Navigation

Inhaltsbereich

Dumonda Bucher-Brini concernent la finanziaziun da la centrala dal clom d'agid sanitar 144 en il chantun Grischun

Sessiun: 18.10.2017

Tenor l'art. 34 al. 3 da la lescha per promover la tgira da persunas malsaunas ston persunas che vegnan transportadas d'in servetsch da transport en cas d'urgenza e d'ambulanza che appartegna ad in ospital public e ch'è vegnì alarmà dal post da coordinaziun central (centrala 144), sa participar als custs da gestiun dal post da coordinaziun. L'autezza da la participaziun vegn fixada da la regenza. L'import fixà sto vegnir mess a quint da l'ospital (per il servetsch da salvament resp. per la basa d'ambulanza) e transferì a la centrala 144.

Il motiv per questa regulaziun è stada ina stretga finanziala da ca. 200 000 francs tranter ils custs da gestiun effectivs per la centrala 144 e la contribuziun da gestiun dal chantun l'onn 2010 (CR nr. 670 dals 07-07-10). La calculaziun dals custs da gestiun ha mussà quella giada che las prestaziuns da servetsch che vegnan pretendidas dal chantun (particularmain l'occupaziun cun 2 persunas durant il di, observond la lescha da lavur), n'èn betg finanziablas cun la contribuziun da gestiun vertenta.

Ma quella giada è la regenza mo stada pronta d'augmentar la contribuziun da gestiun a la centrala 144 per 80 000 francs, e quai en il rom da l'adattaziun a la chareschia. Ils custs restants èn vegnids adossads a las pazientas ed als pazients a chaschun da la revisiun parziala da la lescha per promover la tgira da persunas malsaunas per il 01-01-12 e renviond al princip dal chaschunader. La pauschala da disposiziun è vegnida fixada l'onn 2012 sin 27 francs per transport.

Cun il CR nr. 523 dals 31-05-16 ha la regenza concludì da laschar surpigliar la gestiun da la centrala dal clom d'agid sanitar 144 il pli tard a partir dal 01-01-18 a l'uffizi da sanadad sez. Quai cun custs supplementars da 150 000 francs, ch'èn er vegnids motivads.

Questa soluziun è vegnida finanziada cun augmentar la pauschala da disposiziun a 50 francs per il 01-01-17.

Il clom d'agid da la polizia 117 ed il clom d'agid dals pumpiers 118 vegnan finanziads tras meds finanzials dal maun public. Perquai sa tschenta la dumonda pertge che la centrala dal clom d'agid sanitar 144 vegn adossada als chaschunaders respectivamain a persunas malsaunas e disgraziadas. Tant pli che tut quests numers da telefon èn numers d'urgenza.

Tenor noss savair è il chantun Grischun l'unic chantun cun ina tala soluziun. En tut ils auters chantuns vegnan ils numers d'urgenza finanziads mo dal maun public.

Las sutsegnadras ed ils sutsegnaders tschentan perquai las suandantas dumondas a la regenza:

1. Co giuditgescha la regenza il fatg che en il Grischun, sco unic chantun en Svizra, ston persunas malsaunas e disgraziadas pajar ina participaziun als custs da la gestiun da la centrala dal clom d'agid sanitar 144 che vegn manada dal chantun sez?

2. È er la regenza da l'avis ch'ins duess empruvar da cuntanscher ina regulaziun unitara per tut ils numers d'urgenza (117, 118 e 144) e che la finanziaziun stuess succeder per tuts tras il chantun?

3. È la regenza pronta da midar la regulaziun legala existenta pertutgant la finanziaziun da la centrala dal clom d'agid sanitar 144 e d'integrar tut ils custs da gestiun en il preventiv ordinari dal chantun?

4. È la regenza pronta da crear ina regulaziun transitorica fin che la midada da la lescha è vegnida fatga?

