Immobiglias han ina gronda impurtanza per il chantun. Ellas servan a l'administraziun e gidan ad ademplir las incumbensas statalas (facultad administrativa) ubain furman ina investiziun finanziala (facultad finanziala). Las immobiglias en la facultad finanziala garanteschan retgavs a lunga vista senza grondas ristgas e servan – en cas da basegn – per far barats strategics. Sch'i manca l'interess per il chantun, pon ins sa deliberar relativamain svelt dad ellas e las plazzar sin il martgà. Correspundentamain extendan las immobiglias da la facultad finanziala considerablamain la libertad d'agir dal chantun en il sectur dal manaschament d'immobiglias.

Sche las immobiglias vegnan appurtadas u transferidas en la facultad finanziala, sclerescha l'uffizi da construcziun auta la dumonda davart la valur a media fin a lunga vista da l'immobiglia respectiva. Cun agid d'in process d'evaluaziun standardisà vegn fatga mintgamai in'appreziaziun generala dal bain immobigliar, resguardond differents criteris ed interess ord vista dal chantun (tranter auter basegn, potenzial, situaziun, productivitad, impurtanza politica). Il resultat da questa procedura d'evaluaziun serva a la regenza sco basa da decisiun impurtanta per vender u per disfar l'immobiglia examinada.

Tar la dumonda 1: Igl è previs da consegnar ad investiders interessads en il dretg da construcziun, eventualmain per part a proprietad, las immobiglias che vegnan libras suenter la midada en l'edifizi administrativ "sinergia". Questas immobiglias èn bain situadas ed han potenzial da svilup.

Tar la dumonda 2: La planisaziun da lur occupaziun a Cuira n'è anc betg terminada. Tenor il stadi actual vegnan las immobiglias a la Loëstrasse e l'edifizi da chemia al Hofgraben sco er la villa Brügger al Stadtgartenweg consegnadas en il dretg da construcziun, eventualmain per part a proprietad. Cun consegnar questas immobiglias che na vegnan betg pli duvradas dal chantun pervia da la construcziun dal nov edifizi "sinergia", sa lascha reducir sensiblamain il dumber d'edifizis da l'administraziun chantunala ed ils custs periodics annuals da mantegniment e da gestiun pon vegnir spargnads.

Tar la dumonda 3: Per ils edifizis a la Loëstrasse vegn realisada – sin la basa d'in studi da realisabladad – ina concurrenza d'investiders cumparegliabla cun quella per l'areal dal Sennhof. En questa zona d'abitar sensibla èsi da gronda impurtanza da realisar ina procedura che garantescha la qualitad. La consegna da quests bains immobigliars duai vegnir fatga en il dretg da construcziun. La clera finamira è l'agiudicaziun ad in project urbanisticamain ed architectonicamain persistent per in tschains dal dretg da construcziun confurm al martgà.

L'edifizi da chemia e la Villa Brügger èn sut protecziun e ston vegnir mantegnids en lur substanza. Midadas da construcziun e reparaturas èn pussaivlas en stretga enclegientscha cun las autoritads da la citad e cun la tgira da monuments. Premess vegni ch'i vegnia tractà cun quità cun quest effectiv. La garanzia da la qualitad ha lieu en il rom da la procedura per la permissiun da construcziun.

Tar la dumonda 4: Il president da la citad è vegnì orientà dal president da la regenza davart las immobiglias dal chantun che vegnan libras. Il studi Loëstrasse è vegnì fatg ensemen cun ils servetschs da construcziun auta da la citad, suttamess al president da la citad sco er al schef dal departament da construcziun, planisaziun ed ambient e discutà cun els. Igl è previs che la citad delegheschia ina represchentanza en la giuria da la concurrenza d'investiders.

22 da favrer 2018