Navigation

Inhaltsbereich

Incumbensa Michael (Donat) concernent la legalisaziun dals transports d'animals en l'agricultura

Sessiun: 06.12.2017

En l'agricultura dal chantun Grischun èn transports d'animals d'ina impurtanza centrala. Animals vegnan manads si e giu da las alps, transportads tar aclas, ad exposiziuns sco er a martgads ed anc bler auter pli. Ils transports d'animals vegnan fatgs dals possessurs sezs, dal vischin sco agid al vischin, d'auters purs u d'in transportader a titel professiunal. Ils tips da vehichels da transport van dal tractor cun char da muaglia sur la remortga fin al camiun. Savens èn ils transports d'animals viadis cuminaivels cun animals agens ed esters. Ils viadis cuminaivels sco er la tscherna dal med da transport èn motivads principalmain da la topografia multifara dal Grischun sco chantun da muntogna cun sias vals, cun ses vitgs, cun sias aclas e cun sias alps perifericas.

Tenor ils art. 2 e 150 da l'ordinaziun federala davart la protecziun dals animals (OPAn) èsi scumandà als purs da transportar animals esters senza avair absolvì supplementarmain ina scolaziun u in perfecziunament. L'art. decisiv 150 è en vigur dapi il settember 2013 e vegn exequì suenter in temp transitoric. Ils detagls èn remartgads en las «Prescripziuns generalas per il transport d'animals d'ungla sco er da giaglinom» da l'Associaziun svizra da las veterinarias chantunalas e dals veterinaris chantunals. La cumpilaziun da las basas legalas e da las explicaziuns serva a l'infurmaziun da las persunas ch'èn involvidas en connex cun ils transports d'animals e sco agid d'execuziun per ils organs da la polizia e dal servetsch veterinar ch'èn incumbensads cun l'execuziun. Per l'agricultura grischuna èn las mesiras previsas d'ina impurtanza economica radicala!

Ina legitimaziun dals transports d'animals sur la protecziun dals animals cun far la differenza tranter proprietad e nunproprietad n'è betg chapaivla. Questa legitimaziun dependa da la qualificaziun e betg da la dumonda da proprietad. Il pur pratitgant è – grazia a sia cumpetenza centrala ed a sia experientscha – abel da transportar animals agens ed esters.

Savend che las prescripziuns per il transport d'animals vegnan regladas da princip tras il dretg naziunal incumbensain nus la regenza:

1. d'adattar ils cuntegns da la furmaziun a la Scola d'agricultura Plantahof uschia, ch'ellas èn suffizientas per in transport d'animals a titel professiunal. Ils purs che han fatg la furmaziun fundamentala agricula han suenter il dretg da dastgar transportar animals agens ed esters senza ulteriurs curs da scolaziun, da perfecziunament e da repetiziun.

2. da conceder als purs pratitgants – pervia da lur cumpetenza e pervia da lur experientscha – il dretg da transportar animals agens ed esters en noss chantun, e quai senza curs da scolaziun, da perfecziunament e da repetiziun.

3. da realisar l'incumbensa en atgna cumpetenza profitond da la libertad d'agir giuridica ch'è avant maun.

Cuira, ils 6 da december 2017

Michael (Donat), Niggli (Samedan), Darms-Landolt, Albertin, Alig, Berther (Mustér), Bleiker, Bondolfi, Brandenburger, Buchli-Mannhart, Caduff, Caluori, Casty, Casutt-Derungs, Clalüna, Danuser, Della Vedova, Deplazes, Dosch, Epp, Fasani, Felix (Scuol), Geisseler, Giacomelli, Grass, Gunzinger, Hardegger, Heinz, Hitz-Rusch, Jeker, Koch (Tumein), Komminoth-Elmer, Kunfermann, Lamprecht, Lorez-Meuli, Mani-Heldstab, Märchy-Caduff, Mathis, Müller, Niederer, Niggli-Mathis (Grüsch), Papa, Salis, Sax, Steck-Rauch, Stiffler (Tavau Plaz), Tomaschett (Breil), Tomaschett-Berther (Trun), Toutsch, Valär, Vetsch (Claustra Vitg), Vetsch (Pragg-Jenaz), von Ballmoos, Widmer-Spreiter, Berther (Segnas), Engler (Surava), Pfister

