Navigation

Inhaltsbereich

Dumonda Hitz-Rusch concernent la cumpetenza per conceder la permissiun per la chasa d'uffants da la fundaziun Therapeion

Sessiun: 16.02.2016

En la chasa d'uffants Therapeion a Zizers vegnan tgirads en ina gruppa d'abitar famigliara uffants e giuvenils grevamain impedids. Quests uffants e giuvenils dependan a 100 % d'agid ester, pateschan da grevs disturbis dal moviment, han attatgas epilepticas betg influenzablas, pon vegnir nutrids mo per ina pitschna part sin via natirala ed èn permanentamain en privel da crudar – pervia da lur malsogna fundamentala – en in stadi critic. Ultra da quai porscha la chasa ch'exista dapi 40 onns preziusas pussaivladads da dar distgargia durant dis u durant emnas a quels geniturs che tgiran a chasa lur uffants impedids. Ils ultims onns ha il Therapeion pudì sentir ina gronda solidaritad en furma da donaziuns cur ch'igl è vegnì enconuschent en las medias che la AI na veglia betg pli finanziar persunas impedidas betg ablas da s'integrar. Tenor ina sentenzia dal tribunal federal sto la AI midar questa pratica e puspè pajar en il futur per uffants e giuvenils impedids betg abels da s'integrar, quai dal tuttafatg a favur da l'instituziun Therapeion.

 

Ma ussa smanatscha in auter privel per la chasa d'uffants Therapeion. Suenter ch'il departament d'educaziun, cultura e protecziun da l'ambient (DECA) aveva concedì il matg 2015 ina permissiun da manaschi fin la fin da matg 2018, silsuenter però declerà sco nunvalaivla e delegà la cumpetenza per conceder la permissiun a l'uffizi dal servetsch social, è il Therapeion ussa, il favrer 2016, qua senza permissiun da manaschi. Quai stgaffescha ina gronda malsegirezza ed intschertezza. Gist per conumans impedids e per lur confamigliars, dentant er per l'instituziun, è quai in stadi insupportabel.

 

En la resposta da la regenza a la dumonda da deputada Florin-Caluori dal favrer 2011, ha la regenza assicurà ch'ils departaments respectivs vegnian a coordinar lur activitads. Ma quai na para betg da funcziunar.

 

Las sutsegnadras ed ils sutsegnaders supplitgeschan perquai la regenza da respunder las suandantas dumondas:

 

1. Tgi è cumpetent per conceder la permissiun da manaschi e per renconuscher la chasa d'uffants Therapeion?

 

2. Pertge è la permissiun ch'è vegnida concedida dal DECA fin la fin dal 2018 puspè vegnida annullada?

 

3. Pertge n'è fin oz la chasa d'uffants Therapeion betg vegnida renconuschida sco subvenziunabla? Quai avess permess da crear las premissas, che la chasa possia vegnir registrada sin la glista da la cunvegna interchantunala davart las instituziuns socialas. Uschia vegnissan ils custs per uffants senza domicil en il chantun Grischun surpigliads dal chantun da domicil respectiv.

 

4. Vesa la regenza pussaivladads per pitschnas instituziuns famigliaras da coordinar meglier la pratica da permissiun e da la simplifitgar areguard la procedura?

 

Cuira, ils 16 da favrer 2016

 

Hitz-Rusch, Casty, Bondolfi, Albertin, Alig, Baselgia-Brunner, Brandenburger, Bucher-Brini, Burkhardt, Caduff, Cahenzli-Philipp (Vaz sut), Casanova-Maron (Domat), Casutt-Derungs, Cavegn, Caviezel (Cuira), Caviezel (Tavau Clavadel), Clalüna, Clavadetscher, Crameri, Darms-Landolt, Davaz, Deplazes, Dosch, Dudli, Engler, Felix (Haldenstein), Felix (Scuol), Gartmann-Albin, Giacomelli, Gunzinger, Heiz, Holzinger-Loretz, Hug, Jaag, Jeker, Jenny, Joos, Kasper, Koch (Igis), Kollegger, Komminoth-Elmer, Kunz (Fläsch), Kunz (Cuira), Kuoni, Locher Benguerel, Lorez-Meuli, Mani-Heldstab, Märchy-Caduff, Marti, Mathis, Michael (Castasegna), Müller, Niederer, Niggli (Samedan), Niggli-Mathis (Grüsch), Noi-Togni, Papa, Paterlini, Pedrini, Perl, Peyer, Pfenninger, Pult, Rosa, Salis, Schutz, Steck-Rauch, Steiger, Stiffler (Tavau Plaz), Stiffler (Cuira), Tenchio, Thomann-Frank, Tomaschett-Berther (Trun), Troncana-Sauer, Valär, Vetsch (Pragg-Jenaz), von Ballmoos, Waidacher, Weber, Widmer-Spreiter, Wieland, Buchli, Cahenzli (Trin Mulin), Fausch, Föhn, Gujan-Dönier, Pfister, Stäbler, Tuor

