Questa proposta da prender in conclus direct vegn suttamessa tenor l'artitgel 50 da la lescha davart il cussegl grond dals 8 da december 2005. L'artitgel numnà permetta al cussegl grond da prender ina decisiun "en il sectur da sia atgna cumpetenza" davart propostas da las deputadas e dals deputads.
Cun la proposta qua avant maun vegni pretendì da midar l'artitgel 82 da l'urden da gestiun dal cussegl grond dal chantun Grischun cun agiuntar in alinea 4 (nov). La nova formulaziun che na mida nagut vid ils alineas 1, 2 e 3 è la suandanta:
Art. 82, al. 1…., 2....,3…..
" 4 La furmla da sarament e quella d'empermischun vegnan adina prelegidas en las trais linguas chantunalas, independentamain da la lingua da la persuna che presta il sarament u l'empermischun."
Motiv da la proposta
L'act dal sarament u da l'empermischun da las deputadas e dals deputads è in mument solen. D'ina vart è el d'impurtanza materiala perquai ch'el effectuescha in'obligaziun giuridica envers il chantun ed envers la populaziun, da l'autra vart rinforza el er il sentiment d'appartegnientscha al chantun, al qual sa referescha il simbol sco tal. Uschia èsi incontestà che quest act pretenda la chapientscha e la conscienza cumplaina da la persuna che presta il sarament u l'empermischun. Medemamain èsi incontestà che quest act stabilescha ina relaziun tranter la legislativa e la regiun d'origin da la persuna che presta il sarament u l'empermischun. I sa tracta damai d'in act che pertutga tut il chantun e sia populaziun. L'impurtanza e la dignitad da quest act pretendan l'execuziun correcta. Che questa pretensiun saja vegnida ademplida en il decurs dals onns, na po betg vegnir affirmà. Savens èsi vegnì tralaschà – en preschientscha d'ina deputada u d'in deputà da lingua taliana – da preleger la furmla en talian. Tras la furmla proponida vegni evità che quai sa repetia, damai che quella sto vegnir applitgada sistematicamain e simplifitgescha uschia er la procedura. La prelecziun dovra maximalmain 30 secundas dapli temp.
Nus supplitgain perquai il cussegl grond d'acceptar questa proposta da prender in conclus direct.
Cuira, ils 7 da december 2016
Noi-Togni, Hartmann, Crameri, Atanes, Baselgia-Brunner, Berther (Mustér), Bleiker, Bondolfi, Bucher-Brini, Buchli-Mannhart, Cahenzli-Philipp, Casty, Clalüna, Darms-Landolt, Della Vedova, Deplazes, Dermont, Epp, Felix (Scuol), Florin-Caluori, Gartmann-Albin, Giacomelli, Heiz, Hitz-Rusch, Holzinger-Loretz, Kollegger, Locher Benguerel, Michael (Castasegna), Monigatti, Niederer, Papa, Perl, Peyer, Pfenninger, Pult, Schneider, Stiffler (Tavau Plaz), Tenchio, Thöny, Tomaschett-Berther (Trun), Troncana-Sauer, Zanetti, Antognini, Lombardi