Sa basond sin la lescha per promover il svilup economic en il chantun Grischun (LSE) realisescha il chantun mesiras federalas e surpiglia las obligaziuns per ils projects che vegnan promovids en il rom da la nova politica regiunala da la confederaziun (NPR). Sco part dal program da realisaziun dal Grischun (PR GR) ch'è vegnì concludì cun la confederaziun è il management regiunal (MR) in instrument impurtant per realisar la NPR. L'elavuraziun dal concept MR 2016+ resguarda las prescripziuns da la confederaziun. Las sutsegnadras ed ils sutsegnaders da l'incumbensa citeschan – en extracts – differents rapports e differentas planisaziuns da la regenza e vesan ina cuntradicziun tranter la tenuta formulada là da la regenza e la repartiziun da las resursas persunalas dal MR.

 En quest connex stoi vegnir remartgà che las stentas per sviluppar l'economia locala dal chantun Grischun na sa restrenschan insumma betg mo sin la realisaziun da la NPR. Sco che la regenza ha menziunà en il rapport davart il svilup economic èn ils singuls secturs politics bler pli impurtants per promover il svilup economic che la promoziun dal svilup economic en il senn pli stretg. Quai vala gist er per il rinforzament previs dals centers chantunals e regiunals. Per stgaffir premissas adattadas per l'activitad economica metta la regenza il focus sin il sustegn da singuls puncts, p.ex. cun mantegnair la substanza da la rait da vias sco er cun cumplettar e renovar la rait da vias, cun garantir la purschida dal traffic public, cun metter a disposiziun surfatschas suffizientas, svelt disponiblas e vendiblas en lieus d'ina impurtanza strategica, q.v.d. en lieus interessants per in'activitad economica. Ultra da quai ha lieu ina promoziun considerabla p.ex. en il sectur dal turissem da congress, da la perscrutaziun e dal svilup, da las scolas autas, dals implants da sport d'impurtanza chantunala e naziunala (CISIC/CISIN), u vegnan realisads centers administrativs decentrals, dals quals gist ils centers profiteschan fermamain. Perquai ch'ils meds finanzials èn stgars, na poi betg vegnir pretendì tut dapertut; igl è necessari da priorisar e da focussar l'utilisaziun dals meds finanzials.

Effectivamain na correspundan las regiuns politicas, concludidas dal cussegl grond en connex cun la refurma dal territori, betg als spazis economics funcziunals, entaifer ils quals sa movan ils sviluppaders regiunals che lavuran en il rom dal MR. Quai è suboptimal, perquai ch'impuls da creschientscha ston derivar dad acturs da l'economia privata e perquai che projects impurtants naschan sin basa dals interess e da las relaziuns economicas d'in spazi economic. Gist en ils spazis economics Val dal Rain grischuna e Tavau/Partenz, che vegnan tranter auter numnads en l'incumbensa, pari dad esser urgentamain necessari che quests spazis creschian ensemen pli fitg en quest reguard e ch'i vegnia elavurada ina chapientscha cuminaivla per il svilup futur.

Areguard l'autezza e l'utilisaziun dals meds finanzials impundids per il MR ston
vegnir observadas las prescripziuns da la confederaziun. In'adattaziun dal concept MR 2016+ en il senn formulà da las sutsegnadras e dals sutsegnaders da l'incumbensa na vegn perquai betg ad esser pussaivla. La regenza è plinavant da l'avis che gist ils spazis economics economicamain ferms sajan en cas da finanziar cun agens meds las resursas persunalas che surpassan las capacitads messas a disposiziun en il rom dal MR. I n'è betg inditgà da cuvrir questas incumbensas communalas tras resursas chantunalas supplementaras, cumbain che l'effect dal svilup da l'economia locala sin plaun communal sa manifestescha per regla en in spazi da provediment che surpassa ils cunfins communals.

Ord vista da la regenza na duain meds finanzials chantunals betg vegnir impundids per resursas persunalas supplementaras, mabain plitgunsch per finanziar projects ch'èn impurtants per il svilup da l'economia locala regiunala, sch'els vegnan realisads, e che pudessan uschiglio far naufragi, perquai ch'ina finanziaziun totala manca. Il cussegl grond ha mess a disposiziun meds finanzials en il rom da credits d'impegn. En il rom da projects sustegnids en tala moda pon eventualmain er vegnir imputadas resursas persunalas per sviluppar e per manar projects. Sch'ils meds finanzials, ch'èn tut en tut restrenschids, vegnan applitgads uschia, è quai pli effizient ed effectiv che da finanziar plazzas ch'èn da crear da nov, ed i restan dapli meds per realisar projects.

La regenza desista perquai da metter a disposiziun ordaifer la NPR – sco atgna activitad – resursas finanzialas en il rom dal svilup da l'economia locala cun l'intent da finanziar capacitads persunalas supplementaras en tscherts territoris dal chantun economicamain ferms. La regenza renda attent ch'igl è gia vegnì inizià in concept per rinforzar ils centers (center principal, centers cun attracziun internaziunala e centers regiunals). Quel vegn elavurà cun la participaziun dals sviluppaders regiunals e resguardond ils differents secturs politics, las pussaivladads en il rom da la lescha per promover il svilup economic sco er ils resultats da la discussiun en connex cun il rapport davart il svilup economic e davart il concept dal territori. La regenza propona perquai da refusar l'incumbensa.

29 da zercladur 2016