Cun l'incumbensa da cumissiun qua avant maun duai la regenza vegnir incumbensada d'ina vart da preschentar ina survista, co che la cumpetenza da decider davart il plan directiv chantunal è reglada en auters chantuns (en il Grischun è cumpetenta la regenza sin basa da l'art. 14 al. 2 da la lescha davart la planisaziun dal territori per il chantun Grischun dals 6 december 2004 [LPTGR]). Da l'autra vart vegni pretendì che la regenza giuditgeschia ils avantatgs ed ils dischavantatgs dals differents models da cumpetenza ord vista dal chantun Grischun.

La regenza è pronta d'acceptar e d'ademplir questa incumbensa da cumissiun. L'occasiun sa porscha en il rom da la revisiun da la LPTGR ch'è actualmain en lavur, sco quai ch'i vegn er proponì en l'incumbensa da la CPSS. Tant la survista pretendida dals differents models da cumpetenza ch'existan en la pratica areguard il plan directiv sco er il giudicament pretendì dals avantatgs e dals dischavantatgs dals differents models ord vista dal Grischun vegnan integrads en la missiva correspundenta tar la LPTGR al cussegl grond.

Da menziunar èsi che la cumpetenza areguard il plan directiv chantunal "Abitadi", che vegn actualmain elavurà (realisaziun LPT 1), sa drizza tenor il dretg chantunal vertent e na duess betg vegnir tangada da l'incumbensa qua avant maun. Sch'ins spetgass numnadamain fin a la revisiun currenta da la LPTGR, na fissi betg pussaivel d'observar il termin da l'art. 38a al. 1 da la lescha federala davart la planisaziun dal territori per relaschar il plan directiv chantunal "Abitadi", resguardond il temp ch'è necessari per la procedura d'approvaziun tar il cussegl federal. Sche quest termin na vegniss betg observà, vuless quai dir ch'i na dastgassan vegnir determinadas insumma naginas zonas da construcziun (moratori per enzonaziuns). Per il svilup da noss chantun fiss quai in grond impediment.

La tematica da la cumpetenza da decider davart il plan directiv chantunal è dal rest vegnida discutada en il cussegl grond gia en il rom da las revisiuns da la LPTGR da l'onn 1986 (PCG matg 1986, p. 155 ss.) e da l'onn 2004 (missivas da la regenza al cussegl grond, carnet nr. 3/2004-2005, p. 294 ss.; PCG 2004/2005, p. 307 ss.). Quellas giadas era la cumpetenza vegnida laschada tar la regenza. A chaschun da la revisiun da l'onn 2004 èsi almain vegnì fixà en la LPTGR che la regenza stoppia preschentar periodicamain al cussegl grond in rapport davart dumondas dal svilup dal territori, per pussibilitar in dialog politic davart l'organisaziun dal territori tranter la regenza ed il parlament. L'atun 2014 è alura vegnì suttamess al cussegl grond – sco basa da discussiun – il concept dal territori per il Grischun sco cumponenta strategica surordinada dal plan directiv chantunal "Abitadi". Quai per ademplir ina intervenziun ch'il deputà Marcus Caduff aveva inoltrà en la sessiun d'avust 2013.

La regenza propona d'acceptar l'incumbensa da cumissiun en il senn da las consideraziuns.

8 da mars 2017