Resposta da la regenza

Tenor l'art. 15 al. 2 da la lescha davart la protecziun dals animals (LPAn; CS 455) e tenor l'art. 150 da l'ordinaziun davart la protecziun dals animals (OPAn; CS 455.1) sto, tgi che transporta animals a titel professiunal e che sa cumporta uschia sco ina interpresa da transport, avair ina scolaziun speziala. Uschia è, uschenavant ch'i na vegnan betg transportads mo ils agens animals, il transport a titel professiunal la premissa decisiva concernent l'obligaziun da scolaziun. In transport a titel professiunal è avant maun tenor l'art. 2 OPAn, sch'il transport vegn indemnisà cun daners u en naturalias (p.ex. per cuvrir las expensas) u sche quai è intenziunà e sch'il transport vegn fatg cun ina tscherta regularitad.
Tenor l'art. 3 al. 1 da la lescha federala davart l'admissiun d'interpresas al transport sin via (LAITV; CS 744.10) dovra, tgi che vul pratitgar l'activitad sco interpresa da transport sin via en il traffic da rauba, ina permissiun d'admissiun (licenza). Per transports cun cumbinaziuns da vehichels, dals quals il pais maximal tenor il document dal vehichel importa max. 3,5 tonnas, na dovri nagina licenza. Tgi che vuless ina licenza, sto esser fidà, sto avair las capacitads finanzialas respectivas e l'adattaziun professiunala correspundenta (certificat professiunal; art. 4 ss. LAITV). Resguardond la cunvegna davart il traffic terrester tranter la Svizra e la UE (CTT) n'exista nagina obligaziun d'avair ina licenza per transports cun tractors cun ina sveltezza maximala admessa da max. 40 km/h (tenor il document dal vehichel, tractor signalisà correspundentamain) e per transports en il traffic da lavur. Da traffic da lavur sa tracti però mo, sch'ils agens animals vegnan transportads. A chaschun d'ina controlla sto il transportader pudair cumprovar il traffic da lavur cun documents accumpagnants.
- Sch'i vegnan pia duvradas cumbinaziuns da vehichels cun in pais total admess da passa 3,5 tonnas u tractors cun ina sveltezza maximala admessa da passa 40 km/h dastgan – tenor la definiziun dal "traffic da lavur" – vegnir transportads mo agens animals, cas cuntrari dovri ina licenza tenor la LAITV.
- Sch'i vegnan duvradas cumbinaziuns da vehichels cun in pais total admess da maximalmain 3,5 tonnas u tractors cun ina limitaziun da la sveltezza a maximalmain 40 km/h dovra ina scolaziun mo, tgi che transporta animals esters a titel professiunal q.v.d. cunter indemnisaziun e cun ina tscherta regularitad. En quest reguard èsi nunproblematic e permess da transportar senza scolaziun agens animals sco er mintgatant animals esters (p.ex. en il senn d'in servetsch per il vischin).

Da vart dal chantun n'èsi betg pussaivel da porscher – en il rom da la scolaziun da basa al pur – tut ils cuntegns spezials che adempleschan las pretensiuns tant a la licenza tenor la LAITV sco er a la scolaziun tenor la LPAn. D'ina vart n'ha il Plantahof betg maun liber en quai che concerna ils cuntegns da la furmaziun. Quai è chaussa da la OdML AgriAliForm (organisaziun dal mund da lavur cun diesch organisaziuns commembras dal champ professiunal da l'agricultura e da l'industria da chavals) en collavuraziun cun la confederaziun e cun ils chantuns. Ils cuntegns da la furmaziun fundamentala agricula èn determinads definitivamain en in plan d'instrucziun ed han per mintga onn d'emprendissadi ina concepziun structurada ch'è fixada en in plan da furmaziun liant per tut la Svizra. Il sectur dals roms d'elecziun è definì mo en quai che reguarda la dimensiun e betg en quai che reguarda il cuntegn. La OdML stuess però decider ch'ina permissiun speziala possia vegnir cuntanschida en il rom da l'instrucziun dals roms d'elecziun. Da l'autra vart è il basegn dals purs fitg differenta en quai che reguarda ils transports, tut tenor regiun sco er categoria da vehichel u tip da transport. Per la gronda part dals transports d'animals ch'in pur cun agen manaschi fa na dovri nagina qualificaziun speziala. Purs che vulan far transports, che van sur quai ora e per ils quals i existan pretensiuns spezialas tenor la LAITV u tenor la LPAn, duain far la furmaziun supplementara correspundenta ordaifer la furmaziun fundamentala. Uschia vegni er garantì che purs ed auters transportaders a titel professiunal vegnian tractads en moda eguala.

Il chantun sto observar il dretg federal surordinà e sto sa mover entaifer las disposiziuns menziunadas qua survart. En atgna cumpetenza na po el betg fixar u realisar regulaziuns che divergeschan da quai resp. conceder "dretgs" correspundents.

Sa basond sin questas consideraziuns propona la regenza al cussegl grond da refusar questa incumbensa.

1. da mars 2018