Suenter la restructuraziun da la direcziun dal museum d'art dal Grischun vul la fracziun da la PS incumbensar la regenza da nominar in post d'annunzia extern per il persunal chantunal. Sco exempel vegn numnà en l'incumbensa la Viafier retica. Quella haja in post da cussegliaziun e d'annunzia extern ed haja fatg bunas experientschas cun tal.

Scleriments tar la Viafier retica han mussà che quest post d'annunzia confidenzial n'è betg in post d'annunzia per whistleblowing, mabain per augmentar la cultura da segirezza. Grazia a l'annunzia d'acziuns e da stadis malsegirs u da quasi-accidents duai vegnir augmentada la segirezza.

Tar l'administraziun chantunala existan oz differents posts da consultaziun. En collavuraziun cun ils servetschs psichiatrics dal Grischun maina l'uffizi da persunal l'emprim post da consultaziun per cussegliaziun psicologica. La cussegliaziun stat a disposiziun a tut las collavuraturas ed a tut ils collavuraturs per las suandantas situaziuns u dumondas: mulesta sexuala, mobing, discriminaziun, problems psichics pervia da la lavur (sco p.ex. burnout, dependenza) u dumondas d'egualitad.

Tenor l'art. 21 al. 2 da la lescha davart la surveglianza da las finanzas (LSFi), che regla la cooperaziun e l'obligaziun d'annunzia, ston mancanzas d'ina impurtanza finanziala fundamentala e considerabla vegnir annunziadas immediatamain a la controlla da finanzas. L'art. 18 LSFi regla plinavant il proceder en cas d'acts chastiabels. Quests dus artitgels èn la basa per annunziar internamain eventualas incunvegnientschas a la controlla da finanzas.

Tar il departament da construcziun, traffic e selvicultura exista dapi il cumenzament da l'onn 2015 plinavant in post da consultaziun central per annunziar cunvegnas da submissiun sco er indizis da corrupziun.

Ina structura generala protegida n'exista betg fin ussa per whistleblowing. Sa basond sin il rapport d'ina gruppa da lavur interna ha la regenza desistì l'onn 2010 da pronunziar ulteriuras regulaziuns concernent whistleblowing. Questa decisiun era vegnida motivada tranter auter cun il fatg ch'il dretg da persunal vertent n'impedescha betg las collavuraturas ed ils collavuraturs d'infurmar directamain la scheffa u il schef dal departament e na restrenschia er betg la pussaivladad da sa drizzar a la proxima u a la surproxima persuna superiura. La pratica vertenta – dad ir sur las persunas superiuras – duai vegnir mantegnida. In post d'annunzia per whistleblowing pudess promover in denunziantissem ed ina cultura correspundenta da disfidanza.

Sin basa dal fatg che l'administraziun chantunala dispona gia da differents posts d'annunzia, na vesa la regenza actualmain nagin basegn d'agir acut d'introducir in post d'annunzia supplementar intern u extern. La regenza vegn a persequitar vinavant ils svilups entaifer l'administraziun, ma er en auters chantuns ed en las citads. En il rom da la proxima revisiun totala da la lescha dal persunal vegn ella a far in nov giudicament ed ad integrar il resultat da tal en il sboz da consultaziun.

Sa basond sin questas explicaziuns propona la regenza da refusar l'incumbensa da la fracziun.

20 d'october 2017