Il sistem dal dretg fiscal grischun sin midada da proprietad en la lescha davart las taglias communalas e davart las taglias da baselgia sa basa sin ina moda da consideraziun economica cumplessiva (guardar missiva, p. 216). Ina midada da proprietad unicamain da dretg civil, tras la quala l'autorisaziun economica da disponer dal bain immobigliar na vegn betg midada, n'è pia betg in causal suttamess a la taglia sin midada da proprietad. Sco exempel en chaussa numna la missiva il transferiment d'in bain immobigliar da l'acziunari sulet a sia societad.
Cun la sentenzia dals 10 da schaner 2017, decisiun A 16 21, ha la dretgira administrativa dal chantun Grischun dentant surprendentamain giuditgà che la moda da consideraziun economica cumplessiva vegnia remplazzada tras ina moda da consideraziun tenor il dretg civil, uschespert ch'i sajan participadas da tuttas duas varts persunas giuridicas vi da l'act giuridic en discussiun (consideraziun 3d). En la decisiun numnada ha ina societad-biadia – che appartegneva a 100% a sia societad-mamma, la quala appartegneva da sia vart a 100% a sia societad-tatta – vendì sia immobiglia d'hotel a la societad-tatta. Cumbain ch'i n'ha dà economicamain nagina midada da proprietad, ha la vischnanca suttamess quest fatg a la taglia sin midada da proprietad, e la dretgira administrativa ha protegì questa decisiun.
Sco motivaziun ha la dretgira explitgà che questa pratica saja d'attribuir a sia veglia giurisdicziun, che saja vegnida surpigliada dal cussegl grond. «Sch'il legislatur vuleva surpigliar la pratica che valeva gia avant il relasch da la lescha davart las taglias communalas e davart las taglias da baselgia, sto quai vegnir resguardà er durant la valaivladad da la lescha menziunada, uschia ch'in act giuridic, vi dal qual èn participadas da tuttas duas varts persunas giuridicas, vegn giuditgà cun considerar er vinavant mo las parts contractantas directamain participadas, betg dentant las persunas associadas che stattan davosvart u eventuals conglomerats da firmas, eventualas societads da holding u da concern». Tenor la dretgira saja quai perquai chaussa dal legislatur da curreger questa pratica.
Las sutsegnadras ed ils sutsegnaders acceptan questa intimaziun da la dretgira ed incumbenseschan perquai la regenza da midar il dretg fiscal sin midada da proprietad uschia, che midadas economicas da proprietad en il senn descrit qua survart èn liberadas da la taglia sin midada da proprietad entaifer structuras da concern e da holding e ch'i vegn pia realisada la moda da consideraziun economica cumplessiva.
Cuira, ils 17 d'avrigl 2018
Kunz (Cuira), Hug, Crameri, Blumenthal, Bondolfi, Brandenburger, Burkhardt, Caduff, Caluori, Casanova-Maron (Domat), Casty, Casutt-Derungs, Claus, Davaz, Dudli, Engler, Felix (Scuol), Giacomelli, Hardegger, Heiz, Hitz-Rusch, Holzinger-Loretz, Jenny, Joos, Kasper, Koch (Igis), Kunz (Fläsch), Marti, Nay, Niggli (Samedan), Niggli-Mathis (Grüsch), Papa, Paterlini, Pedrini, Pfäffli, Salis, Sax, Schutz, Steck-Rauch, Stiffler (Cuira), Tenchio, Thomann-Frank, Tomaschett (Breil), Troncana-Sauer, Valär, Vetsch (Claustra Vitg), Vetsch (Pragg-Jenaz), Waidacher, Weber, Weidmann, Gugelmann, Natter, Pfister, Wellig