Navigation

Inhaltsbereich

Dumonda Casutt-Derungs concernent il svilup da plazzas centralas e decentralas tar l'administraziun chantunala

Sessiun: 14.06.2016

Il chantun Grischun è in patrun grond ed impurtant che porscha er in grond dumber da plazzas da lavur decentralas. Displaschaivlamain stoi vegnir constatà che servetschs vegnan adina puspè transferids da las regiuns a Cuira. In exempel è la decisiun prendida dacurt da dischlocar la centrala dal clom d'agid sanitar 144 da Glion a Cuira. In auter exempel è l'introducziun dal scanning da tut ils documents d'ina decleraziun da taglia sin palpiri, che vegn medemamain centralisada a Cuira. En las regiuns sa dumondan ins tge che suonda sco proxim, forsa ils cumissariats da taglia, forsa ils uffizis da stadi civil, forsa ils ospitals?

 

Las sutsegnadras ed ils sutsegnaders supplitgeschan la regenza da respunder las suandantas dumondas, er sut l'aspect da la strategia chantunala d'immobiglias ch'è vegnida fixada:

 

1. Co è sa sviluppà ils ultims 5 onns il dumber da plazzas da lavur dal chantun (en equivalenzas da plazzas a temp cumplain) en las differentas regiuns?

 

2. Tge consequenzas han tut las decisiuns da centralisaziun – che la regenza ha prendì durant questa perioda – per il dumber da plazzas a temp cumplain en las regiuns?

 

3. Cun la strategia d'immobiglias vuleva la regenza tranter auter examinar, sche singuls posts da servetsch possian vegnir spustads da Cuira en centers administrativs regiunals. Quants posts da servetsch èn vegnids dischlocads da Cuira en tge regiun e cun tge dumber da plazzas a temp cumplain dapi la fixaziun da la strategia d'immobiglias?

 

4. Ston ins quintar ch'i vegnian previs ulteriurs spustaments da plazzas da las regiuns a Cuira, ch'èn actualmain nunenconuschents a la publicitad?

 

Cuira, ils 14 da zercladur 2016

 

Casutt-Derungs, Caduff, Michael (Donat), Alig, Atanes, Berther (Mustér), Blumenthal, Bondolfi, Brandenburger, Bucher-Brini, Buchli-Mannhart, Burkhardt, Caluori (Cuira), Casanova (Glion), Casty, Crameri, Danuser, Darms-Landolt, Dosch, Epp, Fasani, Florin-Caluori, Foffa, Gartmann-Albin, Geisseler, Jenny, Joos, Koch (Tumein), Kunfermann, Märchy-Caduff, Müller, Niggli-Mathis (Grüsch), Noi-Togni, Papa, Paterlini, Pedrini, Peyer, Rosa, Salis, Sax, Schneider, Stiffler (Tavau Plaz), Tenchio, Thomann-Frank, Tomaschett (Breil), Weber, Widmer-Spreiter, Zanetti, Berther (Segnas), Bossi, Caluori (Zizers), Degiacomi, Föhn, Gugelmann, Natter, Schmid

Resposta da la regenza

En la dumonda vegni constatà ch'il chantun saja in patrun grond ed impurtant che porschia er in grond dumber da plazzas da lavur decentralas. Quai è correct e duai er restar uschia tenor l'avis da la regenza. Plazzas decentralas pon dentant vegnir stgaffidas u mantegnidas mo, sch'il funcziunament da l'administraziun na vegn betg restrenschì e sch'ils custs na vegnan betg augmentads memia fitg. Plinavant vegni constatà en la dumonda che servetschs vegnian adina puspè transferids da las regiuns a Cuira. Areguard ils exempels numnads stoi vegnir remartgà il suandant:

La centrala dal clom d'agid sanitar 144 vegn dischlocada il pli tard per il 1. da schaner 2018 da Glion a Cuira e manada tras l'uffizi da sanadad. Ils suandants motivs han incità la regenza a questa decisiun:

• En vista a sia funcziun centrala sco post da coordinaziun per ils fatgs da salvament ha la segirezza da manaschi da la centrala 144 ina impurtanza prioritara.

