Navigation

Inhaltsbereich

Incumbensa Müller concernent la creaziun da pussaivladads da vendita per energias regenerablas sco la forza idraulica

Sessiun: 15.06.2016

La branscha d'energia è d'accord en ina chaussa: Las capacitads d'accumulaziun èn la valuta electrica da l'avegnir. Las producziuns or da funtaunas d'energias regenerablas sco or da l'aua, dal sulegl e dal vent, ch'ins na po betg planisar, ston vegnir accumuladas per las pudair duvrar confurm als basegns. Gist stgaudaments electrics e boilers èn accumulaturs d'energia ch'èn sa cumprovads en la pratica e ch'èn ina vaira alternativa a soluziuns cun battarias. Quests accumulaturs èn però scumandads tenor l'art. 10 da la lescha d'energia vertenta. La regulaziun menziunada datescha d'in temp, en il qual ins discurriva d'ina mancanza smanatschanta d'electricitad. En il fratemp è capità il cuntrari: en l'entira Europa datti electricitad avunda, ma a medem temp exista ina mancanza da capacitads d'accumulaziun. Il scumond da stgaudaments electrics e d'installaziuns electricas directas per stgaudar l'aua da diever na fa nagin senn en vista a la situaziun actuala sin il martgà d'energia.

 

A medem temp sto er vegnir reponderà il scumond da stgaudaments electrics directs. La forza idraulica en general e pia er la forza idraulica grischuna è actualmain en ina profunda crisa che smanatscha sia existenza. Quellas ovras che n'han betg clientella finala ch'è obligada da retrair lur energia, ston vender lur energia a pretschs fitg bass sin il martgà d'electricitad. A medem temp scumonda l'art. 10 da la lescha d'energia dal chantun Grischun vertenta da duvrar electricitad per stgaudar u – sco menziunà survart – per producir aua chauda. Perquai na pon ins betg chapir, pertge che la vendita da l'electricitad che vegn producida en ovras idraulicas indigenas u en in'autra moda netta, vegn limitada, entant che quest current sto vegnir "regalà" al martgà d'electricitad.

 

Omadus giavischs satisfan a l'artitgel d'intent da la lescha chantunala d'energia che pretenda in'utilisaziun effizienta, persistenta, economica ed ecologica da l'energia.

 

La regenza vegn incumbensada da midar bainbaud l'art. 10 da la lescha d'energia vertenta en quel senn, che la limitaziun da l'accumulaziun e dal consum d'electricitad netta vegnian eliminads.

 
Cuira, ils 15 da zercladur 2016

 

Müller, Joos, Alig, Aebli, Buchli-Mannhart, Caduff, Casty, Casutt-Derungs, Clalüna, Danuser, Epp, Felix (Haldenstein), Felix (Scuol), Grass, Gunzinger, Hardegger, Hitz-Rusch, Holzinger-Loretz, Hug, Kasper, Koch (Tumein), Koch (Igis), Kollegger, Komminoth-Elmer, Kuoni, Lamprecht, Lorez-Meuli, Mathis, Michael (Donat), Niggli (Samedan), Niggli-Mathis (Grüsch), Papa, Pedrini, Schutz, Stiffler (Tavau Plaz), Stiffler (Cuira), Troncana-Sauer, Waidacher, Widmer-Spreiter, Bossi, Föhn, Gugelmann, Gujan-Dönier, Natter, Padrun-Valentin, Pfister

Resposta da la regenza

L'incumbensa pretenda da midar proximamain l'art. 10 da la lescha d'energia (LEG; DG 820.200) en quel senn, ch'i vegnia eliminada la restricziun, tenor la quala i stoppia vegnir duvrada electricitad netta per l'accumulaziun e per il consum d'electricitad da stgaudaments electrics da resistenza fixs. L'incumbensa vegn motivada cun il fatg, che las capacitads d'accumulaziun dals tips da producziun d'energia volatila (cunzunt vent e fotovoltaica) sajan impurtantas e che l'electricitad saja avant maun en surabundanza.

