Dumonda da la fracziun da la PPS concernent «Exista in basegn d'agir en il sectur d'asil?»
Sessiun: 18.06.2015
Las emnas passadas han las medias publitgà differents rapports davart terrorists ch'entran en pajais europeics sa dond per asilants. Uschia è quai p.ex. capità avant paucas emnas en Norvegia. Diesch persunas, ch'èn commembras d'ina organisaziun terroristica, vulevan entrar en il pajais sur in contingent da fugitivs da la UNHCR.
Questa problematica n'è betg nova. Tenor in artitgel en la gasetta «Schweiz am Sonntag» exista per la confederaziun ina periclitaziun augmentada per terror islamistic. Concretamain: L'emna passada èn sa trategnidas en la Svizra tudestga persunas che han colliaziuns cun il stadi islamic (IS) e che han in potenzial da privel correspundent, ha la confederaziun explitgà vinavant. En las conclusiuns hai gì num ch'ins na stoppia betg sa dumandar «sche», mabain «cura» ch'insatge possia capitar er en Svizra.
Il pli tard dapi il cas en Norvegia fan bleras persunas gronds quitads, sche nossas mesiras da segirezza necessarias èn – en connex cun l'unda da fugitivs – medemamain sin in nivel suffizient.
Grondas parts da la populaziun èn oz fitg malsegiras. Per nus èsi impurtant che la populaziun en il chantun Grischun vegnia infurmada correctamain da vart uffiziala, pertge che la segirezza da las Grischunas e dals Grischuns ha per nus l'emprima prioritad.
Sin basa da la situaziun da partenza actuala sa tschentan – ord vista da la fracziun da la PPS – las suandantas dumondas:
1. Co statti en general cun la segirezza en ed enturn ils alloschis per requirentas e requirents d'asil? Tge incidents (grevezza e frequenza dals acts [chastiabels]) hai dà l'onn 2014 cun asilants?
2. Èn persunas vegnidas prendidas en fermanza en connex cun ils incidents cun asilants? Quant ditg èn quests delinquents stads en arrest? Èn ils delinquents vegnids arrestads pliras giadas? Sche gea, quantas giadas?
3. È la populaziun vegnida infurmada davart tut ils incidents cun asilants? Sche na, pertge betg?
4. Han la periclitaziun augmentada ed ils exempels numnads qua survart (Norvegia) consequenzas concretas per il sectur d'asil en il chantun Grischun? Co giuditgescha la regenza la collavuraziun cun las autoritads federalas cumpetentas per survegnir las infurmaziuns necessarias?
5. Exista ord vista da la regenza anc auter basegn d'agir en il sectur d'asil per pudair garantir vinavant la segirezza da la populaziun?
Arosa, ils 18 da zercladur 2015
Koch (Igis), Brandenburger, Davaz, Hug, Mathis, Nay, Salis, Toutsch, Weber
Resposta da la regenza
1. Las experientschas dals ultims onns mussan che la segirezza en ed enturn ils alloschis collectivs è garantida fitg bain tras il persunal d'assistenza resp. tras las guardias da notg. Las collavuraturas ed ils collavuraturs da l'uffizi da migraziun e da dretg civil (UMDC) èn responsabels per controllar l'access e la preschientscha sco er per intervegnir ed alarmar las organisaziuns d'urgenza en cas da conflicts tranter las abitantas ed ils abitants u en cas d'auters eveniments extraordinaris (p.ex. donns materials). Actualmain datti darar incidents degns da vegnir menziunads. En in alloschi collectiv datti per onn en media dus fin quatter incidents che pretendan l'intervenziun da terzas persunas. Incidents pitschens vegnan liquidads tras il persunal d'assistenza.
Tenor la statistica criminala grischuna 2014 derivavan 4 % da las persunas, ch'èn vegnidas inculpadas pervia da malfatgs en il senn dal cudesch penal, dal sectur d'asil. En il sectur dals narcotics eran quai 3 %. Davart il dumber d'eveniments extraordinaris en ils centers na vegn manada nagina statistica separada.
2. Independentamain dal status tenor il dretg da persunas estras dastgan fermanzas penalas vegnir fatgas mo sin basa da motivs d'arrest legals (art. 217 ss. dal cudesch da procedura penala [CPP]). Sche tals motivs èn avant maun, dependa dal cas singul e vegn decidì da la dretgira chantunala da mesiras repressivas (art. 226 CPP). Il medem vala per la durada da l'arrest. L'onn 2014 èn tschintg requirents d'asil stads mintgamai ina giada en arrest d'inquisiziun. En media ha l'arrest durà 60 dis. En nagins da quests cas n'è l'arrest d'inquisiziun stà en connex cun incidents en ed enturn alloschis per requirentas e requirents d'asil.
3. L'infurmaziun da la publicitad en cas da cumportaments penalmain relevants è reglada en la lescha, independentamain dal status tenor il dretg da persunas estras. En la procedura penala vala da princip l'obligaziun da secretezza (art. 73 CPP). La procura publica resp. la polizia u eventualmain las dretgiras infurmeschan la populaziun er davart eveniments cun requirentas e requirents d'asil en il rom da las prescripziuns da l'art. 74 CPP. Tenor quest artitgel ha l'orientaziun lieu, sch'ella è necessaria per che la populaziun coopereschia al scleriment da malfatgs u a la tschertga da persunas suspectadas (lit. a), per admonir u per quietar la populaziun (lit. b), per rectifitgar annunzias faussas u famas (lit. c) sco er pervia da l'impurtanza speziala d'in cas penal (lit. d). Ultra da quai po la polizia infurmar da sai anora la publicitad davart accidents e davart malfatgs senza inditgar nums (art. 74 al. 2 CPP).
4. Na. Cun las autoritads federalas vegni collavurà da maniera constructiva. Il secretariat da stadi per migraziun (SEM) surdat al chantun las infurmaziuns relevantas davart ina requirenta u in requirent d'asil a chaschun da l'attribuziun da tala u da tal. Areguard l'identificaziun tempriva da simpatisantas e simpatisants dal dschihad ha la polizia chantunala definì ils basegns d'infurmaziun necessaris en collavuraziun cun las autoritads federalas, en spezial cun il servetsch d'infurmaziun da la confederaziun (SIC). Las infurmaziuns vegnan barattadas regularmain, er ordaifer il sectur d'asil. En tscherts cas singuls surdat er il UMDC a la polizia chantunala infurmaziuns davart constataziuns particularas e dispona, sche necessari, eventualas mesiras sco l'assegnaziun d'in lieu da dimora u il scumond d'entrar en in tschert territori.
5. Tenor il giudicament actual fan las autoritads – en il rom dals meds disponibels – tut per garantir il meglier pussaivel la segirezza da la populaziun. Ina segirezza absoluta na po dentant mai vegnir garantida. La regenza beneventass dentant, sche la confederaziun mettess a disposiziun meds pli rigurus per intervegnir cunter requirents d'asil renitents u violents. Ultra da quai sto la confederaziun accelerar las proceduras d'asil e procurar che las spedidas vegnian exequidas en moda consequenta. Per tuts dus puncts s'engaschan la regenza e la conferenza da las directuras e dals directurs chantunals da giustia dapi onns.
2 da settember 2015