• Sche la gestiun vegn surdada ad ina terza part, è il chantun dependent da quella, uschia che la segirezza da manaschi e la segirezza respectiva dal provediment da la populaziun e dals giasts na pon eventualmain betg vegnir garantidas.

• La centrala 144 è l'element central dal provediment medicinal en cas d'urgenza en il chantun. Sin la glista da las infrastructuras criticas da la Svizra maina l'uffizi federal da protecziun da la populaziun las centralas d'acziun dals servetschs da salvament sin il medem stgalim sco las centralas da la polizia e dals pumpiers, che duain trair a niz sinergias tranter ellas.

• Uschenavant che quai è enconuschent vegnan las centralas dal clom d'agid sanitar manadas en tut ils auters chantuns dal maun public sez.

Il scanning da las decleraziuns da taglia è ina nova incumbensa per elavurar e per archivar las actas fiscalas sin via electronica e betg in servetsch ch'è vegnì transferì da la periferia a Cuira. In scanning decentral na fiss betg stà realisabel. Quai è er vegnì discutà en il cussegl grond ed è stà incontestà. Correspundentamain n'ha il cussegl grond betg acceptà l'incumbensa Casanova (Glion) concernent il svilup tar las taxaziuns da taglia (PCG dals 11 da favrer 2015, paginas 672 ss.).

Tar las dumondas:

1. L'evaluaziun statistica da l'uffizi da persunal mussa ils pensums da lavur dals engaschaments en equivalents a temp cumplain (FTE) en las singulas regiuns en il decurs dals onns 2012 fin 2016.

- 

En il decurs dals onns preschentads han gì lieu tut en tut mo fitg pitschens spustaments resp. las quotas regiunalas dals engaschaments chantunals èn stadas vaira constantas. En la regiun Plessur cun la chapitala chantunala Cuira hai dà ina pitschna reducziun. Entant ch'ina quota da 62,67 % lavurava l'onn 2012 en la regiun Plessur, era quai l'onn 2016 anc ina quota da 62,16 %. Quai vul dir ch'igl ha dà durant quest temp in pitschen spustament dal center en las regiuns.

2. En general poi vegnir constatà ch'il volumen d'engaschament è s'augmentà ils ultims 5 onns en tut las regiuns, cun excepziun da la regiun Alvra. Entaifer la perioda preschentada han las autoritads regiunalas per la protecziun d'uffants e da creschids (APUC) cumenzà cun lur lavur. Plinavant ha il chantun avert alloschis collectivs dal sectur d'asil (46 novs engaschaments u 33,9 FTE a Cazas, Tavau, Laax, Litzirüti, Mustér, Trimmis, Schluein e Val Müstair [Valchava]). Ultra da quai resultan en la regiun Viamala 109 plazzas tras il nov stabiliment giudizial serrà ch'è actualmain en construcziun, ed a Cuira vegnan reducidas circa 25 plazzas.

3. La finamira da la strategia chantunala d'immobiglias è quella da realisar en l'entir Grischun nov centers regiunals en lieus ch'eran gia pli baud centers administrativs. Tras la concentraziun sin centers administrativs regiunals duain vegnir cuntanschids in meglier niz per la clientella, dapli effizienza e standards da lavur moderns. In'ulteriura decentralisaziun resp. spustaments da posts da servetsch da Cuira en las regiuns n'èn betg stads en discussiun.

4. Novs spustaments da plazzas n'èn actualmain ni enconuschents ni planisads. Las incumbensas pon dentant sa sviluppar uschia, ch'i daventa necessari da las ademplir en moda pli centrala, sco p.ex. en il sectur da las taglias, quai ch'è dentant gia enconuschent.

17 d'avust 2016