Resposta da la regenza

Ils 10 da november 2011 ha supplitgà la fundaziun chasa d'uffants Therapeion il departament d'educaziun, cultura e protecziun da l'ambient (DECA) da prender ina decisiun da princip pertutgant la dumonda, sch'i duain vegnir approvadas plazzas supplementaras da scola speziala per la scola-dimora Cuira. La finamira era quella da crear cun questa decisiun las emprimas premissas per fusiunar las fundaziuns scola-dimora Cuira e chasa d'uffants Therapeion e per pudair segirar uschia l'existenza da la chasa d'uffants Therapeion. Cun il conclus nr. 64 dals 31 da schaner 2012 ha la regenza refusà da renconuscher 6 fin 8 plazzas d'abitar internas incl. purschidas da distgargia en furma da plazzas da promoziun e da tgira en il senn da la scolaziun speziala en la chasa d'uffants Therapeion suenter che tala ha fusiunà cun la fundaziun scola-dimora Cuira. Principalmain ha ella declerà ch'il basegn da plazzas da scolaziun speziala u da lunga durada sco er da plazzas da promoziun e da tgira (cunzunt per distgargias durant las vacanzas e durant las fins d'emna) vegnia valità dal chantun sco nunexistent en instituziuns da la scolaziun speziala betg renconuschidas, perquai ch'il basegn possia vegnir cuntentà cun las instituziuns da la scolaziun speziala renconuschidas. In tal basegn vegnia, sch'el saja cumprovà, cuvrì ubain sa referend a mintga cas singul ubain en il rom d'incaricas da prestaziun cun las instituziuns da la scolaziun speziala.

Cun la brev dals 16 da settember 2013 ha la fundaziun chasa d'uffants Therapeion supplitgà la regenza – en il senn d'ina reponderaziun – da revegnir a la decisiun da princip dals 31 da schaner 2012 (conclus nr. 64) concernent la dumonda, sch'i duain vegnir approvadas plazzas supplementaras da scola. Ella ha proponì da resguardar en il catalog da prestaziuns da las scolas spezialas las prestaziuns da la chasa d'uffants Therapeion che mettan l'accent sin "tgira e distgargia" e ch'il chantun renconuschia la chasa d'uffants Therapeion sco instituziun independenta cun dretg da survegnir contribuziuns. Ultra da quai ha ella supplitgà da registrar – a chaschun da la renconuschientscha – la chasa d'uffants Therapeion sco instituziun independenta sin la glista da la cunvegna interchantunala davart las instituziuns socialas (CIIS) sco er da surprender ils custs per las prestaziuns "tgira e distgargia" dals uffants fermamain impedids che han lur domicil en il chantun Grischun.

Cun il conclus nr. 719 dals 8 da fanadur 2014 ha la regenza acceptà la dumonda da reponderaziun. Tranter auter ha ella communitgà a la petenta che la registraziun sin la glista da la CIIS vegnia examinada. Suenter questa decisiun è il DECA entrà en contact cun la fundaziun chasa d'uffants Therapeion ed ha sclerì ulteriuras chaussas. L'uffizi per la scola populara ed il sport (USS) ha dumandà las indicaziuns ed ils documents necessaris per ina registraziun sin la glista da la CIIS. Il process per far tut ils documents necessaris è stà fitg lung e stentus. Pir ils 15 da december 2015 ha la fundaziun Therapeion inoltrà ils ultims documents mancants per ch'il DECA possia examinar, sche la chasa d'uffants Therapeion duaja vegnir suttamessa a la CIIS. Cun l'e-mail dals 18 da december 2015 ha la fundaziun lura fatg la dumonda da prolungar fin la fin da 2015 la permissiun da manaschi ch'era anc currenta.

 Las dumondas tschentadas vegnan respundidas sco suonda:

1. Per la registraziun sin la glista da la CIIS è cumpetent il DECA.

2. Il DECA ha basà la permissiun da manaschi ch'è vegnida relaschada ils 27 da matg 2015, sin l'art. 2 al. 1 lit. a da la lescha davart ils uffants confidads dals 14 da favrer 2007. La cumpetenza per recepir uffants confidads ha dentant expressivamain l'uffizi dal servetsch social. Perquai sto quella disposiziun vegnir remplazzada tras ina disposiziun da l'uffizi dal servetsch social.

3. La disposiziun dal DECA da registrar la fundaziun chasa d'uffants Therapeion sin la glista da la CIIS è en il fratemp vegnida relaschada, e quai sa basond sin ils documents inoltrads.

4. La chasa d'uffants Therapeion è ina instituziun unica. En il Grischun n'existan naginas chasas cumparegliablas. Per tals cas unics ston las premissas specificas vegnir examinadas individualmain. Ina resposta generala concernent la pratica da permissiun na pon ins pia betg dar.

4 da matg 2016