Navigation

Inhaltsbereich

Dumonda Baselgia-Brunner concernent l'amnestia fiscala pitschna en il chantun Grischun

Sessiun: 05.12.2017

Dapi il 1. da schaner 2010 è l'amnestia fiscala pitschna en vigur en Svizra. Tgi che denunzia in'atgna omissiun fiscala, sto pajar taglias supplementaras ed in tschains da retard per ils ultims 10 onns. En cas d'ierta vegnan resguardads ils ultims 3 onns avant la mort. In'autodenunzia nunchastiabla sin fundament da l'amnestia fiscala pitschna po vegnir fatga mo ina giada.

A la dumonda da «10 vor 10» concernent l'amnestia fiscala pitschna han respundì 19 chantuns. Betg dentant il chantun Grischun.

Ord vista da las sutsegnadras e dals sutsegnaders sa tschentan perquai las suandantas dumondas:

1. Quantas autodenunzias èn vegnidas fatgas dapi l'onn 2010 en il chantun Grischun en tut e repartì sin ils singuls onns?

2. Quant auta è – sin basa da l'amnestia fiscala – la summa
- da facultads vegnidas a la glisch?
- d'entradas betg suttamessas a la taglia?

3. Quant auta è la summa da las taglias supplementaras ch'èn resultadas da questas facultads e da questas entradas sin fundament d'autodenunzias?

4. Ha il chantun avunda resursas da persunal per elavurar ils dossiers da taglia pertutgads?

Cuira, ils 5 da december 2017

Baselgia-Brunner, Peyer, Atanes, Bucher-Brini, Cahenzli-Philipp, Caviezel (Cuira), Deplazes, Jaag, Kollegger, Locher Benguerel, Monigatti, Noi-Togni, Perl, Pfenninger, Pult, Thöny, Antognini

Resposta da la regenza

La dumonda da "10 vor 10" è entrada tar il departament da finanzas e vischnancas l'avantmezdi dal di d'emissiun ed avess stuì vegnir respundida il medem di. Per motivs da temp n'è quai betg stà pussaivel. L'administraziun chantunala da taglia eruescha mintga onn il dumber da cas, l'autezza da las entradas e da las facultads decleradas sco er las taglias supplementaras resultantas. Questas indicaziuns vegnan rendidas accessiblas a las medias sin dumonda e publitgadas er quest onn en las medias localas e naziunalas.

Tar las dumondas 1–3: Per respunder las dumondas 1 fin 3 vegnan cumpiladas las cifras correspundentas en la tabella qua sutvart. Per ils onns fiscals pli vegls n'èn las indicaziuns betg avant maun en il grad da precisaziun pretendì, uschia ch'ellas èn vegnidas resumadas.

-
Tar la dumonda 4: Il ferm augment da las autodenunzias da l'onn passà ha laschà crescher considerablamain las pendenzas; quellas na pon betg vegnir reducidas immediatamain cun il persunal existent, cunquai ch'i ston vegnir curregids fin a 10 onns fiscals pro autodenunzia. La regenza vegn perquai ad examinar da crear ina plazza temporara u d'occupar dublamain ina plazza che vegn libra l'onn proxim en consequenza d'in pensiunament. Uschia pon d'ina vart vegnir realisadas entradas supplementaras considerablas er per las vischnancas, da l'autra vart po vegnir stgaffida segirezza giuridica per ils pajataglias pertutgads.

8 da favrer 2018