Cuira, ils 18 d'october 2017

Bucher-Brini, Geisseler, Niggli-Mathis (Grüsch), Alig, Atanes, Baselgia-Brunner, Blumenthal, Bondolfi, Brandenburger, Caduff, Cahenzli-Philipp, Caluori, Casty, Casutt-Derungs, Cavegn, Caviezel (Cuira), Clavadetscher, Danuser, Darms-Landolt, Deplazes, Dermont, Dosch, Epp, Fasani, Gunzinger, Holzinger-Loretz, Jaag, Jeker, Kunfermann, Lorez-Meuli, Mani-Heldstab, Märchy-Caduff, Marti, Monigatti, Niederer, Noi-Togni, Paterlini, Perl, Peyer, Pfenninger, Pult, Salis, Steiger, Tenchio, Thomann-Frank, Thöny, Tomaschett-Berther (Trun), Troncana-Sauer, von Ballmoos, Widmer-Spreiter, Berther (Segnas), Bonderer, Decurtins-Jermann, Degiacomi, Lombardi, Padrun-Valentin, Pfister, Ruckstuhl

Resposta da la regenza

Tenor l'art. 34 al. 3 da la lescha per promover la tgira da persunas malsaunas (LTM; DG 506.000) ston persunas sa participar als custs dal post da coordinaziun central (centrala 144), sch'ellas vegnan transportadas d'in servetsch da transport en cas d'urgenza e d'ambulanza che appartegna ad in ospital public e ch'è vegnì alarmà da la centrala 144. L'import fixà da la regenza sto vegnir mess a quint da l'ospital e tramess al post da coordinaziun central.

Tenor l'art. 31c al. 1 da l'ordinaziun tar la lescha per promover la tgira da persunas malsaunas (OLTM; DG 506.060) ston vegnir messas a quint las suandantas pauschalas per las acziuns che vegnan disponidas da la centrala 144: 50 francs per acziuns primaras dal stgalim d'urgenza 1 e 2 e 30 francs per tut las autras acziuns.

Tenor ils scleriments da l'uffizi da sanadad ston persunas sa participar er en auters chantuns als custs da la centrala 144, sch'ellas vegnan transportadas dals servetschs da transport en cas d'urgenza e d'ambulanza che appartegnan ad in ospital public, uschia per exempel en ils suandants chantuns: 

-
Tar la dumonda 1: Sco mussà qua survart n'è il chantun Grischun betg il sulet chantun, nua che persunas ston sa participar als custs da la centrala 144, sch'ellas vegnan transportadas dals servetschs da transport en cas d'urgenza e d'ambulanza che appartegnan ad in ospital public. Almain ils chantuns Lucerna, Son Gagl, Tessin, Turgovia e Vallais enconuschan medemamain ina tala participaziun.

Er la centrala 144 dal chantun Turgovia vegn manada en quest connex tras il chantun, sco part da la centrala chantunala d'alarm. En il chantun Lucerna vegn la centrala 144 manada da l'ospital chantunal. Il chantun Son Gagl ha surdà la gestiun da la centrala 144 a la "Rettung St. Gallen", il chantun Tessin a la "Federazione Cantonale Ticinese Servizi Ambulanze (FCTSA)" ed il chantun Vallais a l'organisaziun chantunala da salvament dal Vallais.

Tar la dumonda 2: Na. Ils numers d'urgenza servan a differents intents. Entant ch'i vegnan clamadas – tras il clom d'agid da la polizia – atgnas forzas d'acziun, ha la centrala 144 l'incumbensa d'alarmar e da clamar il proxim servetsch da salvament disponibel. Quai cun la finamira da procurar per in emprim tractament e per in'assistenza optimala dals pazients d'urgenza al lieu e da garantir in provediment medicinal cumpetent durant lur transport. Ils custs da manaschi da la centrala 144 èn ina part dals custs dals servetschs da salvament. Ils custs da transport e da salvament ch'ils assicuraders da malsauns na ston betg surpigliar, ston vegnir pajads da las persunas transportadas. La regenza è damai da l'avis ch'i saja consequent da laschar surpigliar las persunas transportadas almain ina part dals custs da la disposiziun tras la centrala 144, cunquai ch'ellas profiteschan directamain da l'alarm e da la clamada dals transports en cas d'urgenza e d'ambulanza.

Tar la dumonda 3: Na. La regenza è da l'avis ch'ina participaziun da las persunas che vegnan transportadas d'in servetsch da transport en cas d'urgenza e d'ambulanza che appartegna ad in ospital public als custs da gestiun da la centrala 144, saja giustifitgada e ch'ina tala saja inditgada en il senn da la cofinanziaziun da mesiras spezialas tras ils chaschunaders respectivamain da prestaziuns spezialas tras lur profitaders tenor l'art. 5 da l'ordinaziun da finanzas dal chantun Grischun (DG 710.110). La participaziun da las persunas transportadas als custs è commensurada en la cumparegliaziun interchantunala.

Tar la dumonda 4: Na. Sin fundament da la resposta a la dumonda 3 n'è ina regulaziun transitorica betg necessaria.

21 da december 2017