Tar la dumonda 1:
Per las 12 vischnancas che fissan pertutgadas il pli fitg resulta la suandanta part dals tschains d'aua vi da las entradas fiscalas (basa: cifras da la gulivaziun da finanzas 2017, per las entradas fiscalas da las persunas natiralas e giuridicas vegn prendida la media aritmetica dals onns 2013 e 2014 e per ils tschains d'aua la media dals onns 2014 e 2015): Farera 634 pertschient, Runtgaglia 414 pertschient, Ziràn-Reschen 409 pertschient, Buseno 333 pertschient, Sufers 285 pertschient, Avras 266 pertschient, Medel (Lucmagn) 253 pertschient, Andeer 213 pertschient, Casti-Vargistagn 190 pertschient, Donat 139 pertschient, Val Stussavgia 128 pertschient e Rossa 126 pertschient.

Tar la dumonda 2:
Ina reducziun dal tschains d'aua maximal ed uschia da las entradas or dals tschains d'aua n'avess – tut tenor l'autezza da la reducziun – betg mo consequenzas seriusas per bleras vischnancas concessiunaras, mabain da medema maniera er per il chantun. Las midadas avessan ultra da quai consequenzas per la gulivaziun da finanzas entaifer il chantun. La nova gulivaziun da finanzas grischuna resguarda er las perditas tar ils tschains d'aua ed ha ina funcziun impurtanta, perquai ch'ella gulivescha tendenzialmain las midadas dals tschains d'aua. Pli debla ch'ina vischnanca è, e tant pli ferm che quest effect da gulivaziun è. La cumpensaziun respectiva po cuntanscher fin 50 pertschient.

En cas d'ina perdita da tschains d'aua s'augmentass ultra da quai il volumen da la gulivaziun da las resursas. Qua surpigliassan il chantun stgars 80 pertschient e las vischnancas cun bleras resursas var 20 pertschient. La forza da las resursas da las vischnancas che n'han nagins tschains d'aua (da num) ed uschia naginas perditas da tschains d'aua (da num) vegniss augmentada cumpareglià cun las autras vischnancas. Pervia da las midadas tar la gulivaziun da finanzas stuessan ellas medemamain furnir prestaziuns da solidaritad ensemen cun il chantun. La repartiziun da las grevezzas tranter las vischnancas daventass uschia – sco resultat – bler pli guliva.

Tar la dumonda 3:
Ensemen cun las regenzas dals auters sis chantuns da muntogna sco er dals chantuns Argovia e Berna è la regenza gia s'engaschada fin ussa intensivamain cunter ina reducziun dal tschains d'aua maximal. En las fasas vegnintas vegn ella a s'engaschar er vinavant energicamain cunter ina reducziun.

Tar la dumonda 4:
Sco explitgà en la resposta a la dumonda 2 avessan perditas da tschains d'aua da num consequenzas seriusas per las vischnancas e per il chantun. Ils mecanissems da gulivaziun en cas da perditas dal retgav da las vischnancas èn reglads sur la gulivaziun da finanzas entaifer il chantun. In'adattaziun da la lescha davart il dretg da las auas ed uschia ina grevezza supplementara da las finanzas chantunalas, sper las perditas dal retgav che s'effectueschan directamain, na fiss betg supportabla e na correspundess er betg als mecanissems da la gulivaziun da finanzas grischuna. Sch'il chantun surpigliass perditas dals tschains d'aua da las vischnancas, chaschunass quai plinavant in ulteriur spustament da las grevezzas da finanziaziun davent da las vischnancas al chantun, quai che violass la directiva da la politica da finanzas dal cussegl grond concernent la renunzia a spustaments da grevezzas. Per motivs da la politica d'energia duess vegnir mantegnida la repartiziun d'ina mesadad dals tschains d'aua sin las vischnancas e da l'autra mesadad sin il chantun.

La nova regulaziun dals tschains d'aua sin plaun federal vegn a s'effectuar a partir da l'onn 2020. A partir da l'onn 2020 cumenza ultra da quai ina nova perioda da gulivaziun da finanzas da 4 onns da la confederaziun (NGF). Qua stoi vegnir quintà cun damain contribuziuns per ils chantuns che survegnan daners da la NGF. Las vischnancas na vegnan betg tangadas da questas perditas. Il chantun vegn pia confruntà per quest termin cun ulteriuras grondas perditas dal retgav.

En vista a questa situaziun da partenza n'ha il chantun betg la libertad d'agir necessaria per surpigliar ulteriuras grevezzas. Anzi, il chantun vegn ad esser sfurzà da prender il pli tard per quest termin mesiras da spargn per distgargiar las finanzas chantunalas.

16 da november 2016