Iniziativa parlamentara per midar sco suonda l'art. 47 al. 1 frasa 2 LCG:

Art. 47 al. 1 frasa 2
Incumbensas tenor las literas a e b han l'effect d'ina directiva.

Motivaziun:
L'ultim temp ha il cussegl grond adina puspè constatà che la regenza n'ademplescha incumbensas betg uschia sco ch'ellas èn vegnidas inizialisadas resp. deliberadas. Ed igl è er uschia che cleras prescripziuns d'incumbensa vegnan mitigiadas, interpretadas autramain u interpretadas cun pleds generals e vids. Sch'ina incumbensa vegn approvada en il senn da las explicaziuns e surdada a la regenza, na sa il cussegl grond savens betg tge incumbensa concreta che la regenza ha survegnì finalmain. Correspundentamain variablas èn las pussaivladads da realisaziun sin plaun da l'administraziun sco er da la regenza.

En vista giuridica normescha l'art. 67 al. 2 da l'urden da gestiun dal cussegl grond (UGCG; DG 170.140), che la regenza possia proponer d'acceptar cumplainamain u parzialmain ina incumbensa, da la midar, stritgar u refusar. Sin dumonda da la regenza po il text da l'incumbensa er vegnir midà anc en il cussegl grond (al. 3). Questa regulaziun en l'urden da gestiun s'orientescha vi da la directiva correspundenta da l'art. 47 LCG. L'art. 47 al. 1 lit. b LCG definescha che la regenza vegnia envidada cun ina incumbensa da prender mesiras. Tenor l'art. 47 al. 2 LCG ha questa incumbensa dentant mo l'effect d'ina instrucziun (cuntrari al caracter directiv d'ina incumbensa a la regenza da sustegnair il cussegl grond ad exequir sias atgnas cumpetenzas [cf. art. 47 al. 1 lit. a en cumbinaziun cun l'al. 2 LCG]).

Cun la precisaziun proponida ussa vegni prescrit a la regenza da realisar las incumbensas en il rom d'ina directiva, quai vul dir liantamain.

Art. 47 LCG (nov)
1 Tras l'incumbensa sto la regenza:
a) sustegnair il cussegl grond tar l'execuziun d'atgnas cumpetenzas;
b) prender sezza mesiras.
Incumbensas tenor las literas a e b han l'effect d'ina directiva.
2 Cumissiuns, fracziuns u almain 20 commembras u commembers dal cussegl grond pon inoltrar ina incumbensa.

Cuira, ils 6 da december 2017

Vetsch (Pragg-Jenaz), Cavegn, Bleiker, Albertin, Alig, Berther (Mustér), Buchli-Mannhart, Burkhardt, Caluori, Casanova-Maron (Domat), Casty, Casutt-Derungs, Caviezel (Tavau Clavadel), Clavadetscher, Della Vedova, Dermont, Dosch, Dudli, Epp, Felix (Scuol), Florin-Caluori, Giacomelli, Heiz, Hug, Jeker, Jenny, Kappeler, Kasper, Koch (Tumein), Koch (Igis), Kuoni, Marti, Michael (Donat), Michael (Castasegna), Müller, Niederer, Niggli-Mathis (Grüsch), Papa, Schutz, Stiffler (Tavau Plaz), Tomaschett (Breil), Valär, von Ballmoos, Waidacher, Weidmann, Widmer-Spreiter, Wieland, Berther (Segnas), Engler (Surava), Grünenfelder Hunger, Pfister, Wellig