaziuns. Pervia da l'obligaziun vertenta da stuair preschentar in recept na pon las medias ed ils medis da chasa insumma betg vegnir distgargiads.
Las sutsegnadras ed ils sutsegnaders dumondan la regenza, sch'ella fiss pronta da stgaffir las premissas per che vaccinaziuns possian vegnir fatgas en apotecas senza stuair preschentar in recept d'ina media u d'in medi.
Arosa, ils 18 da zercladur 2015
Casanova-Maron (Domat), Caluori, Bucher-Brini, Bondolfi, Brandenburger, Cahenzli-Philipp, Casanova (Glion), Cavegn, Darms-Landolt, Della Vedova, Dosch, Engler, Foffa, Gartmann-Albin, Hug, Jenny, Kunfermann, Marti, Nay, Stiffler (Cuira), Tenchio, Zanetti, Berther (Segnas), Bossi, Tuor
Resposta da la regenza
L'art. 29 al. 1 da la lescha da sanadad prescriva ch'i dovra ina permissiun per pratitgar la professiun per tractar malsognas, blessuras, impediments u ulteriurs disturbis da la sanadad sin agen quint u – en l'atgna responsabladad da spezialist – sin quint d'ina autra persuna. Tenor l'al. 2 suttastattan er apotecras ed apotechers a questa obligaziun da dumandar ina permissiun. Persunas che possedan ina permissiun per pratitgar la professiun ston sa restrenscher – tenor l'art. 23 da l'ordinaziun tar la lescha da sanadad – al champ da lavur che correspunda a la scolaziun ed a la furmaziun supplementara ch'èn specificas per la professiun, sch'ellas pratitgeschan lur professiun. Actualmain na tutga il vaccinar independentamain betg tar ils cuntegns da scolaziun d'ina apotecra u d'in apotecher. Tenor il dretg vertent han perquai mo las medias ed ils medis da princip il dretg da far vaccinaziuns.
Sco l'uffizi federal da sanadad publica (UFSP) parta er la regenza dal fatg ch'ina purschida simpla da vaccinaziuns en apotecas possia augmentar la quota da persunas vaccinadas e possia contribuir uschia ad ina meglra protecziun da la populaziun cunter tschertas malsognas. En sia strategia naziunala davart la prevenziun cunter grippas 2015–2018 propaghescha il UFSP l'installaziun da posts da vaccinaziun cun in access simpel, uschia per exempel er en apotecas.
Correspundentamain è la regenza pronta da midar l'ordinaziun tar la lescha da sanàdad per stgaffir uschia la basa legala, tenor la quala apotecras ed apotechers pon far tschertas vaccinaziuns senza in recept da la media u dal medi. Ina purschida da vaccinaziun simpla na dastga però betg manar ad ina periclitaziun pli gronda da las persunas che vulan sa laschar vaccinar. Er en cas da purschidas da vaccinaziun simplas stoi esser garantì che tut las dumondas medicinalas impurtantas concernent l'indicaziun sajan vegnidas scleridas avant che vaccinar, che eventuals ulteriurs scleriments sajan vegnids fatgs e ch'ils resultats sajan vegnids documentads correspundentamain.
Sa basond sin las enconuschientschas ch'èn vegnidas fatgas en il chantun Turitg vegnan en dumonda vaccins morts ch'ins enconuscha gia dapi blers onns, ch'èn per regla nunproblematics en l'applicaziun e che na chaschunan quasi nagins effects secundars. Vaccins vivs sco p.ex. cunter il virustgel duain percunter vegnir applitgads vinavant da medias e da medis. Tenor il conclus dal cussegl guvernativ dastgan en il chantun Turitg las suandantas vaccinaziuns vegnir fatgas d'apotecras e d'apotechers a partir dal 1. da settember 2015, e quai er senza in recept da la media u dal medi: vaccinaziuns cunter la grippa e cunter l'encefalitis da zeccas sco er las vaccinaziuns consecutivas cunter hepatitis A, hepatitis B e hepatitis A e B, sche l'emprima vaccinaziun è vegnida fatga d'ina media u d'in medi.
Las persunas che dastgan vegnir vaccinadas ston esser saunas e ston avair almain 16 onns. Per giuditgar il stadi da sanadad ston las apotecras ed ils apotechers obtegnair ina scolaziun ed ina furmaziun supplementara correspundenta. Las apotecras ed ils apotechers che vulan survegnir ina permissiun da vaccinar ston disponer d'ina scolaziun e d'ina furmaziun supplementara speziala suffizienta che sto cuntegnair tranter auter il giudicament dal stadi da sanadad concernent la vaccinabilitad d'ina persuna e la moda e maniera da tractar cumplicaziuns. Plinavant ston vegnir fatgas tschertas pretensiuns a l'infrastructura (local serrà), a l'equipament per far vaccinàziuns, a l'equipament per cas d'urgenza, ma er concernent l'orientaziun ed il consentiment da las pazientas e dals pazients sco er concernent la registraziun administrativa.
12 d'avust 2015