Pertutgant il sectur da l'effizienza energetica ston ils chantuns – tenor l'art. 9 al. 3 da la lescha federala d'energia (LEn; CS 730.0) – relaschar tranter auter prescripziuns davart il diever da stgaudaments electrics da resistenza fixs. En l'art. 10 LEG è vegnida realisada questa incumbensa legislativa. La regulaziun, tenor la quala novs stgaudaments electrics da resistenza sco er novas installaziuns electricas directas per stgaudar l'aua chauda da diever en edifizis d'abitar èn da princip inadmissibels, correspunda a la regulaziun dal model da prescripziuns energeticas dals chantuns, las uschenumnadas MoPEC (missiva dals 12 da schaner 2010 tar la LEG, carnet nr. 8/2009 – 2010, 283 ss., 322). Il motiv per quai è che la producziun da chalur cun agid d'applicaziuns d'electricitad è ineffizienta. Ina pumpa a chalur dovra p.ex. mo ca. in terz da l'energia d'in stgaudament electric.

Ultra da l'effizienza energetica aspira la politica actuala da clima e d'energia a la substituziun dals purtaders d'energia fossils tras energias regenerablas. Questa finamira po bain er vegnir cuntanschida cun installaziuns electricas da producziun da chalur che funcziunan cun electricitad netta. Ma quai è ina pretensiun che na po betg vegnir realisada en il rom da la legislaziun da construcziun (prescripziuns energeticas da construcziun). Pussaivel fiss quai mo cun ina prescripziun da manaschi. Quai signifitgass che la maschaida d'electricitad da tut las consumentas ed ils consuments che possedan stgaudaments electrics, stuess vegnir controllada periodicamain (p.ex. annualmain). Quai chaschunass lavur e custs sproporziunads en connex cun l'execuziun.

I constat ch'igl èn necessarias per il provediment segir cun energia electrica cunzunt avunda capacitads da prestaziun e d'accumulaziun, ultra d'intervenziuns da la tecnica regulativa. Plinavant ston las raits da provediment esser concepidas cun transfurmaturs correspundents uschia, ch'ils records necessaris pon vegnir ademplids. L'installaziun pli e pli frequenta da stgaudaments electrics na gulivescha dentant betg la curva da dumonda. Uschia vegnissan installads cunzunt stgaudaments directs (p.ex. stgaudaments a glisch infracotschna), perquai che quests stgaudaments èn bler pli bunmartgads pertutgant l'investiziun en cumparegliaziun cun stgaudaments accumulativs e pon ultra da quai vegnir montads en moda relativamain simpla. Quests stgaudaments fissan dentant gist quel mument en funcziun (stagiun d'enviern), cur che l'energia da la forza idraulica pudess anc vegnir vendida detg bain sin il martgà. Ina tala regulaziun sto vegnir considerada sco fallida ord vista da la forza idraulica. Er tar la producziun da l'aua chauda na sa midass betg bler, sch'ins aboliss l'art. 10 LEG, perquai ch'igl è permess gia oz da producir la stad l'aua chauda cun agid dal diever d'electricitad.

La regenza enconuscha fitg bain il martgà actual difficil. Cun l'aboliziun da l'art. 10 LEG na sa laschan dentant betg mitigiar questas difficultads. A vista mesauna avess quest proceder – sco gia menziunà – per consequenza ch'i vegniss amplifitgada l'infrastructura da rait, che la segirezza dal provediment vegniss difficultada considerablamain, cunzunt en la mesadad fraida da l'onn, cur ch'ils implants da fotovoltaica e las ovras idraulicas produceschan pauca energia e cur che a medem temp èn en funcziun ils stgaudaments electrics. Perquai ch'ins sto partir dal fatg, ch'i na vegnissan strusch installads stgaudaments accumulativs, percunter fitg blers stgaudaments directs, na morda l'argument da l'accumulaziun betg. Ultra da quai stuess ins garantir – cun agid da prescripziuns da manaschi che chaschunassan lavur e custs sproporziunads – ch'i vegniss duvrada mo energia regenerabla. Resguardond tut ils avantatgs e dischavantatgs propona la regenza da refusar l'incumbensa Müller.

31 d’avust 2016